ভোগেশ্বৰ বৰুৱা ৰাষ্ট্ৰীয় ক্ৰীড়া বঁটাৰ ট্ৰফী উন্মোচনঃ ৩ ছেপ্টেম্বৰত অনুষ্ঠিত হ’ব বঁটা প্ৰদান অনুষ্ঠান
অৰ্জুন ভোগেশ্বৰ বৰুৱাৰ জন্মদিন ৩ ছেপ্টেম্বৰ দিনটোত অসমত ইতিপূৰ্বৰে পৰা অভিৰুচি ক্ৰীড়া দিৱস হিচাপে উদযাপন কৰি অহা হৈছে। এতিয়া অহা ৩ ছেপ্টেম্বৰৰ দিনটোতে প্ৰথমবাৰৰ বাবে এই বঁটা প্ৰদান কৰা হ’ব। ভোগেশ্বৰ বৰুৱা ৰাষ্ট্ৰীয় ক্ৰীড়া বঁটা মুঠ ৬টা শিতানত প্ৰদান কৰা হ’ব।
এছিয়ান গেমছৰ স্বৰ্ণ জয়ী অসমৰ প্ৰথমগৰাকী ক্ৰীড়াবিদ তথা ৰাজ্যৰ কিংবদন্তি দৌৰবিদ ভোগেশ্বৰ বৰুৱালৈ অসম অলিম্পিক সন্থাৰ অনন্য সন্মান। ৰাজ্যৰ গৌৰৱ প্ৰাক্তন খেলুৱৈগৰাকীৰ সন্মানাৰ্থে অসম অলিম্পিক সন্থাই তেওঁৰ নামত ইতিপূৰ্বেই ৰাষ্ট্ৰীয় বঁটা প্ৰদানৰ সিদ্ধান্ত গ্ৰহণ কৰিছিল। বৃহস্পতিবাৰে গুৱাহাটীত এই ভোগেশ্বৰ বৰুৱা ৰাষ্ট্ৰীয় ক্ৰীড়া বঁটাৰ ট্ৰফী উন্মোচন কৰা হয়। ৰাজ্যৰ ক্ৰীড়া মন্ত্ৰী নন্দিতা গোৰ্লোছা আৰু তাৰকা বক্সাৰ অংকুশিতা বড়োৱে এই বঁটা উন্মোচন কৰে।
ভোগেশ্বৰ বৰুৱা ৰাষ্ট্ৰীয় ক্ৰীড়া বঁটা উন্মোচন কৰি ক্ৰীড়া মন্ত্ৰী নন্দিতা গোৰ্লোছাই এই বঁটাক ক্ৰীড়াৰ উন্নয়নৰ প্ৰতি অসমৰ দায়বদ্ধতাৰ এক খোজ বুলি অভিহিত কৰে। এনে পদক্ষেপে ভৱিষ্যত আগন্তুক প্ৰজন্মক অনুপ্ৰাণিত কৰিব বুলিও ৰাজ্যৰ ক্ৰীড়া মন্ত্ৰীগৰাকীয়ে মন্তব্য কৰে।
ইফালে অসম অলিম্পিক সন্থাৰ সাধাৰণ সম্পাদক লক্ষ্য কোঁৱৰে এই বঁটাই ভোগেশ্বৰ বৰুৱাৰ ক্ৰীড়া কেৰিয়াৰক সংজ্ঞায়িত কৰা কঠোৰ অধ্যৱসায় আৰু নিষ্ঠাৰ মনোভাৱক প্ৰতিফলিত কৰি তুলিছে বুলি মন্তব্য কৰে। অৰ্জুন ভোগেশ্বৰ বৰুৱাৰ সফলতাই ৰাজ্যৰ পৰৱৰ্তী প্ৰজন্মৰ খেলুৱৈসকলৰ বাবে পথ মুকলি কৰি দিছিল বুলি তেওঁ লগতে কয়।
অৰ্জুন ভোগেশ্বৰ বৰুৱাৰ জন্মদিন ৩ ছেপ্টেম্বৰ দিনটোত অসমত ইতিপূৰ্বৰে পৰা অভিৰুচি ক্ৰীড়া দিৱস হিচাপে উদযাপন কৰি অহা হৈছে। এতিয়া অহা ৩ ছেপ্টেম্বৰৰ দিনটোতে প্ৰথমবাৰৰ বাবে এই বঁটা প্ৰদান কৰা হ’ব। ভোগেশ্বৰ বৰুৱা ৰাষ্ট্ৰীয় ক্ৰীড়া বঁটা মুঠ ৬টা শিতানত প্ৰদান কৰা হ’ব।
ৰাষ্ট্ৰীয় আৰু ৰাজ্যিক পৰ্যায়ত ক্ৰমে বৰ্ষৰ শ্ৰেষ্ঠ ক্ৰীড়াবিদ, ক্ৰীড়াত জীৱনজোৰা সাধনা বঁটা আৰু উদীয়মান ক্ৰীড়া প্ৰতিভা বঁটা প্ৰদান কৰা হ’ব। ৰাষ্ট্ৰীয় বৰ্ষ শ্ৰেষ্ঠ ক্ৰীড়াবিদ বঁটাতৰ সৈতে ৫ লাখ টকা, ক্ৰীড়াত জীৱনজোৰা সাধনা বঁটাৰ সৈতে ৩ লাখ টকা আৰু উদীয়মান ক্ৰীড়া প্ৰতিভা বঁটাৰ সৈতে ২ লাখ টকা প্ৰদান কৰা হ’ব।
একেদৰে ৰাজ্যিক পৰ্যায়ত বৰ্ষ শ্ৰেষ্ঠ ক্ৰীড়াবিদ বঁটাতৰ সৈতে ৩ লাখ টকা, ক্ৰীড়াত জীৱনজোৰা সাধনা বঁটাৰ সৈতে ২ লাখ টকা আৰু উদীয়মান ক্ৰীড়া প্ৰতিভা বঁটাৰ সৈতে ১ লাখ টকা প্ৰদান কৰা হ’ব। অহা ৩ ছেপ্টেম্বৰত অনুষ্ঠিত হ’বলগীয়া উদ্বোধনী বঁটা প্ৰদান অনুষ্ঠানত পেৰিছ অলিম্পিকৰ দুটাকৈ পদকজয়ী মনু ভাকেৰো উপস্থিত থাকিব বুলি জানিবলৈ দিছে লক্ষ্য কোঁৱৰে।
লগতে দেশৰ কিংবদন্তি দৌৰবিদ পি.টি. উষাসহ আন কেইবাজনো বিশিষ্ট ব্যক্তি এই অনুষ্ঠানত থাকিব থাকিব বুলি অসম অলিম্পিক সন্থাই সদৰী কৰিছে। ইফালে অসম অলিম্পিক সন্থাই ভোগেশ্বৰ বৰুৱাৰ প্ৰতি সন্মান প্ৰদৰ্শনৰ বাবে সৰুসজাই ষ্টেডিয়ামৰ নাম তেওঁৰ নামেৰে সলনি কৰা হ’ব বুলিও জানিবলৈ দিয়ে।
