নেতাজীক দান কৰিছিল ১৯০ কোটি টকা!

ব্ৰিটিছ ঔপনিৱেশিক শাসনৰ পৰা মুক্তি বিচাৰি সমগ্ৰ দেশ জপিয়াই পৰিছিল স্বাধীনতাৰ আন্দোলনত। মহাত্মা গান্ধীৰ নেতৃত্বত আন্দোলনৰ অহিংস পথ গ্ৰহণ কৰিছিল দেশৰ অধিকাংশ লোকে। আনহাতে নেতাজী সুভাষ চন্দ্ৰ বসুৰ সশস্ত্ৰ পন্থায়ো আকৰ্ষিত কৰিছিল বৃহৎ সংখ্যক লোকক। দেশৰ স্বাধীনতা ঘূৰাই অনাৰ লক্ষ্যৰে অলেখ লোকে থিয় দিছিল নেতাজীৰ আজাদ হিন্দ ফৌজৰ কাষত। এই লক্ষ্যৰ বাবেই অলেখ লোকে যোগ দিয়ে আজাদ হিন্দ ফৌজত। বহুলোক অৱশ্যে প্ৰত্যক্ষভাৱে সেনাবাহিনীত যোগ নিদিলেও মুক্তহস্তে আগবঢ়ায় ধনৰ সাহায্য।

দেশৰ স্বাধীনতা সংগ্ৰামত এই লোকসকলৰ অৱদানো স্বৰ্ণিল আখৰেৰে লিখিত হৈ ৰৈছে। অৱশ্যে ইয়াৰে অধিকাংশ লোকৰ বিষয়েই আজিপৰ্যন্ত হোৱা নাই বিশেষ চৰ্চা। এনে মহৎ উদ্দেশ্যত নিজকে আগবঢ়াই দিয়া বহু দেশপ্ৰেমীৰ বিষয়ে হয়তো কোনো ধাৰণাই নাই বহু লোকৰ। দেশৰ স্বাধীনতাৰ সংগ্ৰামত নিজকে সঁপি দিয়া তেনে এজন লোক আছিল আব্দুল হাবিব ইউছুফ মাৰ্ফানী।

ভাৰতৰ গৌৰৱময় স্বাধীনতা ঘূৰাই অনাৰ উদ্দেশ্যে এইগৰাকী আব্দুল হাবিব ইউছুফ মাৰ্ফানীয়ে নিজৰ সকলো ধন-সম্পত্তি আাগবঢ়াই দিছিল দেশৰ বাবে। বৰ্তমানৰ গুজৰাটৰ সৌৰাষ্ট্ৰত বাস কৰিছিল ইউছুফ মাৰ্ফানীৰ পৰিয়াল। পিছলৈ তেওঁলোকে বৰ্তমানৰ ম্যানমাৰ, অৰ্থাৎ তেতিয়াৰ বাৰ্মাৰ ৰেংগুনত বাস কৰিবলৈ লয়।

নেতাজীয়ে আজাদ হিন্দ ফৌজৰ ​​বাবে ধন সংগ্ৰহ কৰিবলৈ আৰম্ভ কৰাৰ সময়ত এই আব্দুল হাবিব ইউছুফ মাৰ্ফানীয়েই আছিল প্ৰথমগৰাকী ব্যক্তি, যি নিজৰ সকলো সম্পত্তি আজাদ হিন্দ ফৌজক দান কৰিছিল। সেই সময়ৰ হিচাপ অনুসৰি তেওঁ আজাদ হিন্দ ফৌজক প্ৰায় ১ কোটি ৩ লাখ টকা অনুদান আগবঢ়াইছিল।

ৰিজাৰ্ভ বেংকৰ কনজিউমাৰ প্ৰাইচ ইনডেক্স অনুসৰি সেই ধনৰ বৰ্তমান মূল্য প্ৰায় ১৯০ কোটি টকা। মাৰ্ফানীৰ এই অনুদানত আপ্লুত হৈ পৰে নেতাজী সুভাষ চন্দ্ৰ বসু। এই বৃহৎ দানত মুগ্ধ হৈ নেতাজীয়ে মাৰ্ফানীক কি বিচাৰে বুলি মুকলিকৈ প্ৰশ্ন কৰে। ইয়াৰ উত্তৰত তেওঁ আজাদ হিন্দ ফৌজত নিযুক্তিৰ বাবে আহ্বান জনায়।

নিজৰ সকলো ধন-সম্পত্তি দিয়াৰ পিছত দেহৰ তেজো দেশৰ বাবে দিব বিচাৰিছে বুলি মুকলিকৈ কয় মাৰ্ফানীয়ে। দেশৰ স্বাধীনতাৰ বাহিৰে আন একোৱেই নিবিচাৰে বুলিও নেতাজীক জানিবলৈ দিয়ে আব্দুল হাবিব ইউছুফ মাৰ্ফানীয়ে। তেওঁৰ এই মহানতাৰ বিষয়ে ইতিহাসৰ পাতত আজিও লিপিবদ্ধ হৈ আছে স্বৰ্ণিল আখৰেৰে।