দক্ষিণ আফ্ৰিকাত জৰ্জিয়া মেল’নিৰ সৈতে বৈঠকত মিলিত প্ৰধানমন্ত্ৰী মোদী, বিশ্ববাসীলৈ দিলে এনে বাৰ্তা

জৰ্জিয়া মেল’নিৰ সৈতে প্ৰধানমন্ত্ৰী মোদী

দক্ষিণ আফ্ৰিকাত অনুষ্ঠিত জি-২০ সন্মিলনত অংশগ্ৰহণ কৰি দেওবাৰে স্বদেশলৈ উভতে প্ৰধানমন্ত্ৰী নৰেন্দ্ৰ মোদী। এই সন্মিলনত প্ৰধানমন্ত্ৰী মোদীয়ে বিশ্বৰ ভিন্ন দেশৰ ৰাষ্ট্ৰনেতাৰ সৈতে গুৰুত্বপূৰ্ণ আলোচনাত মিলিত হয়। ইফালে সন্মিলনৰ সমাপ্তিৰ পিছত প্ৰধানমন্ত্ৰী মোদী জোহান্সবাৰ্গত ইটালীৰ প্ৰধানমন্ত্ৰী জৰ্জিয়া মেল’নিৰ সৈতে মিলিত হয়। এই সময়ত দুয়োগৰাকী ৰাষ্ট্ৰনেতাই বাণিজ্য, বিনিয়োগ, প্ৰযুক্তি, কৃত্ৰিম বুদ্ধিমত্তা, মহাকাশ, প্ৰতিৰক্ষা আৰু নিৰাপত্তাকে ধৰি বিভিন্ন ক্ষেত্ৰত দ্বিপাক্ষিক সম্পৰ্ক শক্তিশালী কৰাৰ উপায় সন্দৰ্ভত আলোচনা কৰে।

বৈঠকৰ সময়ত দুয়োগৰাকী নেতাই পাৰস্পৰিক সম্ভাষণ জনাই আলোচনাত মিলিত হয়। লক্ষণীয়ভাৱে চলিত বৰ্ষত প্ৰধানমন্ত্ৰী মোদী আৰু মেল’নিৰ এয়া তৃতীয়খন বৈঠক। দুয়োগৰাকী নেতাৰ দ্বিপাক্ষিক বৈঠকত বৈদেশিক পৰিক্ৰমা মন্ত্ৰী এছ জয়শংকৰ আৰু বৈদেশিক মন্ত্ৰালয়ৰ মুখপাত্ৰ ৰনধীৰ জয়ছোৱালো উপস্থিত থাকে।

সন্ত্ৰাসবাদৰ বিৰুদ্ধে ভাৰত-ইটালীৰ সহযোগিতা

জোহান্সবাৰ্গত জি-২০ শীৰ্ষ সন্মিলনৰ পিছত অনুষ্ঠিত এই বৈঠকৰ সময়ত প্ৰধানমন্ত্ৰী মোদী আৰু মেল’নিয়ে সন্ত্ৰাসবাদৰ প্ৰতি বিত্তীয় সাহায্যৰ বিৰুদ্ধে যুঁজৰ ক্ষেত্ৰত ভাৰত-ইটালী যৌথ পদক্ষেপ গ্ৰহণ কৰে। এনে পদক্ষেপে সন্ত্ৰাসবাদৰ বিৰুদ্ধে যুঁজ দিয়াৰ ক্ষেত্ৰত দুয়োখন দেশৰ দায়বদ্ধতাক পুনৰবাৰ প্ৰকাশ কৰে।

মেলনীৰ সৈতে এক ফলপ্ৰসূ বৈঠক

বৈঠকৰ অন্তত সামাজিক মাধ্যম প্লেটফৰ্ম এক্স যোগে প্ৰধানমন্ত্ৰী মোদীয়ে এই বৈঠকক ফলপ্ৰসূ আখ্যা দিয়ে। তেওঁ কয়, “প্ৰধানমন্ত্ৰী জৰ্জিয়া মেল’নিৰ সৈতে মোৰ এক অতি ফলপ্ৰসূ বৈঠক হৈছিল। ভাৰত-ইটালীৰ কৌশলগত অংশীদাৰিত্ব অব্যাহত আছে, ইয়াৰ ফলত আমাৰ দেশৰ জনসাধাৰণ বহুখিনি উপকৃত হৈছে।”

বৈদেশিক মন্ত্ৰালয়ৰ মুখপাত্ৰ ৰণধীৰ জয়ছোৱালেও এই বৈঠক সন্দৰ্ভত তথ্য প্ৰকাশ কৰে। দুয়োগৰাকী নেতাৰ আলোচনাত বাণিজ্য, বিনিয়োগ, প্ৰযুক্তি, কৃত্ৰিম বুদ্ধিমত্তা, মহাকাশ, প্ৰতিৰক্ষা, নিৰাপত্তা, গৱেষণা, উদ্ভাৱন আৰু সংস্কৃতিৰ ক্ষেত্ৰত সম্পৰ্ক গভীৰ কৰাৰ ওপৰত গুৰুত্ব আৰোপ কৰা হৈছে বুলি জয়ছোৱালে কয়।

AI শীৰ্ষ সন্মিলনৰ বাবে সমৰ্থন

জয়ছোৱালে লগতে দুয়োজন নেতাই যুটীয়া কৌশলগত কাৰ্য পৰিকল্পনা ২০২৫-২৯ৰ ক্ষেত্ৰত লাভ কৰা অগ্ৰগতিয়ে অৰ্থনীতি আৰু জনসাধাৰণক উপকৃত কৰিব বুলিও উল্লেখ কৰে। বৈদেশিক মন্ত্ৰালয়ৰ মুখপাত্ৰগৰাকীয়ে লগতে ২০২৬ চনত ভাৰতে আয়োজন কৰিবলগীয়া AI সন্মিলনৰ প্ৰতি প্ৰধানমন্ত্ৰী মেল’নিৰ সমৰ্থনৰ তথ্যও প্ৰকাশ কৰে।