এনকাউণ্টাৰত নিহত শীৰ্ষ মাওবাদী নেতা গণেশ উইকে, মূৰৰ দাম আছিল ১ কোটিৰো অধিক

প্ৰতিনিধিত্বমূলক ছবি

দেশক নক্সালমুক্ত কৰি তোলাৰ লক্ষ্যৰে নিৰাপত্তা বাহিনীয়ে চলাই থকা অভিযান ধাৰাবাহিকভাৱে আগবাঢ়িছে। এনে এক অভিযানৰ সময়ত আজি নিৰাপত্তা বাহিনীয়ে ওড়িশাত বৃহৎ সাফল্য লাভ কৰিছে। ওড়িশাত আজি হোৱা এক এনকাউণ্টাৰত নিহত হৈছে মাওবাদীৰ শীৰ্ষ নেতা গণেশ উইকে। তেওঁৰ লগতে এই এনকাউণ্টাৰত আন তিনিগৰাকী নক্সাল সদস্যও নিহত হৈছে। উল্লেখ্য যে এই দুৰ্ধৰ্ষ মাওবাদী নেতাগৰাকীৰ বাবে ১ কোটি ১০ লাখ টকাৰ পুৰস্কাৰ ঘোষণা কৰিছিল চৰকাৰে।

আজি কান্ধমাল জিলাত নিৰাপত্তা বাহিনী আৰু মাওবাদীৰ মাজত এই সংঘৰ্ষৰ সূত্ৰপাত হৈছিল। সংঘৰ্ষৰ সময়ত নিৰাপত্তা বাহিনীৰ বাবে বৃহৎ সফলতাৰ ৰূপত শীর্ষ মাওবাদী নেতা গণেশ উইকেৰ লগতে আন তিনিজন সদস্যৰ মৃত্যু ঘটে। আৰক্ষীয়ে জানিবলৈ দিয়া মতে, জিলাখনৰ চকাপদ থানা এলেকাৰ বনাঞ্চলত সংঘটিত হয় এই এনকাউণ্টাৰ।

গণেশ উইকে চি পি আই (মাওবাদী)ৰ কেন্দ্ৰীয় সমিতিৰ সদস্য আছিল আৰু তেওঁ ওড়িশাত নিষিদ্ধ সংগঠনটোৰ মুৰব্বী হিচাপে পৰিচিত হৈছিল। চৰকাৰে তেওঁৰ শিৰৰ দাম ১ কোটি ১০ লাখ টকাৰ পুৰস্কাৰ ঘোষণা কৰিছিল। গণেশ উইকেৰ বয়স আছিল ৬৯ বছৰ। তেওঁ তেলেংগানাৰ নালগোণ্ডা জিলাৰ বাসিন্দা আছিল।

নিহত দুগৰাকী মহিলা সদস্য

নিহত আন তিনিজন নক্সাল সদস্যৰ ভিতৰত আছে দুগৰাকী মহিলা। তেওঁলোকৰ পৰিচয় এতিয়াও প্ৰকাশ পোৱা নাই। আৰক্ষীয়ে জানিবলৈ দিয়া মতে, অঞ্চলটোত তালাচী অভিযান এতিয়াও অব্যাহত আছে। প্ৰকাশিত খবৰ অনুসৰি বিশেষ চোৰাংচোৱা শাখাৰ পৰা চোৰাংচোৱা তথ্য লাভ কৰাৰ পিছত নিৰাপত্তা বাহিনীয়ে যৌথ অভিযান আৰম্ভ কৰিছিল।

বনাঞ্চলত নিৰাপত্তা বাহিনীৰ উপস্থিতি দেখা পাই বনাঞ্চলত লুকাই থকা নক্সাল সদস্যসকলে গুলীচালনা আৰম্ভ কৰে। ইয়াৰ প্ৰত্যুত্তৰত নিৰাপত্তা বাহিনীয়েও গুলীচালনা কৰে আৰু এই এনকাউণ্টাৰত চাৰি নক্সাল সদস্য নিহত হয়। এই সফলতা সন্দৰ্ভত গৃহ মন্ত্ৰালয়ে ইনষ্টাগ্ৰামত এক পোষ্ট দি চৰকাৰে মাৰ্চ মাহৰ ভিতৰত নক্সালবাদক দেশৰ পৰা সম্পূৰ্ণৰূপে নিৰ্মূল কৰাৰ পথত আগবাঢ়িছে বুলি উল্লেখ কৰে।

দীৰ্ঘদিন ধৰি ওড়িশাত সক্ৰিয় গণেশ উইকে

উল্লেখ্য যে গণেশ উইকেয়ে দীৰ্ঘদিন ধৰি ওড়িশাত সক্ৰিয় হৈ আছিল। তেওঁক ওড়িশাত দায়িত্ব পালনৰ সমান্তৰালকৈ ছত্তীশগড়তো সক্ৰিয় আছিল। খবৰ অনুসৰি গণেশ উইকে দক্ষিণ উপ-মণ্ডলৰ দায়িত্বত আছিল। সাতখন ৰাজ্যত নিৰাপত্তা বাহিনীৰ ৱাণ্টেড হৈ থকা গণেশ উইকে পক্কা হনুমন্ত, ৰাজেশ তিৱাৰী, চামৰু, ৰূপাকে ধৰি বিভিন্ন নামেৰে পৰিচিত আছিল।