শেনে থপিয়াই নিলে জগন্নাথ মন্দিৰৰ পতাকা, অশনি সংকেত নেকি এয়া?

জগন্নাথ মন্দিৰ

ওড়িশাৰ পুৰীস্থিত ভগৱান জগন্নাথ মন্দিৰৰ এটা চাঞ্চল্যকৰ ভিডিঅ’ ছ’চিয়েল মিডিয়াত ভাইৰেল হৈ পৰিছে, য’ত এটা ডাঙৰ চৰাইয়ে নখত পতাকা লৈ উৰি যোৱা দেখা গৈছে । অৱশ্যে ভিডিঅ’টোত মন্দিৰৰ ওপৰত পতাকা উৰুৱাই থকা দেখা গৈছে । এই ভিডিঅ’টোৰ পিছত ৰাইজৰ মাজত বিশ্বাস, ৰহস্য আৰু শংকাই দেখা দিছে । এই ঘটনাক মানুহে বহু দৃষ্টিকোণৰ পৰা ৰহস্যময় আৰু দৃষ্টি আকৰ্ষণকাৰী বুলি অভিহিত কৰিছে ।

ছ’চিয়েল মিডিয়াত ভাইৰেল হৈ পৰা এই ভিডিঅ’টোত মন্দিৰৰ পতাকা নখেৰে খামুচি শৃংগটোৰ চাৰিওফালে ঘূৰি ফুৰা এটা ঈগল দেখা গৈছে, সেইটোৱে বহু প্ৰশ্নৰ জন্ম দিছে । মানুহে ইয়াক ভাল বা বেয়া শংকা হিচাপে আৰু ভৱিষ্যতৰ প্ৰতি এক ভয়ৰ সংকেত হিচাপে ব্যাখ্যা কৰিছে । বহুতে এই ঘটনাক ২০২০ বৰ্ষত সংঘটিত হোৱা ঘটনাৰ লগতো তুলনা কৰিছে, য’ত বজ্ৰপাতৰ বাবে মন্দিৰৰ পতাকাত জুই লাগিছিল আৰু দেশৰ লগতে সমগ্ৰ বিশ্ব কৰ’না মহামাৰীৰ সন্মুখীন হ’বলগীয়া হৈছিল ।

ভাইৰেল ভিডিঅ’টোত গৰুড় চৰাইটো জগন্নাথ মন্দিৰৰ ওপৰেৰে ঘূৰি ফুৰা দেখা গৈছে । পতাকাখন নখত খামুচি আছে চৰাইটোৱে । পতাকা লৈ শৃংগটোৰ চাৰিওফালে ঘূৰি ফুৰা দেখা গৈছে গৰুড় চৰাইটো । ৮০০ বছৰীয়া জগন্নাথ মন্দিৰটো বহু ৰহস্যৰে ভৰপূৰ । মন্দিৰৰ পতাকা সদায় বতাহৰ বিপৰীত দিশত উৰি থাকে বুলি বিশ্বাস কৰা হয় । জগন্নাথ মন্দিৰৰ ওপৰত উৰি থকা পতাকাখনে বিজ্ঞানৰ সাধাৰণ নিয়মক প্ৰত্যাহ্বান জনাইছে । সাধাৰণতে বতাহ বলি থকা দিশত পতাকা উৰি থাকে, কিন্তু জগন্নাথ মন্দিৰত ইয়াৰ বিপৰীত, বতাহৰ বিপৰীত দিশত পতাকাখন উৰি থাকে ।

মন্দিৰত প্ৰতিদিনে পতাকা সলনি কৰা হয় । এদিনো বাদ নপৰাকৈ, কোনো ভুল নকৰাকৈ এজন ব্যক্তিয়ে মন্দিৰৰ সৰ্বোচ্চ শিখৰত উঠি নতুন পতাকা স্থাপন কৰে । এই পৰম্পৰা যুগ যুগ ধৰি অবিৰতভাৱে চলি আহিছে । কোৱা হয় যে যদি এই পৰম্পৰা কেতিয়াবা বন্ধ হৈ যায়, তেন্তে ১৮ বছৰলৈ মন্দিৰটো বন্ধ হৈ থাকিব । এনে পৰিস্থিতিত যদি মন্দিৰৰ দুৱাৰ খুলি দিয়া হয়, তেনেহ’লে বিপৰ্যয়ৰ সৃষ্টি হ’ব পাৰে বুলি বিশ্বাস কৰা হয় । আজিৰ আধুনিক প্ৰযুক্তিৰ সত্ত্বেও মন্দিৰত পতাকা উত্তোলনৰ কাম কোনো হাৰ্নেছ বা নিৰাপত্তাৰ সামগ্ৰী নোহোৱাকৈ হাতেৰে কৰা হয় ।