ভাৰতীয় ৰে’লৱেত ঘটিছে কি! এইবাৰ ঘটনাস্থলী জবলপুৰ, ৰে’লপথৰ পৰা নামি আহিল চলন্ত ৰে’লৰ দুটাকৈ ডবা

জবলপুৰত ৰে’ল দুৰ্ঘটনা

বিগত কিছুদিন ধৰি ইটোৰ পিছত সিটোকৈ কেইবাটাও ৰে’ল দুৰ্ঘটনা সংঘটিত হৈছে দেশত। এনে দুৰ্ঘটনাৰ পৰিপ্ৰেক্ষিতত ৰে’ল পৰিবহণৰ নিৰাপত্তাৰ দিশক লৈ প্ৰশ্ন উত্থাপিত হৈছে। দেশৰ আটাইতকৈ সুচল আৰু সুলভ পৰিবহণ ব্যৱস্থাটোৰ ওপৰত বৃদ্ধি পাবলৈ ধৰিছে অনাস্থা। তাৰ মাজতে পুনৰ সংঘটিত হৈছে আন এটা ভয়ংকৰ ৰে’ল দুৰ্ঘটনা। এইবাৰ এই দুৰ্ঘটনা ঘটিছে মধ্যপ্ৰদেশৰ জবলপুৰত। চলন্ত অৱস্থাত ৰে’লপথৰ পৰা নামি আহিল সোমনাথ এক্সপ্ৰেছৰ দুটা ডবা। ইন্দোৰৰ পৰা জবলপুৰলৈ যাত্ৰা কৰি থকাৰ সময়তে জবলপুৰৰ মূল ৰে’ল ষ্টেচনৰ সমীপত ৰে’লখনৰ দুটাকৈ ডবা ৰে’লপথৰ পৰা নামি যায়।

এই ঘটনাই মুহূৰ্ততে ডবা দুটাত থকা যাত্ৰীসকলৰ মাজত এক আতংকময় পৰিস্থিতিৰ সৃষ্টি কৰে। অৱশ্যে জবলপুৰ ষ্টেচনৰ কাষ চাপি অহাৰ বাবে ৰে’লখনৰ গতি লেহেমীয়া আছিল আৰু সেয়ে আন এক নিশ্চিত ভয়াৱহ ঘটনাৰ পৰা ৰক্ষা পৰে। ৰে’লখন গতি স্বাভাৱিক অৱস্থাত থকা হ’লে এই দুৰ্ঘটনাৰ ফলত নিশ্চিতভাৱে যাত্ৰীৰ হানি-বিঘিনি ঘটিলহেঁতেন।

ৰে’লৱেৰ বিষয়াসকলে ঘটনা সন্দৰ্ভত জানিবলৈ দিয়া মতে পুৱা প্ৰায় ৫:৫০ বজাত সংঘটিত হয়। ইন্দোৰ আৰু জবলপুৰৰ মাজত চলাচল কৰা সোমনাথ এক্সপ্ৰেছ জবলপুৰ ষ্টেচন পোৱাৰ আগে আগে ৰে’লখনৰ ডবা ৰে’লপথৰ পৰা নামি যায়। ইয়াৰ ফলত যাত্ৰীসকলৰ মাজত আতংকৰ সৃষ্টি হয়। ঘটনাৰ পিছতে লগে লগে ডবা দুটাত থকা সকলো যাত্ৰীক ৰে’লৰ পৰা নমাই দিয়া হয়।

ইফালে দুৰ্ঘটনাৰ বিষয়ে তথ্য লাভ কৰাৰ লগে লগে ৰে’লৱেৰ শীৰ্ষ বিষয়া-কৰ্মচাৰীৰ এটা দল ঘটনাস্থলীত উপস্থিত হয় আৰু সাহায্য অভিযান আৰম্ভ কৰে। ৰে’লখনৰ অন্তিম যাত্ৰাস্থল যিহেতু জবলপুৰ ষ্টেচন আছিল, সেয়ে ষ্টেচনৰ কাষ চপাৰ বাবে গতিবেগ কমাই দিয়া হৈছিল। ঘটনাৰ সময়ত ৰে’লখনৰ গতিবেগ প্ৰতি ঘণ্টাত ৫ কিলোমিটাৰ আছিল বুলি জানিব পৰা গৈছে। সেয়েহে কোনো ডাঙৰ দুৰ্ঘটনাৰ সাক্ষী হোৱাৰ পৰা ৰক্ষা পৰে দেশ৷

উল্লেখ্য যে কিছুদিন পূৰ্বে উত্তৰ প্ৰদেশত এনে অনুৰূপ এক দুৰ্ঘটনা সংঘটিত হৈছিল। দুৰ্ঘটনাৰ সন্মুখীন হৈছিল বাৰাণসীৰ পৰা আহমেদাবাদ অভিমুখী সবৰমতী এক্সপ্ৰেছ। যাত্ৰাৰত সবৰমতী এক্সপ্ৰেছৰ ২২টাকৈ ডবা কানপুৰ আৰু ভীমসেন ষ্টেচনৰ মাজভাগত থকা গোবিন্দপুৰী ষ্টেচনৰ সমীপত  ৰে’লপথৰ পৰা ওলাই যায়। সৌভাগ্যৱশতঃ এই দুৰ্ঘটনাত কোনো লোক নিহত বা আহত হোৱা নাছিল।

নিশা প্ৰায় নিশা প্ৰায় ২:৩০ বজাত এই ঘটনা সংঘটিত হৈছিল। দুৰ্ঘটনাৰ সময়ত ৰে’লখনৰ অধিকাংশ যাত্ৰী নিদ্ৰাৰত অৱস্থাত আছিল। কিন্তু দুৰ্ঘটনা সংঘটিত হোৱাৰ লগে লগে তেওঁলোকে দুৰ্ঘটনাৰ উমান পায় আৰু লগে লগে ৰে’লৰ পৰা নামি আহে। ঘটনাৰ বিষয়ে তথ্য লাভ কৰাৰ লগে লগে ৰে’ল বিভাগে তাৎক্ষণিকভাৱে উদ্ধাৰ অভিযান চলাই বাছৰ জৰিয়তে যাত্ৰীসকলক আন ষ্টেচনলৈ লৈ গৈছিল।