জনসংখ্যা বৃদ্ধিৰ বাবে সংগ্ৰাম ১৩ খন দেশৰ, সন্তান জন্ম দিলেই চৰকাৰে আগবঢ়াই ধন আৰু অন্যান্য সুবিধা

হিন্দুসকলক ৩টা সন্তান জন্ম দিয়াৰ কথা কৈছিল ৰাষ্ট্ৰীয় স্বয়ং সেৱক সংঘৰ প্ৰমুখ মোহন ভাগৱতে। ইয়াৰ আঁৰৰ কাৰণ কি? ভাৰতৰ জনসংখ্যা ১.৪৬ বিলিয়ন, কিন্তু দেশৰ মুঠ প্ৰজনন হাৰ ২.১ৰ পৰা ১.৯লৈ হ্ৰাস পাইছে। যদি এগৰাকী মহিলাৰ প্ৰজননৰ হাৰ ২.০ হয়, ইয়াৰ অৰ্থ হ’ল ভাৰতৰ এগৰাকী মহিলাৰ প্ৰজনন জীৱনত (সাধাৰণতে ১৫-৪৯ বছৰ বয়সত) গড়ে ২টা সন্তান জন্ম দিয়াৰ ক্ষমতা থাকে।

১৮৮০ চনৰ পৰা ১৯৭০ চনলৈকে ভাৰতীয় মহিলাসকলে গড়ে ৫.৭ৰ পৰা ৬টা সন্তান জন্ম দিছিল। ভাৰতীয় মহিলাসকলে গড়ে ইমান কম সন্তান জন্ম দিছে যে পৰৱৰ্তী প্ৰজন্মত জনসংখ্যাৰ আকাৰ বজাই ৰাখিবলৈ সেয়া যথেষ্ট নহয়। প্ৰজননৰ হাৰ হ্ৰাস হোৱাৰ পিছতো ভাৰতৰ যুৱ জনসংখ্যা অতি উল্লেখযোগ্য। ইয়াৰ জনসংখ্যা শূন্যৰ পৰা ১৪ বছৰ বয়সত ২৪%, ১০ৰ পৰা ১৯ বছৰ বয়সৰ ১৭% আৰু ১০ৰ পৰা ২৪ বছৰ বয়সৰ ২৬%। দেশৰ ৬৮% জনসংখ্যা ১৫ৰ পৰা ৬৪ বছৰ বয়সৰ। বৃদ্ধ জনসংখ্যা (৬৫ আৰু তাৰ ওপৰৰ) ৭%।

উৰ্বৰতাৰ হাৰ হ্ৰাস পোৱাৰ বাবে বিশ্বৰ ১৩খন দেশে সংগ্ৰাম কৰি আছে। এই দেশবোৰত সন্তান জন্ম দিয়াৰ বাবে ৰাজসাহায্য দিয়া হয়। জানো আহক কোন কোন দেশে কি ব্যৱস্থা লৈছে?

চীন: বহু প্ৰদেশত নগদ বোনাছ আৰু কৰ ৰেহাই দিয়া হৈছে

উৰ্বৰতাৰ হাৰ বৃদ্ধিৰ বাবে জুলাই মাহত চীন চৰকাৰে নতুন আঁচনি ঘোষণা কৰিছিল। ইয়াৰ অধীনত অভিভাৱকসকলে ৩ বছৰ বয়সলৈকে প্ৰতিটো শিশুৰ বাবে বাৰ্ষিক ৩,৬০০ চীনা য়ান (প্ৰায় ৫০০ ডলাৰ) ৰাজসাহায্য লাভ কৰিব। এই আঁচনি ২০২৫ চনৰ ১ জানুৱাৰীৰ পিছত জন্ম হোৱা শিশুৰ ক্ষেত্ৰত প্ৰযোজ্য হ’ব।

এটা পৰিয়ালে ৩ বছৰত ১০,৮০০ চীনা য়ান অৰ্থাৎ ১.৩২ লাখ টকা লাভ কৰিব পাৰিব। সাংহাই আৰু ছিচুয়ানৰ দৰে চহৰতো শিশুৰ যত্নৰ ৰাজসাহায্য, কৰ ৰেহাই আৰু পিতৃৰ বাবে দীৰ্ঘদিনীয়া ছুটীৰ দৰে ব্যৱস্থা প্ৰদান কৰা হৈছে। ছিচুয়ানত পিতৃসকলকো ২৫ দিনৰ দৰমহাযুক্ত ছুটী দিয়া হৈছে। চীনৰ উৰ্বৰতাৰ হাৰ ১.০।

