ক্ৰিকেট মেচত ব্যৱহাৰ কৰা কেমেৰাবোৰৰ কোনটোৰ কাম কি, এইবোৰৰ দাম কিমান, জানো আহক

সময়ৰ লগে লগে সলনি হয় সকলো । সলনি হৈছে ক্ৰিকেটৰো ৰেহ-ৰূপ । ক’লা-বগা ছবিৰ পৰা ৰঙীণ দৃশ্যলৈ, নানা মুহূৰ্তৰ জীৱন্ত ছবি কেপচাৰ কৰে কেমেৰাই । তেনেদৰে খেলখনৰ স্বচ্ছতা বজাই ৰখাও গুৰুত্বপূৰ্ণ । দৰ্শকক ক্ৰিকেট মেচৰ সমস্ত তথ্য, মুহূৰ্ত যোগান ধৰাৰ ক্ষেত্ৰত কেমেৰাৰ ভূমিকা গুৰুত্বপূৰ্ণ । সম্প্ৰচাৰ, আম্পায়াৰৰ সিদ্ধান্তৰ পৰা আৰম্ভ কৰি স্ক্ৰীণত জিলিকি উঠে প্ৰতিটো মুহূৰ্ত । প্ৰতিখন মেচক জীৱন্ত কৰে কেমেৰাই । এইবাৰ যিদৰে আই পি এলত ব্যৱহাৰ কৰা হৈছে ৰবট-কুকুৰ ।

আই পি এলৰ এখন মেচ সম্প্ৰচাৰৰ বাবে প্ৰায় ৩০-৪০ টা কেমেৰা ব্যৱহাৰ কৰা হয় । ইয়াৰ বাবে নিয়োজিত থাকে প্ৰায় ৭০০ দক্ষ কৰ্মী । লগতে থাকে প্ৰডাকচন কন্ট্ৰল ৰূম । ইয়াৰ পৰাই মেচ সম্প্ৰচাৰ পৰিচালিত হয় । ২০২৪ চনত জিঅ’ চিনেমাই ধোনী, কোহলীৰ দৰে ক্ৰিকেট তাৰকাৰ অনুৰাগীৰ বাবে পৃথকে কেমেৰা ইনষ্টল কৰিছিল । আই পি এলৰ দৰে এখন টুৰ্ণামেন্টত কি কি কেমেৰা ব্যৱহাৰ কৰা হয়, ইয়াৰ দাম কিমান, এইবোৰ সঠিক তথ্য লাভ কৰাতো সহজ নহয় । কিন্তু যি তথ্য পোৱা গৈছে, সেয়া জানো আহক ।

প্ৰথমে কওঁ হেলমেট কেমেৰাৰ কথা । সম্প্ৰচাৰৰ বাবে ব্যৱহাৰ কৰা এই কেমেৰাৰ ওজন ১০০ গ্ৰামৰো কম । ইয়াৰ দাম ১ ৰ পৰা ৩ লাখ টকা পৰ্যন্ত । প্ৰথমে কেৱল অনফিল্ড আম্পায়াৰে ব্যৱহাৰ কৰিছিল এই কেমেৰা । বৰ্তমান খেলুৱৈসকলেও ইয়াক ব্যৱহাৰ কৰে । আম্পায়াৰৰ সৈতে ক্ৰিকেটাৰৰ কথা-বাৰ্তা, কেতিয়াবা আলোচনাত উত্তেজনাৰ সৃষ্টি হ’লে সেই অভিব্যক্তি কেমেৰাত ধৰা পৰে । লগতে বেটাৰৰ কেমেৰাৰ পৰা কোনো শ্বটৰ নিখুঁত ভিজুৱেল পোৱা যায় ।

তাৰ পাছত আহোঁ ষ্টাম্প কেমেৰাৰ কথালৈ । মিডল ষ্টাম্পত এই কেমেৰা সংযোগ কৰা হয় । ইয়াৰ দাম ৩ ৰ পৰা ৫ লাখ টকা । বহু সময়ত ষ্টাম্পিঙৰ ক্ষেত্ৰত ক্ল’জ কল দেখা যায় । ছাইড এংগলৰ পৰা যিটো নিশ্চিত কৰিব পৰা নাযায় । সেই ক্ষেত্ৰত এই কেমেৰাই সঠিক ভিজুৱেল যোগান ধৰাত সহায় কৰে । লগতে ষ্টাম্প মাইকো থাকে । বেটত বল লাগিলে খুব কম প্ৰাবল্যৰ শব্দও ৰেকৰ্ড হয় এই মাইকত । কট বিহাইণ্ড বা লেগ বিফ’ৰৰ ক্ষেত্ৰত ই খুবেই জৰুৰী । এই মাইকত কীপাৰ, বেটাৰৰ কথা-বাৰ্তাও শুনা যায় । ষ্টাম্পৰ পিছত ঋষভ পন্ট থাকিলে সেই ৰেকৰ্ড ৰসাল হৈ পৰে ।

ড্ৰোন কেমেৰাৰ বিষয়ে অৱশ্যে সকলোৱেই অলপ-অচৰপ জানে । বাৰ্ড আই ভিউ বা টপ ভিউ বুলি কোৱা হয় ইয়াক । সম্পূৰ্ণ ষ্টেডিয়াম অথবা গেলাৰীৰ নানা দৃশ্য বন্দী কৰে এই কেমেৰাই । খেল উপভোগৰ ৰোমাঞ্চ ই বৃদ্ধি কৰে । পিচৰ লগতে সম্পূৰ্ণ খেলপথাৰৰ দৃশ্য ই দেখুৱায় । কোনো কেচৰ ক্ষেত্ৰত সন্দেহ থাকিলে থাৰ্ড আম্পায়াৰক সিদ্ধান্ত লোৱাত ই সহায় কৰে । ইয়াৰ দাম প্ৰায় ৫ ৰ পৰা ২০ লাখ টকা ।

