কাশ্মীৰলৈ আহিলে প্ৰমোশ্যন, লাভ কৰে অন্যান্য সুবিধাও, সন্ত্ৰাসবাদীৰ দৰমহা কিমান জানেনে?

সন্ত্ৰাসবাদ, মানৱ সমাজৰ বাবেই ই এক ব্যাধি স্বৰূপ । ভাৰতৰ লগতে বিশ্বৰ বিভিন্ন দেশ বিভিন্ন সময়ত সন্ত্ৰাসবাদীৰ নৃশংসতাৰ সাক্ষী হৈ ৰৈছে । নিষ্পাপ মানুহক হত্যা কৰা সন্ত্ৰাসবাদীয়ে কিমান টকা লাভ কৰে জানেনে? আন্তৰ্জাতিক ৰাজনৈতিক বিশেষজ্ঞৰ মতে, সন্ত্ৰাসবাদী সংগঠনসমূহ পৰিচালিত হয় অনুদানৰ টকাৰে । বিশ্বৰ ভিন্ন দেশে কেতিয়াবা চাপত পৰি, কেতিয়াবা বাণিজ্যিক লাভ অৰ্জনৰ বাবে জেহাদী সংগঠনসমূহক বৃহৎ পৰিমাণৰ আৰ্থিক সাহায্য আগবঢ়ায় । এক পৰিসংখ্যা অনুসৰি, ২০২৪ বৰ্ষত বিশ্বজুৰি ৬ হাজাৰ কোটি মাৰ্কিন ডলাৰৰ সাহায্য লাভ কৰিছিল সন্ত্ৰাসবাদী সংগঠনসমূহে ।

অৱশ্যে পাকিস্তানী সন্ত্ৰাসবাদীৰ বাবে গাখীৰতে ম’হৰ খুটিৰ দৰে কথা । যিদৰে তেওঁলোকে পৃথিৱীখনক লুটপাত কৰি আছে, ঠিক তেনেদৰে লুটিছে নিজৰ দেশৰ চোৰাংচোৱা সংস্থা আই এছ আইকো । ক’ব পাৰি যে চুবুৰীয়া দেশৰ সন্ত্ৰাসবাদীয়ে কাৰ্যতঃ আই এছ আইৰ ধনেৰে জীৱন চলাই আছে ।

অগ্ৰণী সংবাদ মাধ্যম বিজনেছ টুডেৰ এক প্রতিবেদন মতে প্রতিবছৰে দেশৰ ভিতৰৰ সন্ত্ৰাসবাদী বা জেহাদী গোটৰ বাবে আই এছ আইয়ে ২৫ কোটি ডলাৰ অৰ্থাৎ ভাৰতীয় হিচাপত ২,১৩৪ কোটি টকা ব্যয় কৰে । আত্মঘাতী বোমাৰুৰ পৰা আৰম্ভ কৰি অত্যাধুনিক অস্ত্ৰ-শস্ত্ৰলৈকে, আনকি উগ্ৰপন্থীৰ দৰমহাও এই ধনৰ ভিত্তিত নিৰ্ধাৰণ কৰা হয় ।

কিন্তু ইমান টকা লাভ কৰাৰ পাছতো সন্ত্ৰাসবাদী সংগঠনৰ ক্ষুধা পূৰণ নহয় । প্ৰশিক্ষণ কেন্দ্ৰ নিৰ্মাণ, বন্দুক ক্ৰয়, বোমা নিৰ্মাণ এই সকলোবোৰৰ খৰচ কোটি কোটি টকা । ইয়াৰ এটা অংশ ক’লা বজাৰ আৰু ড্ৰাগছ সৰবৰাহৰ জৰিয়তেও লাভ কৰে ।

পাকিস্তানী সন্ত্ৰাসবাদীয়ে কিমান দৰমহা পায় ?

লস্কৰৰ পৰা জৈছলৈকে সকলোৰে দৰমহাৰ গাঁথনি বেলেগ বেলেগ । কিন্তু উদ্দেশ্য একেই । সেয়া হৈছে ভাৰতৰ লোকচান সাধন । বিজনেছ টুডেৰ এক প্ৰতিবেদন অনুসৰি যিসকল নিম্নস্তৰৰ সন্ত্ৰাসবাদী, অৰ্থাৎ কোনো লক্ষ্য স্থানত গুলীচালনা কৰা, বোমা নিক্ষেপ কৰা, এনে কাম কৰাৰ বাবে তেওঁলোকৰ গড় দৰমহা পাকিস্তানী মুদ্ৰাত প্ৰতিমাহে ১২ হাজাৰ টকা । আনহাতে যিসকল সেনাপতি পৰ্যায়ত আছে, অৰ্থাৎ সন্ত্ৰাসবাদী অভিযানৰ নেতৃত্ব দিয়ে আৰু ষড়যন্ত্ৰৰ পৰিকল্পনা কৰে তেওঁলোকৰ মাহিলী আয় প্ৰায় ৫০ হাজাৰ টকা ।

আনহাতে ভাৰতৰ কাশ্মীৰ উপত্যকাৰ পৰা গৈ যিসকলে সন্ত্ৰাসবাদত জড়িত হয়, তেওঁলোকৰ দৰমহা পাকিস্তানী সন্ত্ৰাসবাদীৰ তুলনাত কিছু বেছি, প্ৰতিমাহে ২০ হাজাৰ টকা । অৱশ্যে সন্ত্ৰাসবাদীৰ মাহিলী দৰমহাৰ উপৰিও তেওঁলোকৰ পৰিয়ালক ২ লাখ টকাকৈ ভাট্টা প্ৰদান কৰা হয় । এইদৰেই চলি আছে মানৱ সমাজক পংগু কৰিব খোজা সন্ত্ৰাসবাদীৰ ঘাটিসমূহ ।