গাংগুলীৰ সৈতে সংঘাতৰ পাছতেই আৰম্ভ হৈছিল কোহলীৰ কেৰিয়াৰৰ বেয়া সময়!

সৌৰভ গাংগুলী আৰু বিৰাট কোহলী

ভাৰতৰ তাৰকা বেটছমেন বিৰাট কোহলীয়ে ২০১১ চনত টেষ্ট ক্ৰিকেটত প্ৰৱেশ কৰিছিল । ১৪ বছৰ এই ফৰ্মেটত খেলাৰ পাছত তেওঁ যোৱা ১২ মে’ত হঠাতে অৱসৰ গ্ৰহণ কৰে দীঘলীয়া ফৰ্মেটৰ পৰা । টেষ্টত ইমান সফল বেটছমেন আৰু অধিনায়ক হোৱাৰ পাছতো এই ফৰ্মেট এৰি যোৱাৰ হঠাৎ সিদ্ধান্তই সকলোকে আচৰিত কৰিছে । ইংলেণ্ডৰ দৰে গুৰুত্বপূৰ্ণ ভ্ৰমণৰ পূৰ্বে অৱসৰ লোৱাৰ সিদ্ধান্তই বহু প্ৰশ্ন উত্থাপন কৰিছে । বহু বিশেষজ্ঞই বিগত ৪-৫ বছৰত তেওঁৰ দুৰ্বল ফৰ্মৰ উদাহৰণ দাঙি ধৰিছে ।

কিন্তু তেওঁৰ কেৰিয়াৰৰ বেয়া দিনবোৰ আচলতে কেতিয়াৰ পৰা আৰম্ভ হৈছিল জানেনে ? ইয়াৰ উত্তৰ, সৌৰভ গাংগুলীৰ সৈতে হোৱা কাজিয়াৰ ঠিক পিছত । ২০২১ চনত গাংগুলী বি চি চি আইৰ সভাপতি আছিল । তাৰ পিছত তেওঁৰ আৰু কোহলীৰ মাজত বিভাজন ঘটিল । একে সময়তে কোহলিয়ে অধিনায়কত্ব হেৰুৱায় আৰু তেওঁৰ কেৰিয়াৰৰ গ্ৰাফ নামি আহে । এতিয়া তেওঁ অৱসৰ ল’ব লগা হ’ল । এই যুঁজখনৰ পিছত কোহলীৰ কেৰিয়াৰত কি কি পৰিৱৰ্তন আহিল জানো আহক-

সংঘাতৰ পূৰ্বে চলিছিল কোহলীৰ আধিপত্য
গাংগুলীৰ সৈতে যুঁজৰ পূৰ্বে বিৰাট কোহলীয়ে ক্ৰিকেট জগতখনত আধিপত্য চলাইছিল । প্ৰতিটো ফৰ্মেটতে তেওঁ আধিপত্য বিস্তাৰ কৰিছিল । এতিয়া আমি কেৱল টেষ্ট ক্ৰিকেটৰ কথাহে ক’ম । এম এছ ধোনীয়ে টেষ্ট ক্ৰিকেটৰ পৰা অৱসৰ লোৱাৰ পিছত ২০১৪ চনত অষ্ট্ৰেলিয়া ভ্ৰমণৰ সময়ত তেওঁ অধিনায়কত্ব লাভ কৰিছিল । ইয়াৰ পাছত কোহলীয়ে অধিনায়ক হিচাপে উজ্জ্বল প্ৰদৰ্শন আগবঢ়ায় । ২০১৯ চনৰ পৰা তেওঁ টেষ্ট ক্ৰিকেটত ৰাজত্ব কৰে । বিধ্বংসী বেটিঙেৰে ৰাণৰ পাহাৰ গঢ়ে কোহলীয়ে । অষ্ট্ৰেলিয়া হওক, ইংলেণ্ড হওক, দক্ষিণ আফ্ৰিকা হওক, ৱেষ্ট ইণ্ডিজ হওক বা বাংলাদেশ হওক, কোহলীয়ে প্ৰতিটো দলৰ বিৰুদ্ধে ৰান সংগ্ৰহ কৰিছিল । ২০১৬ চনৰ পৰা ২০১৯ চনলৈ টেষ্ট মেচত ৭টা দ্বি-শতক অৰ্জন কৰিছিল এইগৰাকী বেটাৰে ।

কোহলীয়ে ৱেষ্ট ইণ্ডিজৰ বিৰুদ্ধে ২০০, বাংলাদেশৰ বিৰুদ্ধে ২০৪, নিউজিলেণ্ডৰ বিৰুদ্ধে ২১১, শ্ৰীলংকাৰ বিৰুদ্ধে ২১৩, ইংলেণ্ডৰ বিৰুদ্ধে ২৩৫, শ্ৰীলংকাৰ বিৰুদ্ধে ২৪৩ আৰু দক্ষিণ আফ্ৰিকাৰ বিৰুদ্ধে ২৫৪ ৰান সংগ্ৰহ কৰে । অধিনায়কত্বৰ সময়ছোৱাত তেওঁ ঘৰুৱা ক্ষেত্ৰত এখনো টেষ্ট শৃংখলা পৰাস্ত হোৱা নাছিল । বিদেশৰ মাটিত অষ্ট্ৰেলিয়াক পৰাস্ত কৰিছিল । ইংলেণ্ড আৰু দক্ষিণ আফ্ৰিকাক ঘৰুৱা চোতালত কঠিন প্ৰত্যাহ্বান জনায় । কোহলীয়ে ৬৮খন টেষ্ট মেচত অধিনায়কত্ব কৰি ৪০খন জয় আৰু মাত্ৰ ১৭খন খেলত পৰাস্ত হয় । ইয়াৰ বিপৰীতে ১১খন মেচত ড্ৰ’ হয় । ভাৰতৰ এজন সফল টেষ্ট অধিনায়ক আছিল আৰু সফল বেটছমেনৰ ভিতৰতো গণ্য কৰা হৈছিল । কিন্তু ২০২১ চনত সকলো সলনি হ’বলৈ ধৰিলে ।

