৪ বছৰৰ পাছত ভাৰত ভ্ৰমণ কৰিব পুটিনে, S-400 ৰ পৰা আৰম্ভ কৰি এই বিষয়বোৰত চুক্তি হ’ব পাৰে !

চাৰি বছৰৰ মূৰত ভাৰত ভ্ৰমণ কৰিব ৰাছিয়াৰ ৰাষ্ট্ৰপতি ভ্লাদিমিৰ পুটিনে। অহা ৪ ডিচেম্বৰৰ পৰা ৫ ডিচেম্বৰলৈ ভাৰত ভ্ৰমণৰ কাৰ্যসূচী লৈছে পুটিনে। এই সময়ছোৱাত তেওঁ প্ৰধানমন্ত্ৰী নৰেন্দ্ৰ মোদীৰ সৈতে আলোচনাত মিলিত হ’ব আৰু ভাৰত-ৰাছিয়াৰ বাৰ্ষিক সন্মিলনত অংশগ্ৰহণ কৰিব। ইয়াৰ লগতে ভাৰত-ৰাছিয়াৰ মাজত কেইবাটাখনো নতুন চুক্তি হোৱা সম্ভাৱনা আছে। কি কি আলোচনা আৰু চুক্তি হোৱাৰ সম্ভাৱনা আছে চাওঁ আহক।

S-400 এয়াৰ ডিফেন্স চিষ্টেমৰ নতুন চুক্তি

ভাৰতে S-400 এয়াৰ ডিফেন্স চিষ্টেমৰ নতুন অৰ্ডাৰ দিব পাৰে। ইতিমধ্যে ভাৰতে ৫ টা S-400 ইউনিটৰ ক্ৰয় চুক্তি (২০১৮) স্বাক্ষৰ কৰিছে। ইয়াৰে তিনিটা ইউনিট লাভ কৰিছে, দুটা বাকী আছে। প্ৰতিটো S-400 স্কোয়াড্ৰনত দুটা বেটাৰী থাকে, প্ৰত্যেকটোতে ছটা লঞ্চাৰ, এটা কমাণ্ড-এণ্ড-কণ্ট্ৰল চিষ্টেম, এটা চোৱাচিতা ৰাডাৰ আৰু এটা এংগেজমেণ্ট ৰাডাৰ থাকে। প্ৰতিটো বেটাৰীয়ে ১২৮টা মিছাইল নিক্ষেপ কৰিব পাৰে।

ৰাছিয়ান তেলত অতিৰিক্ত ৰেহাই

আমেৰিকাৰ শুল্কৰ হেঁচাত ভাৰতে ৰাছিয়াৰ তেল ক্ৰয় হ্ৰাস কৰিছে যদিও ৰাছিয়াই নতুন ৰেহাই আগবঢ়াইছে। এই বৈঠকৰ ফলত সস্তা শক্তি যোগানৰ ক্ষেত্ৰত দীৰ্ঘম্যাদী চুক্তি হ’ব পাৰে। ৰাছিয়াৰ এল এন জি, কয়লা আৰু গেছ পাইপলাইনৰ ক্ষেত্ৰতো সহযোগিতাৰ বিষয়ে আলোচনা হ’ব পাৰে।

বাণিজ্যিক ভাৰসাম্য উন্নত কৰাৰ বাবে পেকেজ

২০২৪-২৫ চনত ভাৰত আৰু ৰাছিয়াৰ মাজত বাণিজ্য ৬৮.৭ বিলিয়ন ডলাৰ, কিন্তু ভাৰতৰ ৰপ্তানি আছিল মাত্ৰ ৪.৮৮ বিলিয়ন ডলাৰ। এই ভাৰসাম্যহীনতা শুধৰাবলৈ গুৰুত্বপূৰ্ণ সিদ্ধান্ত লোৱা হ’ব পাৰে। ভাৰতীয় সামগ্ৰীৰ ৰাছিয়াৰ বজাৰত বিশেষ প্ৰৱেশৰ কথা ঘোষণা কৰা হ’ব পাৰে। টকা-ৰুবলৰ হিচাপত বাণিজ্য বৃদ্ধিৰ প্ৰয়াস হ’ব পাৰে।

প্ৰতিৰক্ষা প্ৰকল্প আৰু প্ৰযুক্তি হস্তান্তৰ

AK-203 ৰাইফল প্ৰস্তুত ত্বৰান্বিত কৰাৰ ক্ষেত্ৰত আলোচনা হ’ব পাৰে। ব্ৰহ্মছ ক্ষেপণাস্ত্ৰ আৰু ভৱিষ্যতৰ প্ৰতিৰক্ষা প্ৰকল্প সন্দৰ্ভত নতুন বুজাবুজি চুক্তি স্বাক্ষৰিত হ’ব পাৰে। মেক ইন ইণ্ডিয়াৰ অধীনত প্ৰতিৰক্ষা সঁজুলিৰ যৌথ নিৰ্মাণ সন্দৰ্ভত নতুন ঘোষণা কৰা হ’ব পাৰে।

পাৰমাণৱিক শক্তিৰ ওপৰত নতুন ঘোষণা

কুডানকুলাম পাৰমাণৱিক কেন্দ্ৰত নতুন ইউনিটৰ অগ্ৰগতিৰ সন্দৰ্ভত ঘোষণা কৰা হ’ব পাৰে। সৰু মডিউলাৰ ৰিয়েক্টৰ (এছএমআৰ) আৰু ভৱিষ্যতৰ পাৰমাণৱিক প্ৰকল্পৰ ওপৰত চুক্তি হ’ব পাৰে।

আৰ টি (ৰাছিয়া টুডে) ইণ্ডিয়ান চেনেল মুকলি

ভাৰত ভ্ৰমণৰ সময়ত পুটিনে মুকলি কৰিব আৰ টি ইণ্ডিয়া চেনেল। আৰ টি হৈছে ৰাছিয়া চৰকাৰৰ সম্প্ৰচাৰ চেনেল। ইয়াৰ দ্বাৰা সংবাদ মাধ্যমৰ সহযোগিতাৰ এক নতুন আৰম্ভণি হ’ব।

দুয়োখন দেশৰ ভিজন ডকুমেণ্ট

কৌশলগত অংশীদাৰিত্বৰ ২৫ বছৰ সম্পূৰ্ণ হোৱাৰ বাবে এখন ভিজন ডকুমেণ্ট প্ৰকাশ কৰিব পাৰে। প্ৰতিৰক্ষা, শক্তি, মহাকাশ, বাণিজ্য, বিজ্ঞান, প্ৰযুক্তি আদিক সামৰি অহা ১০ বছৰৰ বাবে দুয়োখন দেশে কৌশলগত ৰোডমেপ প্ৰকাশ কৰাৰ সম্ভাৱনা আছে। ৰাছিয়াৰ মহাকাশ সংস্থা ৰস্কোচমছৰ সৈতে গাগানিয়ান অভিযানৰ বাবে অধিক সহযোগিতা হোৱাৰ সম্ভাৱনা আছে।