চৰকাৰ সাজু, আপোনালোকে অস্ত্ৰ ত্যাগ কৰক : মণিপুৰৰ লোকলৈ বিশেষ আহ্বান কেন্দ্ৰীয় মন্ত্ৰী কিৰেন ৰিজিজুৰ

কেন্দ্ৰীয় মন্ত্ৰী কিৰেন ৰিজিজু

কেন্দ্ৰীয় মন্ত্ৰী কিৰেন ৰিজিজুৱে শনিবাৰে জাতিগত-হিংসাৰ দ্বাৰা প্ৰভাৱিত মণিপুৰৰ লোকসকলক অস্ত্ৰ ত্যাগ কৰিবলৈ আহ্বান জনায়। লগতে তেওঁ মণিপুৰৰ লোকসকলক আলোচনাৰ বাবে আহিবলৈ আহ্বান জনায়। যাতে ৰাজ্যখনত শান্তিৰ স্থায়ী সমাধানৰ পথ বিচাৰি পোৱা যায়। কেন্দ্ৰীয় মন্ত্ৰীগৰাকীয়ে লগতে কয় যে ভাৰত চৰকাৰে সকলো চেষ্টা কৰিবলৈ সাজু, কিন্তু তাৰ বাবে সকলোৱে অস্ত্ৰ ত্যাগ কৰিব লাগিব।

কেন্দ্ৰীয় সংখ্যালঘু পৰিক্ৰমা মন্ত্ৰী কিৰেন ৰিজিজুৱে এনজিঅ’ ‘মাই হোম ইণ্ডিয়া’ৰ দ্বাৰা আয়োজিত নৰ্থ-ইষ্ট ষ্টুডেণ্টছ ফেষ্টিভেলত ভাষণ দি এইদৰে কয়। দিল্লীৰ তালকাটোৰা ষ্টেডিয়ামত অনুষ্ঠিত হৈছে নৰ্থ ইষ্ট ষ্টুডেণ্টছ ফেষ্টিভেল ২০২৪ । তাত তেওঁ কয়, “কেন্দ্ৰত নৰেন্দ্ৰ মোদী চৰকাৰৰ অধীনত উত্তৰ-পূবত অভূতপূৰ্ব উন্নয়ন ঘটিছে। এই অঞ্চলৰ জনসাধাৰণে এক সোণালী সুযোগ লাভ কৰিছে।”

নৰ্থ-ইষ্ট ষ্টুডেণ্টছ ফেষ্টিভেলত কিৰেন ৰিজিজুৱে কয়, ‘মই কুকি ভাই-ভনীসকলক অনুৰোধ জনাইছো যে ভাৰত চৰকাৰে সকলো ধৰণৰ চেষ্টা কৰিবলৈ সাজু কিন্তু আপোনালোকে অস্ত্ৰ ত্যাগ কৰিব লাগিব। যদি আপুনি অস্ত্ৰ তুলি লয়, তেন্তে ইয়াৰ কোনো সমাধান নোলাব।” তেওঁ কয় যে যিকোনো সমস্যা কেৱল আলোচনাৰ জৰিয়তে হে সমাধান কৰিব পাৰি।

তেওঁ পুনৰ কয়, “যিকোনো সমাধান কেৱল আলোচনাৰ জৰিয়তে হে বিচাৰি উলিয়াব পাৰি। যিয়েই নহওঁক, আপুনি ইজনে আনজনৰ সৈতে যুদ্ধ কৰিব নোৱাৰে। যদি আপোনালোকে ইজনে আনজনৰ সৈতে কথা পাতে, আলোচনাৰ মেজলৈ আহে, তেতিয়াহে আমি স্থায়ী শান্তি স্থাপন কৰিব পাৰিম।”

যোৱা বছৰৰ ৩ মে’ৰ পৰা মণিপুৰত জাতিগত হিংসা অব্যাহত আছে। সংখ্যাগৰিষ্ঠ মেইটেই সম্প্ৰদায়ৰ বাবে অনুসূচীত জনজাতিৰ (এছটি) মৰ্যাদাৰ দাবী থকাৰ সময়তে হিংসাৰ সূত্ৰপাত হৈছিল। আৰু ইয়াৰ প্ৰতিবাদত উত্তৰ-পূবৰ ৰাজ্যখনৰ পাহাৰীয়া জিলাসমূহত আদিবাসী সংহতি সমদল উলিওৱা হয়। এই হিংসাত্মক ঘটনাত কুকি আৰু মেইটেই দুয়োটা সম্প্ৰদায়ৰ সদস্যৰ লগতে নিৰাপত্তাকৰ্মীসহ ২২০ জনৰো অধিক লোক নিহত হৈছে।

কেন্দ্ৰীয় মন্ত্ৰী কিৰেন ৰিজিজুৱে আৰু কয় যে “যোৱা ১০ বছৰত উত্তৰ-পূব অঞ্চলত অভূতপূৰ্ব উন্নয়ন ঘটিছে। এয়া আমাৰ সকলোৰে বাবে এক সোণালী সুযোগ। এনে সময়ত মণিপুৰৰ জনসাধাৰণে হিংসা পৰিহাৰ কৰিব লাগিব আৰু আলোচনাৰ জৰিয়তে সমাধান বিচাৰি উলিওৱাৰ দিশত আগবাঢ়িব লাগিব।”