টাইৱান: চৰকাৰে প্ৰতিটো শিশুৰ বাবে নগদ বোনাছ দিছে

টাইৱান চৰকাৰে আইভিএফ (ইন-ভিট্ৰ’ ফাৰ্টিলাইজেচন)ৰ বাবে ৰাজসাহায্য দিছে। এতিয়া আইভিএফৰ জৰিয়তে সন্তান জন্ম দিয়াৰ বাবে প্ৰায় ৬ লাখ (৬৭০০ ডলাৰ) দিয়া হ’ব। আগতে চৰকাৰে প্ৰায় ৩৩৩০ ডলাৰ দিছিল। টাইৱানত উৰ্বৰতাৰ হাৰ ১.১১, যিটো চীনতকৈও কম। আইভিএফৰ খৰচ কমোৱাৰ লগতে মানুহক উৎসাহিত কৰিবলৈ এই ৰাজসাহায্য প্ৰথম প্ৰচেষ্টাৰ পৰা ষষ্ঠ প্ৰচেষ্টালৈকে দিয়া হ’ব।

জাপান: শিশুক ডাঙৰ-দীঘল কৰাৰ ক্ষেত্ৰত বেবী বোনাছ আৰু ৰাজসাহায্য

জাপানত জন্মৰ হাৰ ১.২০। ইয়াত সন্তান জন্ম হোৱাৰ পিছত পিতৃ-মাতৃক সহায় কৰিবলৈ ৪ লাখ ২০ হাজাৰ য়েন (প্ৰায় ডেৰ লাখ টকা) আৰ্থিক সাহায্য দিয়া হয়। ইয়াক ৫ লাখ য়েন (৩ লাখ টকা)লৈ বৃদ্ধি কৰাৰ পৰিকল্পনাও কাৰ্যকৰী হ’বলৈ গৈ আছে। জাপানত বসতি স্থাপন কৰিব বিচৰা দম্পতীক চৰকাৰে ৬ লাখ য়েন পৰ্যন্ত অৰ্থাৎ প্ৰায় ৪.২৫ লাখ টকাৰ সাহায্য দিয়াৰ সিদ্ধান্ত লৈছে।

দক্ষিণ কোৰিয়া : ছিউল আৰু অন্যান্য চহৰত নগদ বোনাছ

ইয়াত মাতৃসকলক সন্তান জন্মৰ লগে লগে ২০ লাখ ৱান (১,৫১০ ডলাৰ) নগদ ধন দিয়া হয়। ছিউল আৰু বহু চহৰতো মাহিলী বোনাছ দিয়া হয়। ইয়াত প্ৰজননৰ হাৰ ০.৭২, যিটো ২০২৫ চনত ০.৬৫ লৈ হ্ৰাস পাব পাৰে। দক্ষিণ কোৰিয়াৰ বেছিভাগ মহিলাই কেৰিয়াৰ আৰু সন্তান লালন-পালনৰ খৰচৰ বাবে চিন্তিত। সেয়েহে সন্তান জন্ম নিদিবলৈ বা পলম কৰিবলৈ সিদ্ধান্ত লৈছে।

ছিংগাপুৰ: বেবী বোনাছ আঁচনি, প্ৰতিটো শিশুৰ বাবে নগদ ১৫০০ ডলাৰ পৰ্যন্ত সাহায্য

ছিংগাপুৰত প্ৰজননৰ হাৰ ০.৯৭। ছিংগাপুৰ চৰকাৰে বেবী বোনাছ কেছ গিফ্টৰ প্ৰচাৰ কৰিছে। ইয়াৰ অধীনত প্ৰতিটো শিশুৰ বাবে ১৫০০ ডলাৰ নগদ ধন দিয়া হ’ব। ২০২৫ চনৰ ১ জানুৱাৰীৰ পিছত জন্ম হোৱা শিশুৰ ক্ষেত্ৰত প্ৰযোজ্য হ’ব এই নতুন আঁচনি।

হাংগেৰী: শিশু যিমানেই বেছি সিমানেই বেছি ৰাজসাহায্য

হাংগেৰীত উৰ্বৰতাৰ হাৰ ১.৫১। ইয়াত শিশু থকা পৰিয়ালক ইতিমধ্যে বৃহৎ পৰিসৰৰ ৰাজসাহায্য দিয়া হৈছে। পিতৃ-মাতৃ দুয়োজন থকা পৰিয়ালে এটা সন্তানৰ বাবে প্ৰতিমাহে ১২,২০০ হাংগেৰিয়ান ফৰিণ্ট (৩২ ডলাৰ) লাভ কৰে, আনহাতে ৩টা বা তাতকৈ অধিক সন্তান থকা পৰিয়ালে প্ৰতিমাহে প্ৰতিটো শিশুৰ বাবে ১৬,০০০ (৪১.৬০ ডলাৰ) ফৰিণ্ট লাভ কৰে। ইয়াৰ উপৰিও যুৱতীসকলৰ বাবে সুতমুক্ত ঋণকে ধৰি অন্যান্য সুবিধাও উপলব্ধ।

