কিমান সম্পত্তিৰ গৰাকী এম এছ ধোনী? কেৱল ক্ৰিকেটতে নহয়, ব্যৱসায়টো বিস্তাৰ কৰিছে নিজৰ আধিপত্য…

মহেন্দ্ৰ সিং ধোনী

আজি ৪৪ সংখ্যক জন্মদিন উদযাপন কৰিছে ভাৰতীয় দলৰ প্ৰাক্তন অধিনায়ক মহেন্দ্ৰ সিং ধোনীয়ে।  মহেন্দ্ৰ সিং ধোনী কেৱল ভাৰতৰ অন্যতম সফল অধিনায়ক নহয়, এতিয়া তেওঁক দেশৰ ধনী খেলুৱৈৰ তালিকাত অন্তৰ্ভুক্ত কৰা হৈছে। এতিয়া ১০৪০ কোটি টকা অতিক্ৰম কৰিছে তেওঁৰ মুঠ সম্পত্তিয়ে। যদি আপুনি ভাবিছে যে এই সকলোবোৰ উপাৰ্জন কেৱল ক্ৰিকেটৰ পৰাই হৈছে, তেন্তে সেয়া নহয়।

আচলতে ধোনিৰ আয়ৰ বহু উৎস আছে। তেওঁ কৃষি, ব্যৱসায়, ব্ৰেণ্ড এণ্ডাৰছমেণ্ট, বিনিয়োগ আদি বহু ক্ষেত্ৰত নিজৰ পৰিসৰ বিয়পাইছে। এতিয়া ধোনিৰ সেই ব্যৱসায় আৰু উদ্যোগৰ বিষয়ে জানো আহক যিয়ে তেওঁক খেলপথাৰৰ বাহিৰতো এজন সফল ব্যৱসায়ী কৰি তুলিছে।

কৃষি ব্যৱসায়

ধোনী খেতিৰ প্ৰতি খুবেই আকৰ্ষিত। তেওঁ নিজৰ গৃহ চহৰ ৰাঁচীত জৈৱিক খেতি কৰে। ষ্ট্ৰবেৰী, তৰমুজ, শাক-পাচলি আৰু ফুলৰ খেতিও কৰে। তেওঁৰ খেতিৰ পৰিসৰ এতিয়া ইমানেই বাঢ়িছে যে তেওঁ দেশৰ বহু ঠাইলৈ উৎপাদিত সামগ্ৰী যোগান ধৰে।

ধোনিৰ কাপোৰৰ ব্ৰেণ্ড

Seven নামেৰে ধোনিৰ এটা স্প’ৰ্টছ এপাৰেল ব্ৰেণ্ড আছে, যাৰ ব্ৰেণ্ড এম্বেছাদৰ তেওঁ নিজেই। এই ব্ৰেণ্ডৰ জোতা, কাপোৰ আৰু ক্ৰীড়া সাজ অনলাইন আৰু অফলাইন দুয়োটা প্লেটফৰ্মতে উপলব্ধ।

হোটেল বিজনেছ মাহি ৰেচিডেন্সি

ধোনিয়ে হোটেল উদ্যোগতো প্ৰৱেশ কৰিছে। ৰাঁচীত অৱস্থিত তেওঁৰ হোটেল মাহী ৰেচিডেন্সি সাধাৰণ লোকৰ মাজত যথেষ্ট জনপ্ৰিয়। ই কোনো পঞ্চতাৰকা হোটেল নহয় যদিও তাত Airbnb, OYO আৰু MakeMyTrip ৰ দৰে প্লেটফৰ্মৰ পৰা সহজেই বুকিং কৰিব পাৰি।

এম এছ ধোনী গ্ল’বেল স্কুল

টেক জায়ান্ট সত্য নাডেলা ( (CEO, Microsoft) )ৰ সৈতে বেংগাৰুলুত এম এছ ধোনী গ্ল’বেল স্কুল (  MS Dhoni Global School) আৰম্ভ কৰিছে ধোনীয়ে। এই ইংৰাজী মাধ্যমৰ বিদ্যালয়খন চিবিএছইৰ পাঠ্যক্ৰমৰ ওপৰত ভিত্তি কৰি গঢ় লৈ উঠিছে, য’ত আধুনিক প্ৰযুক্তি আৰু বিশেষজ্ঞৰ সহায়ত শিক্ষা প্ৰদান কৰা হয়।

বিনিয়োগ আৰু পানীয় ব্ৰেণ্ড

ধোনীয়ে 7Ink Brews নামৰ এটা পানীয় আৰু চকলেট ব্ৰেণ্ড কোম্পানীত বিনিয়োগ কৰিছে। এই কোম্পানীটোৰ জনপ্ৰিয় চকলেট ব্ৰেণ্ড হৈছে Copter7, যাৰ নাম ধোনিৰ বিখ্যাত “হেলিকপ্টাৰ শ্বট”ৰ পৰা অনুপ্ৰাণিত।

ব্ৰেণ্ড এণ্ডাৰছমেণ্টৰ পৰা কোটি কোটি উপাৰ্জন

ধোনী বহু বিখ্যাত ব্ৰেণ্ডৰ সৈতে জড়িত আৰু বিজ্ঞাপনৰ চুক্তিৰ জৰিয়তেও বহু টকা উপাৰ্জন কৰে। তেওঁৰ নিৰ্ভৰযোগ্য আৰু শান্ত ভাবমূৰ্তিয়ে তেওঁক ব্ৰেণ্ডৰ বাবে এখন নিখুঁত মুখ কৰি তুলিছে।

আজি মহেন্দ্ৰ সিং ধোনী কেৱল এজন ক্ৰিকেটাৰ নহয়, এজন ব্ৰেণ্ড, ব্যৱসায়ী আৰু বিনিয়োগকাৰী হৈ পৰিছে। খেলৰ পৰা অৱসৰ লোৱাৰ পিছতো তেওঁ যিদৰে জনপ্ৰিয়তা আৰু উপাৰ্জন অব্যাহত ৰাখিছে সেয়া প্ৰতিজন যুৱকৰ বাবে এক প্ৰেৰণা। খেলপথাৰৰ বাহিৰতো মাহীৰ প্ৰতি অনুৰাগীৰ স্নেহ অক্ষত হৈ আছে।

বিচিচিআইয়ে কিমান টকা দিয়ে?

ক্ৰিকফিটৰ এক প্ৰতিবেদন অনুসৰি মহেন্দ্ৰ সিং ধোনীয়ে ভাৰতৰ হৈ ৯০ খন টেষ্ট, ৩৫০ খন এদিনীয়া আৰু ৯৮ খন টি-২০ আন্তঃৰাষ্ট্ৰীয় মেচ খেলিছে। এই ভিত্তিত তেওঁ বিচিচিআইৰ পৰা প্ৰতিমাহে ৭০ হাজাৰ টকাৰ পেঞ্চন লাভ কৰে। এই ধনৰাশি পূৰ্বৰ টেষ্ট খেলুৱৈৰ উচ্চ শ্ৰেণীত পৰে, যাৰ পেঞ্চন ৫০ হাজাৰ টকাৰ পৰা ৭০ হাজাৰ টকালৈ বৃদ্ধি কৰা হৈছিল।