বাংলাদেশী নাগৰিকৰ অনুপ্ৰৱেশত সহায় কৰা ১১ দালালক আটক…

ভাৰত বাংলাদেশ সীমান্ত

ভাৰতত বাংলাদেশৰ নাগৰিকৰ অবৈধ প্ৰৱেশৰ সৈতে জড়িত এটা চক্ৰক মঙলবাৰে আটক কৰিবলৈ সক্ষম হৈছে দিল্লী আৰক্ষীয়ে । অভিযোগ উঠিছে যে, এই চক্ৰটোৱে বাংলাদেশী নাগৰিকৰ অনুপ্ৰৱেশত বিভিন্ন ধৰণে সহায় কৰি আহিছিল । পিটিআইৰ প্ৰতিবেদন অনুসৰি, অনুপ্ৰৱেশৰ সৈতে জড়িত থকা অপৰাধত ১১ জনকৈ লোকক আটক কৰিছে দিল্লী আৰক্ষীয়ে ।

জানিব পৰা মতে, আটক কৰা এই লোক কেইজনৰ ভিতৰত ৫ জন বাংলাদেশী নাগৰিক বুলি চিনাক্ত কৰা হৈছে । অভিযুক্তই ভুৱা নথি-পত্ৰ ব্যৱহাৰ কৰি বাংলাদেশী নাগৰিকক জংঘল পথ আৰু এক্সপ্ৰেছ ৰে’লৰ জৰিয়তে ভাৰতৰ ভূখণ্ডত প্ৰৱেশ কৰিবলৈ সুবিধা প্ৰদান কৰি আহিছিল । এই চক্ৰটোৱে অনুপ্ৰৱেশৰ বাবে ভুৱা আধাৰ, ভোটাৰ আইডি কাৰ্ড আৰু ভুৱা ৱেবছাইটৰ জৰিয়তে সৃষ্টি কৰা অন্যান্য নথি-পত্ৰ ব্যৱহাৰ কৰিছিল বুলি জানিব পৰা গৈছে ।

উল্লেখ্য যে, ৰাজধানী দিল্লীত অবৈধ বাংলাদেশীক চিনাক্তকৰণৰ বাবে বিশেষ অভিযান অব্য়াহত ৰাখিছে দিল্লী আৰক্ষীয়ে । এই অভিযান কালতে এই ১১ জনকৈ লোকক আটক কৰিছে আৰক্ষীয়ে । মনকৰিবলগীয়া যে, ৰাষ্ট্ৰীয় ৰাজধানীত বাস কৰা অবৈধ বাংলাদেশী অনুপ্ৰৱেশকাৰীক চিনাক্ত কৰি কঠোৰ ব্যৱস্থা গ্ৰহণৰ বাবে মুখ্য সচিব আৰু আৰক্ষী আয়ুক্তক দুমাহৰ বাবে বিশেষ অভিযান আৰম্ভ কৰিবলৈ নিৰ্দেশ দিছে দিল্লীৰ উপ-ৰাজ্যপালে।

ইফালে কেৱল ৰাজধানী দিল্লীতে অবৈধ বাংলাদেশীক লৈ অধিক সতৰ্কতা অৱলম্বন কৰা হৈছে এনে নহয়, অসমতো বাংলাদেশী নাগৰিকৰ অনুপ্ৰৱেশকৈ অধিক সতৰ্কতা অৱলম্বন কৰিছে অসম আৰক্ষীয়ে । যোৱা সোমবাৰে অসমৰ মুখ্য়মন্ত্ৰী হিমন্ত বিশ্ব শৰ্মাই জানিবলৈ দিয়া অনুসৰি, ভাৰতৰ ভূখণ্ডত অবৈধভাৱে প্ৰৱেশ কৰাৰ অপৰাধত দুটা ভিন্ন অভিযানত অসম আৰক্ষীয়ে শিশুসহ ২২ জন বাংলাদেশীক আটক কৰি পুনৰ বিতাৰিত কৰে ।

এটা অভিযানত বাংগালুৰুৰ পৰা গুৱাহাটী ৰে’লৱে ষ্টেচনত উপস্থিত হোৱাৰ পিছত দক্ষিণ শালমৰা- মানকাচৰ জিলাৰ দিশে গৈ থকা অৱস্থাত শিশু-মহিলাসহ ১৬ গৰাকী বাংলাদেশী নাগৰিকক আটক কৰে অসম আৰক্ষীয়ে । ইয়াৰ পাছতে আৰক্ষীৰ তদন্তত তেওঁলোক বাংলাদেশী বুলি নিশ্চিত হয় । পৰৱৰ্তী সময়ত অইনী প্ৰক্ৰিয়া অনুসৰি তেওঁলোকক পুনৰ বাংলাদেশলৈ বিতাৰিত কৰে অসম আৰক্ষীয়ে ।

সামাজিক মাধ্যম এক্স হেণ্ডেলৰ আন এটা পোষ্টৰ জৰিয়তে মুখ্যমন্ত্ৰী শৰ্মাই জানিবলৈ দিয়ে যে, ভাৰত-বাংলাদেশ সীমান্তৰে অবৈধভাৱে ভাৰতত প্ৰৱেশ কৰিবলৈ চেষ্টা কৰা ৬ বাংলাদেশী নাগৰিকক আটক কৰে আৰক্ষীয়ে । ইয়াৰ পাছতে আইন প্ৰক্ৰিয়া অনুসৰি, তেওঁলোকক পুনৰ বাংলাদেশ কৰ্তৃপক্ষক গতাই দিয়ে অসম আৰক্ষীয়ে । অৱশ্যে তেওঁলোকক কোন স্থানৰ পৰা বিতাৰিত কৰা হৈছে সেই কথা উল্লেখ কৰা নাই মুখ্যমন্ত্ৰী শৰ্মাই ।

ইফালে, যোৱা দেওবাৰে অসমৰ সোণাপুৰতো দুই বাংলাদেশী নাগৰিকক আটক কৰাৰ খবৰ লাভ কৰা গৈছিল । অভিযোগ উঠিছিল যে, এই বাংলাদেশী দুজনে ২০০০ টকাৰ বিনিময়ত দালালৰ সহায়ত অবৈধভাৱে ভাৰতত প্ৰৱেশ কৰিছিল ।