বাংলাদেশী দুৰ্বৃ্ত্তই জ্বলাইছিল মুৰ্শিদাবাদৰ হিংসাৰ জুই, গৃহমন্ত্ৰণালয়ৰ হাতত পৰিছে তথ্য

মুৰ্শিদাবাদৰ ছবি

পশ্চিম বংগৰ মুৰ্শিদাবাদ জিলাত সংঘটিত হোৱা হিংসাত্মক সংঘৰ্ষৰ প্ৰাৰম্ভিক তদন্তৰ বিষয়ে কেন্দ্ৰীয় গৃহ মন্ত্ৰালয়ক অৱগত কৰা হৈছে, য’ত বাংলাদেশী দুষ্কৃতিকাৰী জড়িত থকাৰ সন্দেহ কৰা হৈছে । এই তথ্য সূত্ৰৰ পৰা পোহৰলৈ আহিছে । আচলতে হিংসা সংঘটিত হৈছিল মুৰ্শিদাবাদৰ সূতি, ধুলিয়ান আৰু জংগীপুৰ অঞ্চলত । সংশোধিত ৱাকফ আইনৰ বিৰুদ্ধে প্ৰতিবাদৰ মাজতে ১২ আৰু ১৩ এপ্ৰিলত এই হিংসাত্মক ঘটনা সংঘটিত হয় ।

সূত্ৰই জনোৱা মতে, এই হিংসা সন্দৰ্ভত কেন্দ্ৰীয় সংস্থাসমূহৰ পৰা গৃহ মন্ত্ৰালয়ে লাভ কৰা প্ৰাৰম্ভিক তথ্যত হিংসাত্মক ঘটনাত বাংলাদেশী অনুপ্ৰৱেশকাৰীৰ ভূমিকাক লৈ সন্দেহ কৰা হৈছে । একে সময়তে বাংলাদেশীৰ অবৈধ প্ৰৱেশৰ বাবে মুৰ্শিদাবাদৰ পৰা মালদালৈ প্ৰব্ৰজন কৰিবলৈ বাধ্য হৈছে একাংশ পৰিয়াল ।

গৃহ মন্ত্ৰালয়ে লাভ কৰা প্ৰাৰম্ভিক তথ্য অনুসৰি স্থানীয় প্ৰশাসনৰ গাফিলতিৰ বাবেই অবৈধ বাংলাদেশী এই অঞ্চলত সক্ৰিয় হৈ পৰাৰ এক প্ৰধান কাৰণ হৈ পৰিছে । সূত্ৰ অনুসৰি অবৈধভাৱে প্ৰৱেশ কৰা এই বাংলাদেশী অনুপ্ৰৱেশকাৰীসকলক নিয়ম অনুসৰি পৰীক্ষা কৰা নহ’ল আৰু ইয়াৰ বাবেই তেওঁলোক হিংসাত্মক পৰিস্থিতিত জৰ্জৰিত অঞ্চলসমূহত সক্ৰিয় হৈ পৰে । যাৰ ফলত একাংশ পৰিয়ালে নিজৰ ঘৰ-বাৰী এৰি যাব লগা হৈছে । ইয়াৰ পাছতে হিংসাত্মক পৰিস্থিতিত ক্ষতিগ্ৰস্ত অঞ্চলত কেন্দ্ৰীয় অৰ্ধসামৰিক বাহিনী মোতায়েন কৰা হয় ।

কেন্দ্ৰীয় চৰকাৰে অহৰহ বংগৰ হিংসাত্মক পৰিস্থিতিৰ মূল্যায়ন কৰি আছে আৰু নিয়মীয়াকৈ কেন্দ্ৰীয় সংস্থাৰ পৰা প্ৰতিবেদন বিচাৰিছে । ইয়াৰ উপৰিও কেন্দ্ৰীয় চৰকাৰে ৰাজ্য চৰকাৰৰ সৈতেও অহৰহ যোগাযোগ ৰাখি পৰিস্থিতিৰ ওপৰত চকু ৰাখিছে । বংগৰ পৰিস্থিতিৰ ওপৰত চকু ৰাখিছে গৃহ সচিবগৰাকীয়ে ।

ৱাকফ সংশোধনী আইনক লৈ ব্যাপক ক্ষোভৰ ফলত বংগত অশান্তিৰ সৃষ্টি হয় । এই পৰিৱৰ্তনে সংখ্যালঘুৰ অধিকাৰ আৰু ধৰ্মীয় স্বাধীনতা খৰ্ব কৰা বুলি দাবী কৰে প্ৰতিবাদকাৰীসকলে । এই উত্তেজনা সন্দৰ্ভত প্ৰতিক্ৰিয়া প্ৰকাশ কৰি শনিবাৰে পশ্চিমবংগৰ মুখ্যমন্ত্ৰী মমতা বেনাৰ্জীয়ে ঘোষণা কৰে যে তেওঁৰ চৰকাৰে সংশোধিত আইনখন ৰাজ্যত কাৰ্যকৰী নকৰে ।

এই আশ্বাসৰ পিছতো জিলাখনৰ কিছু অংশত হিংসাত্মক পৰিস্থিতি অব্যাহত আছিল, যাৰ ফলত আইনী আৰু ৰাজনৈতিক সঁহাৰিৰ সৃষ্টি হৈছিল । বিজেপি নেতা তথা বিৰোধী দলপতি শুভেন্দু অধিকাৰীয়ে দাখিল কৰা আবেদনৰ ভিত্তিত কলিকতা উচ্চ ন্যায়ালয়ে হিংসাত্মক পৰিস্থিতিৰ সৃষ্টি কৰা অঞ্চলসমূহত আইন-শৃংখলা পুনৰুদ্ধাৰৰ বাবে কেন্দ্ৰীয় সশস্ত্ৰ আৰক্ষী বাহিনী (চিএপিএফ) নিয়োগ কৰাৰ নিৰ্দেশ দিয়ে ।