থাৰ্ড আম্পায়াৰ কেমেৰা বা ৰেফাৰী কেমেৰাও খেলত ব্যৱহাৰ হয় । ডিআৰএছৰ ক্ষেত্ৰত নিজৰ প্ৰয়োজন অনুসৰি ভিজুৱেল প্ৰত্যক্ষ কৰে থাৰ্ড আম্পায়াৰে । এই কেমেৰাৰ উন্নত প্ৰযুক্তিয়ে নিখুঁত সিদ্ধান্ত লোৱাৰ ক্ষেত্ৰত সহায় কৰে । এই কেমেৰাসমূহৰ দাম ১০ ৰ পৰা ২৫ লাখ টকাৰ ভিতৰত । লেগ বিফৰ সিদ্ধান্তৰ ক্ষেত্ৰত বল ট্ৰেকিং খুবেই গুৰুত্বপূৰ্ণ । থাৰ্ড আম্পায়াৰে যাতে নিৰপেক্ষ তথা সঠিক সিদ্ধান্ত ল’ব পাৰে, তাৰ বাবে এই কেমেৰা ব্যৱহাৰ কৰা হয় ।

আমি সদায় এখন গাড়ীৰ দৰে কেমেৰা খেলপথাৰৰ বাউণ্ডেৰী লাইনৰ কাষত বা বাউণ্ডেৰীৰ ভিতৰতো কেতিয়াবা দেখাপাওঁ । ইয়াক বাগি কেমেৰা বুলি কোৱা হয় । ৰিম’ৰ্টৰ দ্বাৰা এই কেমেৰা অপাৰেট কৰা হয় । খেলপথাৰৰ যিকোনো দিশৰ ভিজুৱেল ই কেপচাৰ কৰে । সাধাৰণতে বাউণ্ডীৰ লাইনৰ কাষত ইয়াক ব্যৱহাৰ কৰা হয় । এই কেমেৰাৰ দাম প্ৰায় ২ কোটি টকা । খেলুৱৈয়ে খেলপথাৰত প্ৰৱেশ কৰা, বাউণ্ডেৰী লাইনৰ কাষত, গ্ৰাউণ্ড ফিল্ডিং আৰু খেলৰ নানা দৃশ্য ই কেপচাৰ কৰে । বাউণ্ডেৰীৰ গুৰুত্বপূৰ্ণ সিদ্ধান্ত লোৱাৰ ক্ষেত্ৰত এই কেমেৰাৰ ভিজুৱেলৰ সহায় লোৱা হয় ।

কোনো এটা বিশেষ মুহূৰ্ত শ্ল’ মোশনত দেখি খুব ভাল লাগে । সেয়া এটা সুন্দৰ ষ্টাম্পিং হ’ব পাৰে বা দুৰ্দান্ত ফিল্ডিং হ’ব পাৰে । ইয়াৰ বাবে হাইস্পীড কেমেৰা ব্যৱহাৰ কৰা হয় । খেলপথাৰত তীব্ৰ গতিৰ প্ৰতি মুহূৰ্ত কেপচাৰ কৰাটো কঠিন । কিন্তু হাইস্পীড কেমেৰাই সেই কাম কৰে । পাছত সেই মুহূৰ্তসমূহ শ্ল’ মোশনত আৰু সুন্দৰকৈ দেখুওৱা হয় । এনে কেমেৰাৰ দাম ১ ৰ পৰা ২ কোটি টকা হয় ।

স্পাইডাৰকেম, হয়তো আপুনি ভাবিব পাৰে এই নামটো কিয় দিয়া হ’ল । মকৰাৰ জালৰ দৰেই দেখা যায় ইয়াৰ সম্পূৰ্ণ ছেটআপ । খেলপথাৰত ফ্লাড লাইটৰ খুঁটাৰ সৈতে ইয়াৰ তাঁৰসমূহ বন্ধা থাকে । বহু উচ্চতাৰ পৰা ভিজুৱেল কেপচাৰ কৰে ই । প্ৰয়োজনত তললৈ নমাই আনিব পাৰি । টাইম আউটৰ সময়ত বহুক্ষেত্ৰত খেলুৱৈৰ ক্ল’জআপ শ্বট দেখা যায় । বহু খেলুৱৈয়ে স্পাইডাৰকেমৰ সমুখত ধেমালিৰে অংগী-ভংগী দেখুওৱা পৰিলক্ষিত হয় ।

ক্ৰিকেটৰ সৈতে যে বিনোদনো থাকে, তাৰ অন্যতম দৃশ্য দেখা যায় স্পাউডাৰ কেমেৰাত । ক্ৰিকেট সম্প্ৰচাৰৰ বাবে ব্যৱহৃত অন্যতম দামী কেমেৰাৰ ভিতৰত স্পাইডাৰকেমো এটা । এনেকুৱা এটা কেমেৰা ছেটআপ আৰু পৰিচালনাৰ বাবে প্ৰায় ৫ ৰ পৰা ১০ কোটি টকা খৰচ হয় । ইয়াৰ দ্বাৰা ক্ৰিকেট অধিক মনোগ্ৰাহীও হয় ।

প্ৰতিবেদক: দীপাংকৰ ঘোষাল, ছিনিয়ৰ ছাব এডিটৰ, TV9-বাংলা