মূৰ্তি, কাপোৰৰ পৰা জোতালৈ…নিলাম হ’ব প্ৰধানমন্ত্ৰীয়ে লাভ কৰা ১৩০০ৰো অধিক উপহাৰ, দাম কিমান?

নিলাম হ’ব প্ৰধানমন্ত্ৰীয়ে লাভ কৰা ১৩০০ৰো অধিক উপহাৰ

আজি দেশৰ প্ৰধানমন্ত্ৰী নৰেন্দ্ৰ মোদীৰ জন্মদিন। ‘আজাদী কা অমৃত’ মহোৎসৱৰ অংশ হিচাপে প্ৰধানমন্ত্ৰী নৰেন্দ্ৰ মোদীয়ে লাভ কৰা উপহাৰৰ সপ্তম ই-নিলামৰ কথা ঘোষণা কৰিছে কেন্দ্ৰীয় সাংস্কৃতিক মন্ত্ৰালয়ে। এইবাৰ ২০২৫ চনৰ ১৭ ছেপ্টেম্বৰৰ পৰা ২০২৫ চনৰ ২ অক্টোবৰলৈকে চলিব এই নিলাম। অনলাইন নিলামৰ বাবে ১৩০০ৰো অধিক উপহাৰ ৰখা হ’ব বুলি জানিব পৰা গৈছে।

নতুন দিল্লীৰ নেশ্যনেল গেলেৰী অৱ মডাৰ্ণ আৰ্ট (এন জি এম এ)ৰ উদ্যোগত হ’ব এই নিলাম। কেন্দ্ৰীয় সংস্কৃতি আৰু পৰ্যটন মন্ত্ৰী গজেন্দ্ৰ সিং শ্বেখাৱাটে এই অনুষ্ঠান আনুষ্ঠানিকভাৱে ঘোষণা কৰাৰ সময়তে কয় যে নিবিদাৰ বাবে ১৩০০ৰো অধিক উপহাৰ উপলব্ধ হ’ব। ই-নিলাম ১৭ ছেপ্টেম্বৰৰ পৰা ২ অক্টোবৰ, ২০২৫লৈ চলিব। ইচ্ছুক লোকসকলে www.pmmementos.gov.in ত গৈ এই সাংস্কৃতিক ঐতিহ্য সামগ্ৰীসমূহৰ ওপৰত নিবিদা দিব পাৰিব।

প্ৰধানমন্ত্ৰীৰ স্মৃতিগ্ৰন্থ ই-নিলামৰ সপ্তম সংস্কৰণ উপলক্ষে ভাষণ দি কেন্দ্ৰীয় মন্ত্ৰী গজেন্দ্ৰ সিং শ্বেখাৱাটে উল্লেখ কৰে যে নিলাম হ’বলগীয়া সামগ্ৰীসমূহৰ ভিতৰত আছে চিত্ৰ, শিল্পকৰ্ম, ভাস্কৰ্য, দেৱ-দেৱীৰ মূৰ্তিৰ লগতে কিছুমান ক্ৰীড়াৰ সামগ্ৰী। মন্ত্ৰীগৰাকীয়ে উল্লেখ কৰে যে ২০১৯ চনৰ জানুৱাৰী মাহত প্ৰথমটো উপহাৰৰ নিলাম হৈছিল।তেতিয়াৰ পৰাই প্ৰধানমন্ত্ৰী মোদীয়ে লাভ কৰা হাজাৰ হাজাৰ উপহাৰ নিলাম কৰা হৈছে। তেওঁ লগতে উল্লেখ কৰে যে প্ৰধানমন্ত্ৰী মোদী দেশৰ প্ৰথমজন প্ৰধানমন্ত্ৰী যিয়ে নিজৰ সকলো স্মৃতি চিহ্নসমূহ ভাল কামত উৎসৰ্গা কৰিছে।

বহুতো অনন্য উপহাৰ অন্তৰ্ভুক্ত কৰা হৈছে

এইবাৰ নিলামত বহু অনন্য উপহাৰ অন্তৰ্ভুক্ত কৰা হৈছে। আটাইতকৈ দামী উপহাটো এটা মূৰ্তি, যাৰ মূল্য ১০,৩৯,৫০০ টকা। আটাইতকৈ সস্তা উপহাৰটো হ’ল এটুকুৰা কাপোৰ, যাৰ দাম ৬০০ টকা।

সৰ্বোচ্চ মূল্যৰ উপহাৰ

• ভৱানী মাতাৰ মূৰ্তি – ১০,৩৯,৫০০
• পেৰালিম্পিক পদক বিজয়ী অজিত সিঙৰ জোতা – ৭,৭০,০০০
• পেৰালিম্পিক পদক বিজয়ী ছিমৰন শৰ্মাৰ জোতা – ৭,৭০,০০০
• পেৰালিম্পিক পদক বিজয়ী নিষাদ কুমাৰৰ জোতা – ৭,৭০,০০০
• ৰাম মন্দিৰৰ আৰ্হি – ৫,৫০,০০০

কম মূল্যৰ উপহাৰ

• সোণৰ দাপোনৰ সৈতে ৰঙা চুনাৰী – ৬০০ টকা
• পদুম চিহ্নৰ সৈতে গেৰুৱা অংগবস্ত্ৰ – ৮০০ টকা
• কমলা এম্ব্ৰয়ডাৰীৰ অংগবস্ত্ৰ – ৯০০ টকা

এই পৰ্যন্ত সংগ্ৰহ কৰা হৈছে ৫০ কোটিতকৈ অধিক টকা

প্ৰতি বছৰে চলি থকা এই নিলামৰ লক্ষ্য হৈছে প্ৰধানমন্ত্ৰীয়ে লাভ কৰা উপহাৰসমূহ সাধাৰণ জনতাৰ মাজত বিতৰণ কৰা আৰু লাভ কৰা ধনসমূহ গংগা চাফাই আৰু জনকল্যাণমূলক আঁচনিৰ বাবে ব্যৱহাৰ কৰা। এই পৰ্যন্ত ৫০ কোটিতকৈ অধিক টকা সংগ্ৰহ কৰা হৈছে। এই সকলোবোৰ উপহাৰ নতুন দিল্লীৰ নেশ্যনেল গেলেৰী অৱ মডাৰ্ণ আৰ্ট (এন জি এম এ)ত প্ৰদৰ্শিত হৈছে, য’ত মানুহে এইবোৰ চাব পাৰে আৰু তাৰ পিছত অনলাইন নিবিদাত অংশগ্ৰহণ কৰিব পাৰে।