জটিল বান পৰিস্থিতি, শিহৰণকাৰী ভিডিঅ’ পোষ্ট কৰি ৰাইজক সজাগ হোৱাৰ আহ্বান কিৰেন ৰিজিজুৰ

খৰস্ৰোতা নৈৰ ওপৰেৰে ওলোমা দলং পাৰ এজনৰ

দেশৰ প্ৰায়বোৰ ৰাজ্যতে প্ৰবল বৃষ্টিপাতৰ ফলত বান পৰিস্থিতিৰ উদ্ভৱ হোৱা দেখা গৈছে । মণিপুৰ, অসম, ছিকিম, অৰুণাচল প্ৰদেশ আৰু মেঘালয়ৰ পৰিস্থিতি অতি সংকটজনক হৈ পৰিছে । এই ৰাজ্যসমূহৰ আৰক্ষী প্ৰশাসনে জনসাধাৰণক সুৰক্ষা প্ৰদানৰ বাবে অহৰহ চেষ্টা অব্যাহত ৰাখিছে । বেছিভাগ ৰাজ্যতে বান পৰিস্থিতি জটিল হৈ আছে । বানত আৱদ্ধ হৈ থকা লোকসকলক উদ্ধাৰৰ বাবেও প্ৰশাসনে অভিযান চলাই আছে ।

কেন্দ্ৰীয় মন্ত্ৰী কিৰেন ৰিজিজুৱে ছ’চিয়েল মিডিয়াত এটা ভিডিঅ’ পোষ্ট কৰি পৰিস্থিতি নিয়ন্ত্ৰণ নোহোৱালৈকে ৰাইজক ঘৰতে থাকিবলৈ আহ্বান জনায় । “বৰষুণৰ বাবে আপোনালোক আতংকিত হোৱাৰ প্ৰয়োজন নাই । আপোনালোকৰ সুৰক্ষাৰ বাবে চৰকাৰে যৎপৰোনাস্তি চেষ্টা কৰিছে । এইবাৰ সৰ্বাধিক বৰষুণ হৈছে অৰুণাচল প্ৰদেশত,” মন্ত্ৰীগৰাকীয়ে লিখিছে ।

ছচিয়েল মিডিয়াত ভিডিঅ’ পোষ্ট
কিৰেন ৰিজিজুৱে নিজৰ ছ’চিয়েল মিডিয়া একাউণ্টত এটা শিহৰণকাৰী ভিডিঅ’ পোষ্ট কৰে, য’ত এজন ব্যক্তিয়ে অঞ্জাৱ জিলাৰ এখন ওলমা দলং পাৰ হৈ যোৱা দেখা গৈছে । ভিডিঅ’টো শ্বেয়াৰ কৰি মন্ত্ৰীগৰাকীয়ে লিখিছে যে বিশ্বৰ ভিতৰতে সৰ্বাধিক বৰষুণ হৈছে অৰুণাচল প্ৰদেশত । এই ভিডিঅ’টো পাইছো, য’ত এজন ব্যক্তিয়ে ভাৰত, চীন আৰু ম্যানমাৰ সীমান্তৰ ত্ৰি সংযোগস্থলৰ সমীপৰ অৰুণাচল প্ৰদেশৰ অঞ্জাৱ জিলাৰ এখন ওলমা দলং পাৰ হৈ আছে । অনুগ্ৰহ কৰি সাৱধান আৰু সুৰক্ষিত হওক । চৰকাৰে আপোনালোকক প্ৰয়োজনীয় সহায় আগবঢ়াব ।

ক্ষতিপূৰণ ঘোষণা
ৰাজ্যত হোৱা ধাৰাসাৰ বৰষুণৰ ফলত ভূমিস্খলন, বান সমস্যাৰ সৃষ্টি হৈছে । যাৰ বাবে ৰাজ্যখনৰ কেবাগৰাকীও নাগৰিকৰ মৃত্যু হৈছে । ৰাজ্য চৰকাৰে ঘোষণা কৰিছে যে যোৱা ২৪ ঘণ্টাত সমগ্ৰ ৰাজ্যত ভূমিস্খলন আৰু বানৰ ফলত মৃত্যু হোৱা লোকসকলে ৪ লাখ টকাকৈ ক্ষতিপূৰণ লাভ কৰিব । মৃতকলৈ শোক প্ৰকাশ কৰি মুখ্যমন্ত্ৰী পেমা খাণ্ডুৱে কয় যে জিলা প্ৰশাসনৰ জৰিয়তে ৰাইজক প্ৰয়োজনীয় সা-সুবিধা প্ৰদান কৰা হ’ব । মুখ্যমন্ত্রীয়ে ৰাইজক সাৱধান হ’বলৈ আৰু কোনো কাৰণ নোহোৱাকৈ বাহিৰলৈ ওলাই যোৱাৰ পৰা বিৰত থাকিবলৈ আহ্বান জনায় ৷

অৰুণাচল প্ৰদেশত ৯ জন লোকৰ মৃত্যু
২৯ মে’ৰ পৰা ৰাজ্যত ধাৰাসাৰ বৰষুণ হৈ আছে । একাংশ ঠাইত ভূমিস্খলনৰ বাবে বহু পথ বন্ধ হৈ পৰিছে । ভূমিস্খলনৰ ফলত শুকুৰবাৰে নিশা ৯ জন লোকৰ মৃত্যু হয় । ধাৰাসাৰ বৰষুণৰ ফলত ১৩ নং ৰাষ্ট্ৰীয় ঘাইপথত পানীৰ ঢলে এখনৰ পিছত আনখন বাহন উটুৱাই লৈ যায় । গাড়ীখনত ২টা পৰিয়ালৰ ৭জন লোক আছিল । আটাইকেইজনৰে থিতাতে মৃত্যু হয় । ৰাজ্যৰ পৰিস্থিতি নিয়ন্ত্ৰণ কৰিবলৈ চেষ্টা চলাইছে চৰকাৰে ।

ৰাজ্যসমূহৰ অৱস্থা সংকটজনক
যোৱা কেইবাদিনো ধৰি হোৱা ধাৰাসাৰ বৰষুণৰ বাবে দেশৰ বহু ৰাজ্যত পৰিস্থিতি অতি সংকটজনক হৈ পৰিছে । মণিপুৰত প্ৰায় ৪৮ ঘণ্টা ধৰি ধাৰাবাহিকভাৱে বৰষুণ হোৱাৰ বাবে নদী কাষৰীয়া অঞ্চলৰ লগতে আন বহু ঠাইত বাঢ়নী পানীয়ে তাণ্ডৱৰ সৃষ্টি কৰিছে । যাৰ বাবে মণিপুৰৰ বহু ঠাইত জৰুৰীকালীন সদৃশ পৰিস্থিতিৰ সৃষ্টি হৈছে । আনহাতে অসমতো পৰিস্থিতি অতি জটিল হৈ পৰিছে । অসমৰ প্ৰায় ১৯ খন জিলাৰ বিস্তীৰ্ণ অঞ্চল বানত প্লাৱিত হৈছে । অসমৰ গুৱাহাটীত ভূমিস্খলনত ৫ গৰাকী লোকৰ মৃত্যু হোৱাৰ বিপৰীতে কেবাখনো জিলাত বানৰ ফলত প্ৰায় ৬ জন লোকৰ মৃত্যু হৈছে । মেঘালয়তো বৰষুণৰ বাবে ৩ জন লোকৰ মৃত্যু হয় ।