মাত্ৰ এটা বা দুটা নহয়, ১১ টাকৈ কৃতিত্ব অৰ্জনৰ সুযোগ হিটমেন ৰোহিতৰ হাতত
দক্ষিণ আফ্ৰিকাৰ বিপক্ষে শৃংখলাত ৰোহিতৰ পৰা উন্নত প্ৰদৰ্শনৰ আশা প্ৰকাশ কৰিছে দল তথা অনুৰাগীয়ে। লক্ষণীয়ভাৱে এই শৃংখলাটোত ৰোহিতে ৫টা অভিলেখ আৰু ১১টা বিশেষ কৃতিত্ব অৰ্জনৰ সুযোগ পাব। যদি আজি ক্ৰীজত খোপনি পুতিব পাৰে, ৰাঁচীতে এয়া সম্ভৱ কৰি তুলিব পাৰে তাৰকা ক্ৰিকেটাৰগৰাকীয়ে।
ৰোহিত শৰ্মা
আজি ভাৰত আৰু দক্ষিণ আফ্ৰিকাৰ মাজত অনুষ্ঠিত হ’ব এদিনীয়া শৃংখলাৰ দ্বিতীয়খন মেচ। ৰাঁচীত হ’বলগা এই মেচখনত পুনৰবাৰ ভাৰতীয় দলৰ জাৰ্চি পৰিধান কৰি খেলপথাৰত নামিব ৰোহিত শৰ্মা। বিশ্বৰ শীৰ্ষস্থানৰ এদিনীয়া বেটাৰ ৰোহিতৰ ওপৰত আজি বহুলাংশে নিৰ্ভৰ কৰিব ভাৰতীয় দলৰ বেটিং শক্তি। অষ্ট্ৰেলিয়াৰ বিপক্ষে বিগত এদিনীয়া শৃংখলাৰ জৰিয়তে দীৰ্ঘদিনৰ পিছত ভাৰতীয় দললৈ প্ৰত্যাৱৰ্তন ঘটাইছিল ৰোহিতে। উক্ত শৃংখলাটোত প্ৰথম মেচত ব্যৰ্থ হ’লেও পৰৱৰ্তী দুয়োখন মেচত উজ্জীৱিত প্ৰদৰ্শন দাঙি ধৰিছিল ৰোহিতে।
এতিয়া দক্ষিণ আফ্ৰিকাৰ বিপক্ষে এই শৃংখলাতো ৰোহিতৰ পৰা উন্নত প্ৰদৰ্শনৰ আশা প্ৰকাশ কৰিছে দল তথা অনুৰাগীয়ে। লক্ষণীয়ভাৱে এই শৃংখলাটোত ৰোহিতে ৫টা অভিলেখ আৰু ১১টা বিশেষ কৃতিত্ব অৰ্জনৰ সুযোগ পাব। যদি আজি ক্ৰীজত খোপনি পুতিব পাৰে, ৰাঁচীতে এয়া সম্ভৱ কৰি তুলিব পাৰে তাৰকা ক্ৰিকেটাৰগৰাকীয়ে।
চাওক ৰোহিতৰ হাতত থকা কৃতিত্ব অৰ্জনৰ সুযোগসমূহ-
- এদিনীয়া ফৰ্মেটত সৰ্বাধিক ছয় কোবোৱা বেটাৰৰ অভিলেখৰ বাবে ৰোহিতক মাত্ৰ ৩টা ছয়ৰ প্ৰয়োজন। সম্প্ৰতি শীৰ্ষত থকা শ্বাহিদ আফ্ৰিদীৰ নামত ৩৫১টা ছয়ৰ অভিলেখৰ বিপৰীতে ৰোহিতে কোবাইছে ৩৪৯টা ছয়।
- আন্তঃৰাষ্ট্ৰীয় ক্ৰিকেটত দক্ষিণ আফ্ৰিকাৰ বিৰুদ্ধে সৰ্বাধিক ছয়ৰ অভিলেখ গঢ়াৰো সুযোগ পাব ৰোহিতে। এইক্ষেত্ৰত তেওঁক প্ৰয়োজন আৰু মাত্ৰ ৭টা ছয়ৰ।
- ২০ হাজাৰ আন্তঃৰাষ্ট্ৰীয় ৰান সম্পূৰ্ণ কৰিবলৈ ৰোহিতক আৰু মাত্ৰ ৯৮ ৰানৰ প্ৰয়োজন। বৰ্তমানলৈকে তেওঁ তিনিওটা ফৰ্মেটত মুঠ ১৯,৯০২ ৰান সংগ্ৰহ কৰিছে।
- ভাৰতীয় অ’পেনাৰ হিচাপে সৰ্বাধিক শতক অৰ্জন কৰিবলৈ ৰোহিতক এটা শতকৰ প্ৰয়োজন। ৰোহিত শৰ্মাই এদিনীয়া মেচত অ’পেনাৰ হিচাপে ৩২টা শতক অৰ্জন কৰিছে।
- এদিনীয়াত সৰ্বাধিক ছয় কোবোৱা অ’পেনাৰৰ অভিলেখৰ বাবে ৰোহিতক প্ৰয়োজন ৩টা ছয়। ক্ৰীছ গেইলৰ ৩৩৮টা ছয়ৰ অভিলেখৰ বিপৰীতে ৰোহিতৰ নামত আছে ৩৩৬টা ছয়।
- দক্ষিণ আফ্ৰিকাৰ বিৰুদ্ধে ভাৰতীয় অ’পেনাৰ হিচাপে সৰ্বাধিক ৰান সংগ্ৰহৰ বাবে ৰোহিত শৰ্মাক ১১৫ ৰানৰ প্ৰয়োজন।
- দক্ষিণ আফ্ৰিকাৰ বিৰুদ্ধে ২০০০ ৰান কৰিবলৈ ৰোহিত শৰ্মাক ২৭ ৰানৰ প্ৰয়োজন। দলটোৰ বিৰুদ্ধে ৰোহিতে এইপৰ্যন্ত ১৯৭৩ ৰান সংগ্ৰহ কৰিছে।
- ভাৰতত ৫০০০ এদিনীয়া ৰান সম্পূৰ্ণ কৰিবলৈ ৰোহিত শৰ্মাক ১৩৩ ৰানৰ প্ৰয়োজন। এই কৃতিত্ব অৰ্জন কৰা তেওঁ মাত্ৰ তৃতীয় ভাৰতীয় হ’ব।
- জয়ী মেচত ১২ হাজাৰ ৰান সম্পূৰ্ণ কৰিবলৈ ৰোহিতক প্ৰয়োজন ৩০ ৰানৰ। এই কৃতিত্ব অৰ্জন কৰা তেওঁ হ’ব প্ৰথম এছিয়ান অ’পেনাৰ।
- SENA দেশ (দক্ষিণ আফ্ৰিকা, ইংলেণ্ড, নিউজিলেণ্ড, অষ্ট্ৰেলিয়া)ৰ বিৰুদ্ধে ৫০০০ এদিনীয়া ৰান সংগ্ৰহ কৰিবলৈ মাত্ৰ ৩৬ ৰানৰ প্ৰয়োজন ৰোহিতক।
- আন্তঃৰাষ্ট্ৰীয় ক্ৰিকেটত অ’পেনাৰ হিচাপে ১৫,৭৮৭ ৰান সংগ্ৰহ কৰিছে ৰোহিতে। অ’পেনাৰ হিচাপে ১৬,০০০ ৰান লাভ কৰিবলৈ তেওঁক আৰু ২১৩ ৰানৰ প্ৰয়োজন।