১৫ পাক সেনা নিহত, ৭টা সামৰিক ঘাটি ধ্বংস! কিদৰে তালিবানে পাকিস্তানত চলাইছিল আক্ৰমণ?

কিদৰে তালিবানে পাকিস্তানত চলাইছিল আক্ৰমণ?

শনিবাৰে নিশা আফগানিস্তানে পাকিস্তানত আক্ৰমণ কৰে। তিনি ঘণ্টীয়া অভিযানত আফগান সেনাই হেলমাণ্ডৰ বাহৰামচাৰ শ্বাকিজ, বিবি জানি, আৰু ছালেহানু অঞ্চলত অভিযান চলায়। শনিবাৰে মাজনিশা আফগানিস্তানে ডুৰাণ্ড লাইনৰ সমীপৰ কেইবাটাও পাকিস্তানী সীমান্ত চকীত গোলাবৰ্ষণ কৰে। ডুৰাণ্ড লাইনত সংঘটিত হোৱা এই সংঘৰ্ষৰ পিছত এতিয়া পাকিস্তান আৰু আফগানিস্তানৰ পৰিস্থিতি অত্যন্ত উত্তেজিত হৈ আছে।

আফগানিস্তান আৰু পাকিস্তানৰ মাজত উত্তেজনা এতিয়া যুদ্ধৰ দিশে আগবাঢ়িছে। কাবুলত বিমান আক্ৰমণৰ কিছু সময়ৰ পিছতে আফগানিস্তানে প্ৰতিশোধ লয়। আফগান সেনাই পাকিস্তানৰ সামৰিক স্থানত ধাৰাবাহিকভাৱে বিধ্বংসী আক্ৰমণ চলায়। কাবুলত পাকিস্তানৰ বিমান আক্ৰমণৰ প্ৰত্যুত্তৰ হিচাপে কৰা হয় এই গোলাবৰ্ষণ।

আফগানিস্তানৰ ব্যাপক আক্ৰমণ

পাকিস্তান সীমান্তৰ সমীপত গোটেই নিশা ৰকেট, মৰ্টাৰ, গধুৰ মেচিনগানৰ গুলীৰ শব্দ প্ৰতিধ্বনিত হৈছিল। হেলমাণ্ড, পাকটিয়া, খোষ্ট, আৰু নাংগাৰহাৰ অঞ্চলত পাকিস্তান আৰু আফগান বাহিনীৰ মাজত প্ৰচণ্ড গোলাবৰ্ষণ সংঘটিত হয়।

গোটেই নিশা দুয়োটা সেনাই প্ৰচণ্ড বোমাবৰ্ষণৰ আদান-প্ৰদান কৰে। হেলমাণ্ড প্ৰাদেশিক চৰকাৰৰ মুখপাত্ৰ মৌলভি মহম্মদ কাছিম ৰিয়াজে কয় যে, শনিবাৰে নিশা ডুৰাণ্ড লাইনৰ সমীপৱৰ্তী বাহৰমপুৰ জিলাত আফগান বাহিনীয়ে প্ৰতিশোধমূলক আক্ৰমণৰ সময়ত ১৫ জন পাকিস্তানী জোৱান নিহত হয়। ৰিয়াজে কয় যে, এই অভিযানত আফগান বাহিনীয়ে পাকিস্তানৰ তিনিটা সামৰিক চকী দখল কৰে। তেওঁ আৰু কয় যে, আফগান বাহিনীয়ে যুদ্ধৰ সামগ্ৰী হিচাপে অসংখ্য অস্ত্ৰ-শস্ত্ৰ আৰু গোলাবাৰুদো জব্দ কৰে।

পাকিস্তানী ফ্ৰন্টিয়াৰ কৰ্পছৰ এটা ঘাটি ব্যাপক ধ্বংসৰ সন্মুখীন হ’বলগীয়া হয়। কুনাৰ আৰু হেলমাণ্ডতো কেইবাটাও পাকিস্তানী ঘাটি ধ্বংস কৰা হয়। কুৰৰাম, নংগাৰহৰ, কুনাৰকে ধৰি সাতটা ঘাটি ধ্বংস কৰা হয়। এটা নিৰাপত্তাৰক্ষীৰ সূত্ৰই বিবিচি উৰ্দুক জনোৱা মতে, পাকিস্তান-আফগানিস্তান সীমান্তৰ কেইবাটাও অঞ্চলত গুলীচালনা সংঘটিত হয়, য’ত আছে আংগুৰ আড্ডা, বাজাউৰ, কুৰৰাম, ডিৰ, চিত্ৰাল, আৰু বৰমাচা।

ইয়াৰ পূৰ্বে পাকিস্তানে আক্ৰমণ চলাইছিল

বৃহস্পতিবাৰে আফগানিস্তানত আক্ৰমণ কৰিছিল পাকিস্তানে। পাকিস্তানে কাবুললৈ ক্ষেপণাস্ত্ৰ নিক্ষেপ কৰে। আফগানিস্তানে দাবী কৰিছে যে এই আক্ৰমণত কোনো লোকৰ মৃত্যু হোৱা নাই। কিন্তু পৰৱৰ্তী সময়ত আফগানিস্তানে পাকিস্তানক ইয়াৰ পৰিণামৰ বিষয়ে সকীয়াই দিয়ে।

