২০২৬ত বিজেপিয়েই জিকিব! জুবিনক ৰাজনীতিৰ পৰা ১০০০ কিলোমিটাৰ দূৰত ৰখাৰ প্ৰতিশ্ৰুতি মুখ্যমন্ত্ৰীৰ

হিমন্ত বিশ্ব শৰ্মা

জুবিন গাৰ্গক লৈ পুনৰ এবাৰ মন্তব্য কৰিছে মুখ্যমন্ত্ৰী হিমন্ত বিশ্ব শৰ্মাই। জুবিন গাৰ্গৰ মৃত্যুৰ বিষয়টোক লৈ ৰাজনীতি কৰা বুলি চৰকাৰৰ বিৰুদ্ধে বহুতেই অভিযোগ উত্থাপন কৰিছে। তাৰ মাজতে মুখ্য়মন্ত্ৰী তথা বিজেপি দলে বাৰে বাৰে এই কথা অস্বীকাৰ কৰি আহিছে। ইয়াৰ বিপৰীতে বিজেপিয়ে অভিযোগ উত্থাপন কৰিছে যে কংগ্ৰেছ আৰু আন ৰাজনৈতিক দলেহে জুবিন গাৰ্গৰ নামত লেতেৰা ৰাজনীতি চলাই আছে।

মুখ্যমন্ত্ৰী হিমন্ত বিশ্ব শৰ্মাই তেওঁৰ চৰকাৰে জুবিন গাৰ্গৰ গোচৰটোক লৈ গ্ৰহণ কৰা পদক্ষেপৰ ভিত্তিত ২০২৬ চনৰ বিধানসভা নিৰ্বাচনত ৰাইজে বিজেপিক সমৰ্থন কৰিব বুলি উল্লেখ কৰাৰ লগতে বিৰোধী দলসমূহে বিষয়টোৰ আঁৰ লৈ হিন্দুৰ বিৰুদ্ধে অভিযান চলোৱাৰ অভিযোগ উত্থাপন কৰিছে।

শুকুৰবাৰে শিলচৰত সাংবাদিকৰ সৈতে হোৱা এক সাক্ষাৎকাৰত শৰ্মাই কয় যে তেওঁৰ চৰকাৰে জুবিন গাৰ্গৰ মৃতদেহ ছিংগাপুৰৰ পৰা ঘূৰাই আনিছিল, তেওঁক সন্মানজনকভাৱে অন্ত্যেষ্টিক্ৰিয়াৰ ব্যৱস্থা কৰিছিল আৰু ন্যায়ৰ দিশত আগবাঢ়িব পৰাকৈ তদন্ত আৰম্ভ কৰিছিল। জুবিন গাৰ্গক চাৰ্জ শ্বীট আৰু ন্যায় দিব বুলিও কয় মুখ্যমন্ত্ৰী শৰ্মাই।

অৱশ্যে এই গোচৰটো নিৰ্বাচনী ৰাজনীতিৰ পৰা আঁতৰাই ৰখাত গুৰুত্ব আৰোপ কৰিছিল মুখ্যমন্ত্ৰীগৰাকীয়ে। “জুবিন গাৰ্গক ৰাজনীতিৰ পৰা ১০০০ কিলোমিটাৰ দূৰত ৰাখিম। মই জুবিন গাৰ্গৰ নামেৰে ভোট বিচৰা নাই। যদি ভোটাৰসকলে জুবিন গাৰ্গক মনত ৰাখি বিজেপিক বাছি লয় তেন্তে সেয়া হ’ব চৰকাৰে সমগ্ৰ বিষয়টো সঠিকভাৱে চম্ভালি লোৱাৰ বাবে।” মুখ্যমন্ত্ৰীয়ে কয়।

বিৰোধী দলসমূহকো চোকা আক্ৰমণ কৰে শৰ্মাই। তেওঁলোকে শিল্পীগৰাকীৰ নাম ব্যৱহাৰ কৰি এটা নিৰ্দিষ্ট সম্প্ৰদায়ক লক্ষ্য কৰি লৈছে বুলি অভিযোগ উত্থাপন কৰে মুখ্যমন্ত্ৰীয়ে। কংগ্ৰেছ আৰু তেওঁলোকৰ মিত্ৰ দলসমূহে জুবিনৰ নাম ব্যৱহাৰ কৰি হিন্দু সম্প্ৰদায়ৰ বিৰুদ্ধে অসমত অভিযান চলাই আছে বুলি দাবী কৰে মুখ্যমন্ত্ৰী শৰ্মাই।

বিশেষকৈ ৰাইজৰ দলৰ বিধায়ক অখিল গগৈক সমালোচনা কৰি মুখ্যমন্ত্ৰীয়ে বিজেপিৰ প্ৰকৃত বিৰোধিতা কৰাতকৈ সাম্প্ৰদায়িক উত্তেজনা জগাই তোলাৰ অভিযোগ উত্থাপন কৰে। “অখিল গগৈয়ে বিজেপিৰ বিৰোধিতা কৰা নাই। তেওঁ হিন্দু জনসাধাৰণৰ বিৰুদ্ধে হিংসা জগাই তুলিছে।” শৰ্মাই অভিযোগ কৰে।

বিৰোধীৰ কাৰ্যক লৈ প্ৰশ্ন উত্থাপন কৰি মুখ্যমন্ত্ৰীয়ে কয়, “তেওঁলোকে কিয় জুবিন গাৰ্গৰ পৰিচয় অস্বীকাৰ কৰিছে। তেওঁলোকে দাবী কৰে যে জুবিনৰ কোনো জাতি নাছিল, কিন্তু তেওঁ অসমীয়া নাছিল নেকি? তেওঁলোকে কয় জুবিনৰ কোনো ধৰ্ম নাছিল। কিয়? তেওঁ হিন্দু নাছিল নেকি?”

বিজেপিৰ নিৰ্বাচনী সম্ভাৱনাৰ ওপৰত আস্থা প্ৰকাশ কৰি শৰ্মাই এই বিতৰ্কৰ পৰা যিকোনো সম্ভাৱ্য ৰাজনৈতিক ক্ষতিক নুই কৰে। “অখিল গগৈৰ দৰে মানুহে জুবিন গাৰ্গৰ নাম ব্যৱহাৰ কৰি বিজেপিৰ ক্ষতি কৰিব নোৱাৰে। নিৰ্বাচনত বিজেপি নিশ্চয় জয়ী হ’ব, কিন্তু তেওঁলোকে হিন্দু সম্প্ৰদায়ৰ বিৰুদ্ধে ষড়যন্ত্ৰ ৰচনা কৰিছে।” তেওঁ কয়।