ইটালী: বেবী বোনাছ আৰু মাহিলী ভাট্টা

ইয়াত উৰ্বৰতাৰ হাৰ ১.১৮। চলিত বৰ্ষৰ এপ্ৰিল মাহত ইটালীত নতুন ‘বেবী বোনাছ’ আঁচনি আৰম্ভ কৰা হৈছিল। ইয়াৰ অধীনত ২০২৫ চনত জন্ম লোৱা বা দত্তক লোৱা প্ৰতিটো শিশুৰ বাবে ১০০০ ইউৰো (১,১৩৫ ডলাৰ) দিয়া হ’ব। এই বোনাছ ইটালীৰ নাগৰিকৰ লগতে অন্যান্য ইউৰোপীয় সংঘৰ সদস্য দেশৰ নাগৰিক আৰু অ-ইউৰোপীয় ইউনিয়নৰ নাগৰিকসকলক দিয়া হ’ব যিসকলে আইনগতভাৱে ইটালীত দীৰ্ঘম্যাদী বাসস্থান লাভ কৰিছে।

ফ্ৰান্স : মাহিলী শিশু ভাট্টা আৰু কৰ ৰেহাই

ফ্ৰান্সত প্ৰজননৰ হাৰ ১.৬৬। ফ্ৰান্স চৰকাৰে সন্তান লালন-পালনৰ বাবে পৰিয়ালসমূহক আৰ্থিক সাহায্য প্ৰদান কৰে। ২ টাতকৈ অধিক সন্তান থকা পৰিয়ালে মাহিলী ১৩০-৫০০ ইউৰো ভাট্টা লাভ কৰে। ইয়াত ল’ৰা-ছোৱালী বেছি হ’লে কৰ কম হয়। প্ৰতিটো অতিৰিক্ত শিশুৱে কৰ ফলকখন তললৈ নমাই আনে।

জাৰ্মানী: প্ৰতিটো শিশুৰ বাবে মাহিলী ভাট্টা ২৫০ ইউৰো

জাৰ্মানীত প্ৰজননৰ হাৰ ১.৩৯। শিশুৰ যত্ন আৰু লালন-পালনৰ বাবে চৰকাৰে কিণ্ডাৰগেল্ড নামেৰে মাহিলী ভাট্টা প্ৰদান কৰে। এই ভাট্টা প্ৰতিটো শিশুৰ বাবে প্ৰতিমাহে ২৫০ ইউৰো। বয়স বা শিশুৰ সংখ্যাৰ ওপৰত ভিত্তি কৰি এই পৰিমাণৰ কোনো পৰিৱৰ্তন নহয়।

ৰাছিয়া: দ্বিতীয় সন্তানৰ পিছত পৰিয়াললৈ ডাঙৰ আৰ্থিক সাহায্য

জাৰ্মানীত প্ৰজননৰ হাৰ ১.৪১। ৰাছিয়াত চৰকাৰে ‘মেটাৰ্নিটি কেপিটেল প্ৰগ্ৰেম’ৰ অধীনত দ্বিতীয় সন্তান জন্মৰ সময়ত ৬ লাখ ৩০ হাজাৰ ৰাছিয়ান ৰুবল (৬ লাখতকৈ অধিক) আৰ্থিক সাহায্য প্ৰদান কৰে।

পোলেণ্ড: ৫০০+ প্ৰগ্ৰেম, প্ৰতিটো শিশুৰ বাবে প্ৰতিমাহে ৫০০ (PLN)

জাৰ্মানীত প্ৰজননৰ হাৰ ১.১৬। পোলেণ্ডত চৰকাৰে ‘৫০০+ প্ৰগ্ৰেম’ৰ অধীনত প্ৰতিটো শিশুৰ বাবে প্ৰতিমাহে ৫০০ পোলেণ্ড ঝলটি (PLN) দিয়ে। এই আঁচনিখন সকলো পৰিয়ালৰ বাবে, তেওঁলোকৰ আয় যিয়েই নহওক কিয়। এই কাৰ্যসূচী ২০১৬ চনৰ পৰা আৰম্ভ হৈছিল।

কানাডা: শিশু সুবিধা (চিচিবি) কাৰ্যসূচী

কানাডাত প্ৰজননৰ হাৰ ১.২৬। কানাডা চৰকাৰে কানাডা চাইল্ড বেনিফিট (CCB)ৰ অধীনত ১৮ বছৰৰ তলৰ শিশুৰ বাবে অভিভাৱকসকলক মাহিলী সাহায্য প্ৰদান কৰে। এই পৰিমাণ পৰিয়ালৰ বাৰ্ষিক আয় আৰু সন্তানৰ সংখ্যা/বয়সৰ ওপৰত নিৰ্ভৰ কৰে।

অষ্ট্ৰেলিয়া: শিশুৰ যত্নৰ ৰাজসাহায্য আৰু কৰ ৰেহাই

অষ্ট্ৰেলিয়াত প্ৰজননৰ হাৰ ১.৫০। ইয়াৰ পূৰ্বে ‘বেবী বোনাছ’ নামৰ নগদ ধনৰ আঁচনি আছিল, যিটো ২০১৪ চনত বন্ধ কৰা হৈছিল। এতিয়া চৰকাৰে শিশু যত্নৰ ৰাজসাহায্য আৰু কৰ ৰেহাইৰ জৰিয়তে সুবিধা প্ৰদান কৰে।