‘অটল পেঞ্চন যোজনা’ৰ নিয়ম সলনি, কিদৰে কৰিব পঞ্জীয়ন জানক

অটল পেঞ্চন যোজনাৰ গ্ৰাহক পঞ্জীয়ন প্ৰ-পত্ৰ সংশোধন কৰিছে চৰকাৰে। ডাক বিভাগে জাৰি কৰা কাৰ্যালয়ৰ স্মাৰকপত্ৰ অনুসৰি ১ অক্টোবৰৰ পৰা নতুন পঞ্জীয়নৰ বাবে কেৱল নতুন, সংশোধিত APY প্ৰ-পত্ৰহে গ্ৰহণ কৰা হ’ব। এই পৰিৱৰ্তন পেঞ্চন ফাণ্ড ৰেগুলেটৰী এণ্ড ডেভেলপমেণ্ট অথৰিটিৰ (পিএফআৰডিএ) নতুন নিৰ্দেশনা অনুসৰি এই সামাজিক সুৰক্ষা আঁচনিৰ অধীনত লোকসকলৰ বাবে পঞ্জীয়ন প্ৰক্ৰিয়া সহজ কৰি তোলা হৈছে।

২০২৫ চনৰ ৩০ ছেপ্টেম্বৰৰ পিছত এই পুৰণি পঞ্জীয়ন প্ৰ-পত্ৰখন আৰু কেন্দ্ৰীয় অভিলেখ ৰখা সংস্থা প্ৰটিয়ানে (পূৰ্বতে এন এছ ডি এল) গ্ৰহণ নকৰিব।

অটল পেঞ্চন যোজনা (APY) কি?

অটল পেঞ্চন যোজনা চমুকৈ এপিৱাইয়ে দেশৰ অসংগঠিত ক্ষেত্ৰৰ শ্ৰমিকৰ পেঞ্চন আঁচনি। এই আঁচনিৰ অধীনত সদস্যসকলে ৬০ বছৰ বয়সত ১০০০ টকাৰ পৰা ৫০০০ টকা লৈকে নিশ্চিত নূন্যতম মাহেকীয়া পেঞ্চন লাভ কৰে। পেঞ্চনৰ পৰিমাণ সদস্যজনে দিয়া মাহিলী বৰঙণিৰ ওপৰত নিৰ্ভৰ কৰে। যিকোনো ভাৰতীয় নাগৰিকে এই আঁচনিত যোগদান কৰিব পাৰিব।

APY ৰ বাবে যোগ্যতা

অটল পেঞ্চন যোজনাৰ বাবে আবেদনকাৰী ভাৰতৰ নাগৰিক হ’ব লাগিব, বয়স ১৮ৰ পৰা ৪০ বছৰৰ ভিতৰত হ’ব লাগিব, আৰু চেভিংছ বেংক বা ডাকঘৰৰ একাউণ্ট থাকিব লাগিব। ১ অক্টোবৰ, ২০২২ বা তাৰ পিছত আয়কৰদাতা হ’ব নালাগে। পঞ্জীয়নৰ সময়ত আবেদনকাৰীয়ে সময়মতে একাউণ্টৰ তথ্য লাভ কৰিবলৈ বেংকক আধাৰ নম্বৰ আৰু মোবাইল নম্বৰ দিব পাৰিব।

নতুন APY ফৰ্মৰ বৈশিষ্ট্যসমূহ

নতুন প্ৰ-পত্ৰত এতিয়া বাধ্যতামূলক FATCA/CRS ঘোষণা অন্তৰ্ভুক্ত কৰা হৈছে। এই ঘোষণাই আবেদনকাৰীজন বিদেশৰ নাগৰিক নে তাত কৰ আদায় কৰে সেইটো নিৰ্ণয় কৰাত সহায় কৰে। কেৱল আৱাসী ভাৰতীয় নাগৰিকেহে ডাকঘৰৰ জৰিয়তে এ পি ৱাই একাউণ্ট খুলিব পাৰিব, কিয়নো এই একাউণ্টসমূহ ডাক সঞ্চয় একাউণ্টৰ সৈতে সংযুক্ত। সকলো ডাকঘৰক নতুন নিৰ্দেশনাসমূহ ৰাজহুৱাভাৱে প্ৰদৰ্শন কৰিবলৈ আৰু নতুন এপিৱাই পঞ্জীয়নৰ বাবে কেৱল আপডেট কৰা প্ৰ-পত্ৰখনহে ব্যৱহাৰ কৰাটো নিশ্চিত কৰিবলৈ নিৰ্দেশ দিয়া হৈছে।