আফগান প্ৰতিৰক্ষা মন্ত্ৰালয়ে কয় যে, পাকিস্তানৰ লক্ষ্যত আক্ৰমণ কৰাৰ পিছত সামৰিক অভিযানৰ অন্ত পৰিছে। তালিবান চৰকাৰে দাবী কৰিছে যে তেওঁলোকৰ যোদ্ধাসকলে পাকিস্তানৰ কেইবাটাও সামৰিক চকীক লক্ষ্য কৰি লৈছিল। পাকিস্তানী সেনাৰ তিনিটা চকী দখল কৰিলে তালিবানৰ যোদ্ধাই। ডুৰাণ্ড লাইনৰ সিপাৰে কুনাৰ আৰু হেলমাণ্ড প্ৰদেশতো পাকিস্তানী ঘাটি ধ্বংস কৰা হয়। অৱশ্যে এই সন্দৰ্ভত পাকিস্তানী সেনাৰ আন্তঃসেৱা জনসংযোগ চমুকৈ আই এছ পি আৰয়ে এতিয়াও কোনো আনুষ্ঠানিক বিবৃতি প্ৰকাশ কৰা নাই।

কুৰাম জিলাৰ জিৰ’ পইণ্টৰ ওচৰত নিয়োজিত এজন আৰক্ষী বিষয়াই বিবিচিক জনোৱা মতে, আফগান ফালৰ পৰা প্ৰায় ১০ বজাৰ পৰা প্ৰচণ্ড আৰ্টিলাৰীৰ গুলীচালনা আৰম্ভ হয়। শনিবাৰে নিশা। সীমান্তৰ কেইবাটাও স্থানৰ পৰা প্ৰচণ্ড গুলীচালনাৰ খবৰ পোৱা বুলিও তেওঁ কয়।

আফগান প্ৰতিৰক্ষা মন্ত্ৰালয়ে কয় যে, “আমাৰ অভিযান মাজনিশা শেষ হ’ল। যদি পাকিস্তানে পুনৰ আফগান সীমান্ত উলংঘা কৰে তেন্তে আমাৰ সেনাই দেশখনক ৰক্ষা কৰিবলৈ সম্পূৰ্ণৰূপে সাজু।” তদুপৰি, সূত্ৰ অনুসৰি কান্দাহাৰ প্ৰদেশৰ মাইৱাণ্ড জিলাত ৭ গৰাকী পাকিস্তানী জোৱানে আত্মসমৰ্পণ কৰে।

পাকিস্তানৰ খাইবাৰ-পাখতুনখোৱা প্ৰদেশৰ এগৰাকী বিষয়াই সংবাদ মাধ্যমৰ আগত কয় যে, আফগানিস্তানে চাৰিটা ভিন্ন স্থানত আক্ৰমণ চলাইছিল। পাকিস্তানী সেনাই প্ৰচণ্ড আৰ্টিলাৰী গুলীৰে প্ৰত্যুত্তৰ দিয়ে। আফগানিস্তানৰ কুনাৰ প্ৰদেশৰ নাৰী জিলাৰ ডকলাম অঞ্চলৰ প্ৰত্যক্ষদৰ্শীয়ে বিবিচিক জনোৱা মতে, সন্ধিয়া তালিবান বাহিনীয়ে পাকিস্তানী অঞ্চলত লঘু আৰু গধুৰ অস্ত্ৰৰে আক্ৰমণ কৰি দুয়োপক্ষৰ মাজত তীব্ৰ যুদ্ধৰ সূচনা কৰে।

পাকিস্তানৰ গৃহমন্ত্ৰী মহছিন নাকভিয়ে উল্লেখ কৰে যে, আফগানিস্তানে জুই আৰু তেজৰ সৈতে খেলি আছে। তেওঁৰ মতে, আফগান বাহিনীয়ে সাধাৰণ নাগৰিকৰ ওপৰত গুলীচালনা কৰাটো আন্তঃৰাষ্ট্ৰীয় আইনৰ স্পষ্ট উলংঘা। ভাৰতৰ দৰেই আফগানিস্তানেও উপযুক্ত সঁহাৰি লাভ কৰিব বুলি তেওঁ সকীয়াই দিয়ে। তেওঁলোকে পাকিস্তানক বেঁকা চকুৰে চাবলৈও সাহস নকৰিব।

পাকিস্তানী চৰকাৰী এজন বিষয়াই দ্য গাৰ্ডিয়ানক জনোৱা মতে, “যোৱা নিশা তালিবান বাহিনীয়ে কেইবাটাও সীমান্ত চকীত গুলীচালনা কৰে। আমি সীমান্তৰ চাৰিটা স্থানত আৰ্টিলাৰীৰে প্ৰতিশোধ ল’লোঁ।” প্ৰতিশোধমূলক আক্ৰমণত পাকিস্তানী সেনাই আৰ্টিলাৰী, টেংক, লঘু আৰু গধুৰ অস্ত্ৰ ব্যৱহাৰ কৰিছিল।