আজি ৰাঁচীত প্ৰথম এদিনীয়া, ভাৰতীয় অনুৰাগীৰ ব্যথা দূৰ কৰিব পাৰিবনে ৰোকো যুটিয়ে!

বিৰাট আৰু ৰোহিতৰ ওপৰত আজি থাকিব দৃষ্টি

দক্ষিণ আফ্ৰিকাৰ বিৰুদ্ধে দুখন মেচৰ টেষ্ট শৃংখলাত শোচনীয়ভাৱে ক্লীন ছুইপ হ’ল ভাৰতীয় দল। সম্পূৰ্ণ নিৰাশাজনক প্ৰদৰ্শনেৰে শৃংখলাটোত প্ৰটিয়াছ বাহিনীৰ সমুখত ভাৰতীয় দলে একপ্ৰকাৰে আত্মসমৰ্পণ কৰিবলৈ বাধ্য হয়। ঘৰৰ মাটিতে দলৰ এনে শোচনীয় পৰাজয়ক সহজভাৱে ল’ব পৰা নাই অনুৰাগীসকলে। পৰাজয়ৰ ব্যথাৰ সমান্তৰালকৈ ক্ৰিকেটপ্ৰেমীসকলে ভাৰতীয় দল তথা মেনেজমেণ্টক কঠোৰ সমালোচনাৰ লক্ষ্য কৰি লৈছে। তাৰ মাজতে আজিৰ পৰা দক্ষিণ আফ্ৰিকাৰ বিপক্ষে এদিনীয়া শৃংখলাৰ বাবে সাজু হৈছে ভাৰতীয় দল।

আজি ৰাঁচীত অনুষ্ঠিত হ’ব এই তিনিখনীয়া মেচৰ শৃংখলাৰ প্ৰথমখন মেচ। টেষ্ট শৃংখলাৰ ফলাফলৰ পিছত ভাৰতীয় অনুৰাগীসকল অত্যন্ত হতাশ যদিও কিছু উৎসুকতাও পৰিলক্ষিত হৈছে। এই উৎসুকতাৰ কাৰণ হৈ পৰিছে দুই প্ৰিয় তাৰকা বিৰাট কোহলী আৰু ৰোহিত শৰ্মাৰ প্ৰত্যাৱৰ্তন। ৰোকো যুটিক খেলপথাৰত চাবলৈ অত্যন্ত আশাৰে বাট চাইছে অনুৰাগীসকলে।

ৰোকো যুটিৰ প্ৰত্যাৱৰ্তন

দীৰ্ঘসময়ৰ বিৰতিৰ পিছত দুয়োগৰাকী তাৰকাই অষ্ট্ৰেলিয়াৰ বিপক্ষে শৃংখলাত প্ৰত্যাৱৰ্তন ঘটাইছিল। অপেনাৰৰ ভূমিকাত ৰোহিত প্ৰথম মেচত ব্যৰ্থ হৈছিল যদিও দ্বিতীয় মেচত এক যুঁজাৰু অৰ্ধশতক আৰু তৃতীয় তথা অন্তিম মেচত অপৰাজিত শতক অৰ্জন কৰিছিল। আনহাতে প্ৰথম দুয়োখন মেচতে শূন্যতে আউট হোৱা কোহলীয়ে অন্তিম মেচত খেলিছিল অৰ্ধশতকীয় ইনিংছ।

উক্ত শৃংখলাৰ অন্তিম মেচত ‘ৰোকো’ যুটিয়ে অপৰাজিত থাকি ভাৰতীয় দলক জয়ী কৰোৱাৰ লগতে অনুৰাগীৰো মন জয় কৰিছিল। এতিয়া দক্ষিণ আফ্ৰিকাৰ বিৰুদ্ধেও দুই প্ৰিয় তাৰকাৰ পৰা এনে প্ৰদৰ্শন আশা কৰিব দল তথা অনুৰাগীয়ে। অৱশ্যে ইয়াৰ সমান্তৰালকৈ দলৰ আন সদস্যসকলৰ প্ৰদৰ্শনো হ’ব লক্ষণীয়। বিশেষকৈ দৃষ্টি থাকিব অধিনায়ক ৰাহুলৰ ওপৰত।

মূল একাদশত কোন কোন!

আঘাতৰ বাবে অধিনায়ক শুভমন গিল আৰু সহ-অধিনায়ক শ্ৰেয়স আয়াৰ দলৰ বাহিৰত থকাত এই শৃংখলাত নেতৃত্ব চম্ভালিব ৰাহুলে। গতিকে দীৰ্ঘসময়ৰ মূৰকত অধিনায়কৰ দায়িত্ব পোৱা ৰাহুলে নিজকে প্ৰমাণৰ সুযোগ পাব। ইফালে প্ৰায় দুবছৰৰ পিছত এদিনীয়া দললৈ উভতা ৰুতুৰাজ গায়কোৱাডে মূল দলত স্থান পাবনে, সেয়াও লক্ষণীয় হ’ব।

যদি ৰুতুৰাজে দলত স্থান পায়, তেওঁক বেটিং ক্ৰমৰ চতুৰ্থ স্থানত দেখা যাব পাৰে। আনহাতে ৰোহিতৰ সৈতে অপেনাৰৰ ভূমিকাত দেখা যাব পাৰে যশস্বী জয়ছোৱালক। মূল একাদশত ঋষভ পণ্টক অন্তৰ্ভুক্ত কৰা হ’বনে, সেয়া চাবলগা হ’ব। বলিঙৰ ক্ষেত্ৰত বুমৰাহ-চিৰাজৰ অনুপস্থিতিত অৰ্শদীপ সিং আৰু হৰ্ষিত ৰানাই পেচ আক্ৰমণ চলোৱাৰ সম্ভাৱনা অধিক।

তেনে পৰিস্থিতিত প্ৰসিধ কৃষ্ণই স্থান পোৱাৰ সম্ভাৱনা ক্ষীণ। আনহাতে দীৰ্ঘসময়ৰ মূৰত এদিনীয়া ফৰ্মেটলৈ উভতা অভিজ্ঞ অলৰাউণ্ডাৰ ৰবীন্দ্ৰ জাদেজাই কুলদীপ যাদৱৰ সৈতে স্পীন যুটি বান্ধিব পাৰে। প্ৰশিক্ষক গৌতম গম্ভীৰৰ ৰণনীতিলৈ লক্ষ্য কৰিলে ৱাশ্বিংটন সুন্দৰ আৰু নীতিশ কুমাৰ ৰেড্ডীয়ে মূল একাদশত সুযোগ পাব পাৰে।

আত্মবিশ্বাসী দক্ষিণ আফ্ৰিকা

ইফালে টেষ্ট শৃংখলা জয়ৰ পিছত স্বাভাৱিকতেই আত্মবিশ্বাসী হৈ খেলপথাৰত নামিব টেম্বা বাভুমা নেতৃত্বাধীন প্ৰটিয়াছ বাহিনী। অভিজ্ঞ কুইণ্টন ডে কুকৰ প্ৰত্যাৱৰ্তন দলটোৰ বাবে অন্যতম শক্তি হ’ব। সমান্তৰালকৈ টেষ্ট শৃংখলাত ভাৰতীয় দলৰ সমুখত ত্ৰাসৰ কাৰণ হৈ পৰা মাৰ্কো জেনচেনৰ পৰা এদিনীয়া শৃংখলাতো একে প্ৰদৰ্শন আশা কৰিব দলে।