মানসিক চাপে কেনেকৈ হৃদৰোগৰ সম্ভাৱনা বৃদ্ধি কৰে? জানক

প্ৰতীকী ফটো

আমি প্ৰায়ে মানসিক চাপক সহজভাৱে লওঁ, কিন্তু আপুনি জানেনে যে ইয়াৰ প্ৰত্যক্ষ প্ৰভাৱ আপোনাৰ হৃদযন্ত্ৰত পৰিব পাৰে? মানসিক স্বাস্থ্য আৰু হৃদযন্ত্ৰৰ স্বাস্থ্যৰ মাজত গভীৰ সম্পৰ্ক আছে বুলি চিকিৎসক আৰু হৃদৰোগ বিশেষজ্ঞসকলে উল্লেখ কৰিছে। অত্যধিক মানসিক চাপ থাকিলে প্ৰায় সংখ্যক মানুহে চিকিৎসা কৰা বা সহায় বিচৰাৰ পৰিৱৰ্তে ইয়াক আওকাণ কৰে। আন বহুতে মানসিক চাপৰ পৰা পৰিত্ৰাণ পাবলৈ মদ্যপান, ধূমপান আদি অভ্যাস কৰে। ই এই সমস্যাক আৰু অধিক জটিল কৰে।

বিশেষজ্ঞসকলৰ মতে মানসিক চাপৰ ফলত হাৰ্ট এটেকৰ সম্ভাৱনা বৃদ্ধি পাব পাৰে। আধুনিক জীৱনশৈলী, চাকৰিৰ চাপ, পৰিয়ালৰ চাপ, আৰ্থিক অস্থিৰতাৰ দৰে বহু কাৰণত মানুহৰ মানসিক চাপ বৃদ্ধি পায়। বিশেষজ্ঞসকলৰ মতে মানসিক স্বাস্থ্যক গুৰুত্বসহকাৰে লোৱাটো অতি প্ৰয়োজনীয়। যদি কোনো ব্যক্তিয়ে প্ৰতিদিনে মাত্ৰ ৩০ মিনিট খোজ কাঢ়ে, ধ্যান আৰু প্ৰাণায়াম কৰে, তেন্তে মানসিক চাপৰ প্ৰভাৱ বহু পৰিমাণে হ্ৰাস পাব পাৰে। ইয়াৰ উপৰিও স্বাস্থ্যসন্মত খাদ্য গ্ৰহণ, পৰ্যাপ্ত টোপনি আৰু আড্ডা মৰাৰ অভ্যাসেও হৃদযন্ত্ৰৰ স্বাস্থ্য উন্নত কৰাত সহায় কৰে।

মানসিক চাপে হৃদযন্ত্ৰত কেনেদৰে প্ৰভাৱ পেলায়?

দিল্লীৰ ৰাজীৱ গান্ধী হাস্পতালৰ হৃদৰোগ বিভাগৰ সহযোগী অধ্যাপক ডাঃ অজিত জৈনে কয় যে, যেতিয়া কোনো ব্যক্তি মানসিক চাপত থাকে তেতিয়া শৰীৰত এড্ৰিনেলিন আৰু কৰ্টিছলৰ দৰে কিছুমান হৰম’নৰ মাত্ৰা বৃদ্ধি পায়। যিয়ে শৰীৰটোক অস্থিৰ কৰে। এনে অৱস্থাত হৃদস্পন্দন বাঢ়ে, ৰক্তচাপ বাঢ়ি যায় আৰু তেজ ঘন হ’বলৈ আৰম্ভ কৰে। এই অৱস্থা দীৰ্ঘদিন ধৰি থাকিলে ৰক্তবাহী নলীবোৰ সংকুচিত হ’বলৈ আৰম্ভ কৰে আৰু ফুলি উঠিবও পাৰে। ইয়াৰ ফলত হৃদযন্ত্ৰৰ ধমনীবোৰ বন্ধ হৈ পৰে, যাৰ ফলত পিছলৈ হাৰ্ট এটেক হ’ব পাৰে।

দীৰ্ঘদিনীয়া অৰ্থাৎ স্থায়ী মানসিক চাপক হৃদযন্ত্ৰৰ বাবে আটাইতকৈ বিপদজনক বুলি গণ্য কৰা হয়। মানসিক চাপৰ বাবে মানুহে প্ৰায়ে ধূমপান, মদ্যপানৰ দৰে অভ্যাসৰ প্ৰতি আকৰ্ষিত হয়। এই সকলোবোৰ অভ্যাসে হৃদযন্ত্ৰৰ অধিক ক্ষতি কৰে। লগতে মানসিক চাপে টোপনিৰ মানদণ্ডতো প্ৰভাৱ পেলায়, যাৰ বাবে ৰক্তচাপ আৰু ৰক্তশৰ্কৰাৰ মাত্ৰা নিয়ন্ত্ৰণহীন হৈ পৰিব পাৰে।

মানসিক চাপ কেনেকৈ বিপদজনক কাৰক হৈ পৰে?

• হৃদৰোগ বিশেষজ্ঞসকলৰ মতে মানসিক চাপে প্ৰত্যক্ষভাৱে হাৰ্ট এটেকৰ সম্ভাৱনা দুগুণ বৃদ্ধি কৰিব পাৰে।
• দীৰ্ঘদিনীয়া মানসিক চাপে প্ৰদাহ বৃদ্ধি কৰে, যাৰ ফলত হৃদৰোগ হ’ব পাৰে।
• মানসিক চাপত মানুহে ধূমপান, অতিমাত্ৰা খাদ্য বা মদ্যপানৰ আশ্ৰয় লয়, যিবোৰ হৃদযন্ত্ৰৰ বাবে ক্ষতিকাৰক।
• মানসিক চাপে টোপনিৰ ব্যাঘাত জন্মায়, যাৰ ফলত ৰক্তচাপ আৰু হৃদস্পন্দন নিয়ন্ত্ৰণহীন হৈ পৰে।
• হতাশা আৰু উদ্বেগ, এই মানসিক অৱস্থাই হৃদৰোগৰ সম্ভাৱনা বৃদ্ধি কৰে।
• সংগীত শুনা, কিতাপ পঢ়া, প্ৰকৃতিৰ সৈতে সময় কটোৱা আদি মানসিক চাপৰ পৰা উপশম পোৱাৰ উপায় হ’ব পাৰে। যদি মানসিক চাপ স্থায়ী, তেন্তে মানসিক স্বাস্থ্য বিশেষজ্ঞৰ পৰামৰ্শ লোৱাত পলম নকৰিব।