জঘন্য! চলন্ত ৰে’লতে মহিলাৰ ওপৰত দুষ্কৰ্মৰ চেষ্টা দুৰ্বৃত্তৰ, ৰক্ষা কৰিলে আন যাত্ৰীয়ে

প্ৰতিনিধিত্বমূলক ছবি

দেশজুৰি ইটোৰ পিছত সিটোকৈ ধৰ্ষণৰ ঘটনাই এক উদ্বেগজনক পৰিস্থিতিৰ সৃষ্টি কৰাৰ সময়তে এইবাৰ চলন্ত ৰে’লত এক দুৰ্বৃত্তৰ যৌন উৎপীড়ণৰ বলি হৈছে এগৰাকী বিশেষভাৱে সক্ষম মহিলা। ৰে’লখনত থকা যাত্ৰীসকলৰ প্ৰচেষ্টাত কথমপি দুৰ্বৃ্ত্তৰ দ্বাৰা ধৰ্ষণৰ বলি হোৱাৰ পৰা ৰক্ষা পৰিছে মহিলাগৰাকী। এই ঘটনা সংঘটিত হৈছে উৰিষ্যাত। পুৰীৰ পৰা ঋষিকেশ অভিমুখে যাত্ৰা কৰা উৎকল এক্সপ্ৰেছ ৰে’লত এগৰাকী বিশেষভাৱে সক্ষম মহিলাক বলপূৰ্বক ধৰ্ষণ কৰিবলৈ চেষ্টা কৰিছিল ৰে’লখনৰ ডাইনিং কাৰৰ এগৰাকী কৰ্মচাৰীয়ে। মহিলাগৰাকী বাথৰুমলৈ যোৱা সময়তে কৰ্মচাৰীজনে এই দুষ্কাৰ্য কৰিবলৈ চেষ্টা কৰে।

এনে আতিশয্যৰ বলি হোৱা মহিলাগৰাকীয়ে লগে লগে দুৰ্বৃত্তৰ পৰা ৰক্ষা পাবলৈ চিঞৰ লগায় আৰু তেওঁৰ চিঞৰ শুনি ডবাটোত থকা একাংশ যাত্ৰীয়ে আগবাঢ়ি গৈ বাথৰুমৰ দুৱাৰখন খুলি দিয়ে। লগে লগে পোহৰলৈ আহে এই জঘন্য ঘটনা। প্ৰকাশিত খবৰ অনুসৰি যোৱা নিশা প্ৰায় ২ বজাৰ পৰা তিনি বজাৰ ভিতৰত চলন্ত ৰে’লখনৰ ভিতৰত এই ঘটনা সংঘটিত হয়।

চলন্ত ৰে’লখন কটক আৰু জাজপুৰৰ মাজ পাওঁতেই এটা এচি ডবাত সংঘটিত হয় এই ঘটনা। ৰে’লৰ ডাইনিং কাৰৰ এজন কৰ্মচাৰীয়ে শৌচাগাৰৰ ভিতৰত বিশেষভাৱে সক্ষম মহিলা যাত্ৰীগৰাকীক ধৰ্ষণ কৰিবলৈ চেষ্টা চলাইছিল। উৰিষ্যাৰ নয়াগড়স্থিত মাতৃগৃহৰ পৰা উত্তৰ প্ৰদেশৰ স্বামীগৃ্হলৈ ৰাওনা হৈছিল মহিলাগৰাকী।

যাত্ৰাৰ সময়ত ৰাতি ২ৰ পৰা ৩ বজাৰ ভিতৰত মহিলাগৰাকী টয়লেটলৈ যোৱাৰ সময়তে ৰামজিৎ সিং নামৰ ডাইনিং কাৰৰ কৰ্মচাৰীজনো তেওঁৰ পিছে পিছে মহিলাগৰাকীৰ পিছে পিছে বাথৰুমলৈ গৈ ধৰ্ষণৰ চেষ্টা কৰে। এনে ঘটনাত আতংকিত মহিলাগৰাকীয়ে নিজকে ৰক্ষা কৰিবলৈ চেষ্টা কৰি চিঞৰিবলৈ ধৰিলে।

মহিলাগৰাকীৰ চিঞৰ শুনি ৰে’লত উপস্থিত থকা আন যাত্ৰীসকলে ততাতৈয়াকৈ শৌচাগাৰৰ দুৱাৰখন খুলি মহিলাগৰাকীক ৰক্ষা কৰে আৰু ৰে’লখন চক্ৰধৰপুৰ পোৱাৰ লগে লগে অভিযুক্তক আৰ পি এফ জোৱানৰ হাতত গতাই দিয়ে। ইতিমধ্যে অভিযুক্ত ৰামজিৎ সিঙক গ্ৰেপ্তাৰ কৰিছে আৰক্ষীয়ে।

আনহাতে উৎপীড়ণৰ বলি হোৱা মহিলাগৰাকীয়ে নাবালক পুত্ৰৰ সৈতে যাত্ৰা কৰিছিল বুলি জানিব পৰা গৈছে। এই ঘটনা পোহৰলৈ অহাৰ পিছতে নাৰী সুৰক্ষাৰ বিষয়ক লৈ পুনৰবাৰ প্ৰশ্ন উত্থাপিত হৈছে।