১৭ ডিচেম্বৰৰ পৰা মিজোৰামত প্ৰ’ পাঞ্জা লীগ মেচ, অংশগ্ৰহণ কৰিব অসমৰ তিনি গৰাকী খেলুৱৈয়ে…

প্ৰ' পাঞ্জা লীগ

অসমৰ তিনিগৰাকী খেলুৱৈয়ে অহা ১৭ ডিচেম্বৰত মিজোৰামত অনুষ্ঠিত হ’বলগীয়া প্ৰ’ পাঞ্জা লীগত অংশগ্ৰহণ কৰিব ৷ খেলুৱৈ তিনিগৰাকী হ’ল নিলয় শংকৰ, ঈশান কাশ্যপ আৰু ত্ৰিদীপ মেধি ৷ উল্লেখ্য যে, মিজোৰামৰ শীতকালীন উৎসৱৰ লগত সংগতি ৰাখি এই বছৰ নতুন পৰিকল্পনাৰে অসম ৰাইফলছৰ খেলপথাৰত প্ৰ’ পাঞ্জা লীগৰ মুঠ পাঁচখন মেচ অনুষ্ঠিত হ’ব ৷ অসমৰ লগতে মিজোৰাম আৰু কাজাখস্তানৰ খেলুৱৈয়েও প্ৰ’ পাঞ্জাৰ মেচত অংশগ্ৰহণ কৰিব ৷

ইতিমধ্যে ঘোষণা কৰা সূচী অনুসৰি, অসমৰ নিলয়ে মিজোৰামৰ বনলাল্লুৰাৰ বিৰুদ্ধে খেলাৰ বিপৰীতে ঈশান কাশ্যপে মিজোৰামৰ কিমকিমাৰ মুখামুখি হ’ব ৷ ইফালে, মিজোৰামৰ ৰেমণ্ডৰ বিৰুদ্ধে খেলিব অসমৰ ত্ৰিদীপ মেধিয়ে ৷ আনহাতে, কাজাখস্তানৰ বেকজান ৰামিয়ানোভৰ বিৰুদ্ধে মিজোৰামৰ লালনুনপুয়ই তথা কাজাখস্তানৰ আছানালি নুৰমাগাম্বেটৰ বিৰুদ্ধে খেলিব মিজোৰামৰ ডেনিক লালৰুয়াটলুয়াংগেই৷

মিজোৰামৰ ক্ৰীড়া আৰু যুৱ বিভাগ, মিজোৰাম ক্ৰীড়া পৰিষদ আৰু মিজোৰাম পৰ্যটন মন্ত্ৰালয়ৰ সহযোগত হ’ব লগা এই অনুষ্ঠানৰ সময়তে ২০২৫ চনত হবলগীয়া উত্তৰ-পূব প্ৰ’ প্ৰাঞ্জা চেম্পিয়নশ্বিপৰ সূচীও আনুষ্ঠানিকভাৱে ঘোষণা কৰিব ৷ উল্লেখ্য যে, উত্তৰ-পূবৰ আঠ ৰাজ্যৰ খেলুৱৈক পেছাদাৰী পাঞ্জা লীগত খেলাৰ সুযোগ দিয়াৰ লক্ষ্যৰে এই চেম্পিয়নশ্বিপ অনুষ্ঠিত হ’ব৷

এই সন্দৰ্ভত প্ৰ’ পাঞ্জা লীগৰ সহ-প্ৰতিষ্ঠাপক পাৰভিন ডাবাছে কয়, ‘অসম আৰু উত্তৰ-পূবৰ অন্যান্য অঞ্চলত পাঞ্জা খেলে ক্ৰীড়াপ্ৰেমীৰ সঁহাৰি লাভ কৰাত আমি আনন্দিত হৈছো ৷ আমি শীতকালীন উৎসৱৰ অংশ হ’বলৈ পায়ো উৎফুল্লিত হৈছো ৷ প্ৰ’ পাঞ্জা লীগে মিজোৰামত আৰ্ম ৰেছলিং খেলৰ নৱ উত্থান নিশ্চিত কৰিব ৷’ ১৭ ডিচেম্বৰৰ জোনেট এপ আৰু ৱেবছাইটত সন্ধিয়া ৭ বজাৰ পৰা এই অনুষ্ঠানটো লাইভ ষ্ট্ৰীম কৰা হ’ব।