টাই আহোমক জনজাতিকৰণত প্ৰতাৰণাৰ অভিযোগঃ অমিত শ্বাহৰ অসম ভ্ৰমণৰ বিৰোধিতাৰে টাইপাৰ প্ৰতিবাদ

টাইপাৰ প্ৰতিবাদ

দুদিনীয়া ভ্ৰমণসূচীৰে বৃহস্পতিবাৰে অসমত উপস্থিত হৈছে কেন্দ্ৰীয় গৃহমন্ত্ৰী অমিত শ্বাহ। অসমত উপস্থিত হোৱাৰ পিছতে কেন্দ্ৰীয় গৃহমন্ত্ৰীগৰাকীয়ে ভিন্ন কাৰ্যসূচীত অংশগ্ৰহণ কৰিছে। ইফালে অমিত শ্বাহৰ অসম ভ্ৰমণৰ বিৰোধিতাৰে ৰাজ্যৰ ভিন্ন স্থানত প্ৰতিবাদ সাব্যস্ত কৰিছে টাই আহোম যুৱ পৰিষদ, অসম (টাইপা)- ই। জনগোষ্ঠীয় সংগঠনটোৱে টাই আহোমক জনজাতিকৰণৰ ক্ষেত্ৰত কেন্দ্ৰীয় চৰকাৰে চূড়ান্ত প্ৰতাৰণা কৰাৰ অভিযোগ তুলি গৃহমন্ত্ৰী অমৃত শ্বাহৰ অসম ভ্ৰমণৰ বিৰোধিতা কৰিছে।

কেন্দ্ৰীয় গৃহমন্ত্ৰীগৰাকীৰ ভ্ৰমণৰ বিৰোধিতাৰে টাইপাই উজনিৰ কেইবাখনো জিলাত ক’লা পতাকা প্ৰদৰ্শন কৰি প্ৰতিবাদ সাব্যস্ত কৰে। টাইপাৰ লখিমপুৰ জিলা সমিতিয়ে আজি এক প্ৰতিবাদী কাৰ্যসূচী গ্ৰহণ কৰি টাই আহোম জনগোষ্ঠীক জনজাতিৰ মৰ্যদা প্ৰদানৰ ক্ষেত্ৰত কেন্দ্ৰীয় চৰকাৰ আৰু ৰাজ্য চৰকাৰে দীৰ্ঘদিন ধৰি আভূৱা ভৰি আহিছে বুলি অভিযোগ কৰে।

টাইপাৰ দাবী, বিগত বিধানসভা আৰু লোকসভা নিৰ্বাচনৰ প্ৰাক মুহূৰ্তত চৰকাৰে টাই আহোমকে ধৰি ছয় জনগোষ্ঠীক জনজাতি প্ৰদান কৰাৰ প্ৰতিশ্ৰুতি প্ৰদান কৰিছিল যদিও সেয়া নিৰ্বাচনী বৈতৰণি পাৰ হোৱাৰ আভূৱা ভৰা প্ৰতিশ্ৰুতিহে আছিল। কেন্দ্ৰীয় চৰকাৰে দীৰ্ঘদিন ধৰি আভূৱা ভৰা কথাৰে জনজাতিকৰণ প্ৰদানৰ বিষয়টোত হেমাহি কৰি আহিছে বুলি সংঠনটোৱে দাবী কৰে।

অনাগত সময়ত প্ৰধানমন্ত্ৰী আৰু গৃহমন্ত্ৰীৰ অসম ভ্ৰমণৰ সময়ত এনে প্ৰতিবাদী কাৰ্যসূচী গ্ৰহণ কৰা হ’ব বুলি টাইপাৰ লখিমপুৰ জিলা সমিতিৰ এগৰাকী বিষয়াই হুংকাৰ দিয়ে। ইফালে গৃহমন্ত্ৰী শ্বাহৰ অসম ভ্ৰমণৰ বিৰোধিতা কৰি শিৱসাগৰতো টাইপাই প্ৰতিবাদী কাৰ্যসূচী গ্ৰহণ কৰে। সংগঠনটোৱে কয়, “প্ৰধানমন্ত্ৰী নাইবা কেন্দ্ৰীয় গৃহমন্ত্ৰী অসমলৈ আহিলে নিয়মমতে আমি আনন্দিত হব লাগে।”

“তেওঁলোক অসমলৈ আহিলে উন্নয়নৰ প্ৰতিশ্ৰুতি লৈ অসমলৈ আহিব বুলি ধাৰণা কৰা যায়। কিন্তু কেন্দ্ৰীয় চৰকাৰে ছয় জনগোষ্ঠীৰ জনজাতিকৰণৰ ক্ষেত্ৰত যি ভুৱা প্ৰতিশ্ৰুতি প্ৰদান কৰি আহিছে তাৰ বিৰুদ্ধে আমাৰ প্ৰতিবাদ অব্যাহত থাকিব।” এই মন্তব্য কৰে টাইপাৰ শিৱসাগৰ শাখাৰ এগৰাকী নেতাই। টাইপাৰ কেন্দ্ৰীয় সমিতিৰ আহ্বানত অমিত শ্বাহৰ অসম ভ্ৰমণৰ বিৰোধিতাৰে গোলাঘাটতো এনে প্ৰতিবাদী কাৰ্যসূচী ৰূপায়ণ কৰা হয়।