গাংগুলীৰ সৈতে হোৱা সংঘাতৰ সম্পূৰ্ণ কাহিনী
২০১৯ চনৰ অক্টোবৰ মাহত সৌৰভ গাংগুলী বিচিচিআইৰ সভাপতি হৈছিল । ২০২১ চনত টি-২০ বিশ্বকাপৰ পিছত বিৰাট কোহলীয়ে চাপৰ কাৰণে টি-২০ ফৰ্মেটৰ অধিনায়ক পদৰ পৰা পদত্যাগ কৰিছিল । কিন্তু তথাপিও তেওঁ এদিনীয়া আৰু টেষ্ট দলৰ অধিনায়কত্ব অব্যাহত ৰাখিব বিচাৰিছিল । গাংগুলীয়ে এই কথা ভাল নাপালে আৰু কেইসপ্তাহমানৰ পাছত ব’ৰ্ডে ৰোহিত শৰ্মাক এদিনীয়াল দলৰ অধিনায়ক হিচাপে নিযুক্তি দিয়ে । এই সময়ছোৱাত ব’ৰ্ডে ইয়াৰ কোনো কাৰণ নিদিলে । নতুন অধিনায়কৰ বিষয়ে তথ্য মাত্ৰ এটা শাৰীৰ বিবৃতি জাৰি কৰা হৈছিল ।

গাংগুলীয়ে দাবী কৰে যে তেওঁ বিৰাট কোহলীক অধিনায়কত্ব এৰি নিদিবলৈ বুজাইছিল । কিন্তু তেওঁ মান্তি নহ’ল । ব’ৰ্ডে দুজন বগা বলৰ অধিনায়ক ৰাখিব বিচৰা নাছিল । সেইবাবেই এই সিদ্ধান্ত লোৱা হ’ল । কিন্তু ২০২১ চনৰ ডিচেম্বৰ মাহত কোহলীয়ে পোনপটীয়াকৈ গাংগুলীৰ দাবী নাকচ কৰিছিল । ইয়াতকৈও আচৰিত ধৰণৰ কথা প্ৰকাশ কৰিলে কোহলীয়ে । তেওঁ কয় যে টেষ্ট দল নিৰ্বাচনৰ মাত্ৰ ৯০ মিনিট পূৰ্বে তেওঁক এদিনীয়া দলৰ অধিনায়ক পদৰ পৰা অপসাৰণৰ বিষয়ে অৱগত কৰা হৈছিল ।

বাতৰিটোত দাবী কৰা হৈছে যে সংবাদ মাধ্যমত এই কথাবোৰ মুকলিকৈ কোৱাত গাংগুলী আৰু ব’ৰ্ড বিচলিত হৈ পৰিছিল । ইয়াৰ পিছতে দক্ষিণ আফ্ৰিকাত টেষ্ট শৃংখলাত টিম ইণ্ডিয়া পৰাস্ত হয়, তাৰ পিছত কোহলীয়ে টেষ্ট দলৰ অধিনায়কত্বও এৰি দিয়ে । ৫ মাহৰ ভিতৰত তিনিওটা ফৰ্মেটৰ পৰাই অধিনায়কত্ব হেৰুৱাবলগীয়া হ’ল । সভাপতি পদৰ পৰা পদত্যাগ কৰাৰ পিছত ২০২৩ চনৰ আই পি এলতো কোহলী আৰু গাংগুলীৰ মাজত বিবাদৰ খবৰ ওলাইছিল । মেচৰ পিছৰ উপস্থাপনৰ সময়ত তেওঁ গাংগুলীক আওকাণ কৰিছিল । দুয়োজনে ইনষ্টাগ্ৰামতো আনফ’ল’ কৰিছিল ।

সংঘাতৰ পিছত নিম্নগামী হৈছিল গ্ৰাফ
২০২১ চনত টি-২০ বিশ্বকাপৰ লগে লগে কোহলীৰ কেৰিয়াৰ নিম্নগামী হ’বলৈ আৰম্ভ কৰে । পৰৱৰ্তী ৪ বছৰত তেওঁ মাত্ৰ ৪টা শতকহে কৰিব পাৰিছিল । ২০২১ চনৰ পিছত ২০২৫ চনৰ জানুৱাৰীলৈকে ৩৫খন টেষ্টত গড়ে ৩২.৫৬ ৰানেৰে মাত্ৰ ১৮৮৯ ৰান সংগ্ৰহ কৰিবলৈ সক্ষম হৈছিল ।