বন্ধ কৰিব লাগে গোৱালপাৰৰ উচ্ছেদ অভিযান, মুখ্যমন্ত্ৰীলৈ পত্ৰ বিৰোধী দলপতি দেৱব্ৰত শইকীয়াৰ

গোৱালপাৰাত উচ্ছেদ

উচ্ছেদক লৈ উত্তাল গোৱালপাৰা জিলা। সোমবাৰে জিলাখনত বেদখলৰ বিৰুদ্ধে ব্যাপক উচ্ছেদ অভিযান চলাইছিল প্ৰশাসনে। প্ৰায় ৬৯৩ টা পৰিয়ালক উচ্ছেদ কৰা হয় জলাশয়ৰ চৰকাৰী ভূমিৰ পৰা। এই ভূমিত অবৈধভাৱে বসবাস কৰাৰ অভিযোগত পৰিয়াল কেইটাক উচ্ছেদ কৰা হয়। ইফালে এই উচ্ছেদক লৈ চৰকাৰৰ বিৰুদ্ধে সৰব হৈ পৰিছে বিৰোধী কংগ্ৰেছ ।

অসমৰ বিৰোধী দলপতি দেৱব্ৰত শইকীয়াই মুখ্যমন্ত্ৰী হিমন্ত বিশ্ব শৰ্মালৈ পত্ৰ প্ৰেৰণ কৰি গোৱালপাৰা জিলাৰ জলাশয় বিশেষকৈ হাচিলা বিল আৰু ৰাক্ষশিনী অঞ্চলত বসবাস কৰা ভূমিহীন পৰিয়ালৰ বিৰুদ্ধে অব্যাহত থকা উচ্ছেদ বন্ধ কৰিবলৈ আহ্বান জনাইছে। উচ্চতম ন্যায়ালয়ৰ নিৰ্দেশনা আৰু ভাৰতীয় নাগৰিকৰ বাবে আশ্ৰয়ৰ সাংবিধানিক নিশ্চয়তা অনুসৰি উচ্ছেদৰ পূৰ্বে পুনৰ্বাসন হ’ব লাগে বুলি শইকীয়াই গুৰুত্ব আৰোপ কৰে।

১৭ জুন তাৰিখে লিখা পত্ৰত শইকীয়াই আঙুলিয়াই দিয়ে যে ১৬ জুনত উচ্ছেদ কৰা কেইবাটাও পৰিয়ালে ৪০ বছৰৰো অধিক সময় ধৰি অঞ্চলটোত বাস কৰি আহিছে। কোনো বিকল্প মাটি বা আশ্ৰয় শিবিৰ নাই। তেওঁ জোৰ দি কয় যে মৰ্যাদা অবিহনে স্থানচ্যুতি “উন্নয়ন নহয়,” আৰু মানৱ অধিকাৰ তথা প্ৰধানমন্ত্ৰী নৰেন্দ্ৰ মোদীৰ “সকলোৰে বাবে গৃহ নিৰ্মাণ”ৰ দৃষ্টিভংগী ৰক্ষাৰ বাবে শইকীয়াই আহ্বান জনায়।

কংগ্ৰেছ নেতাগৰাকীয়ে আৰু উল্লেখ কৰে যে কেন্দ্ৰীয় সামাজিক ন্যায় আৰু সৱলীকৰণৰ ৰাজ্যিক মন্ত্ৰী ৰামদাস আঠাৱালেও অসমৰ মুখ্যমন্ত্ৰীলৈ পত্ৰ লিখি যিকোনো উচ্ছেদৰ পূৰ্বে বিকল্প ভূমিৰ ব্যৱস্থা কৰিবলৈ অনুৰোধ জনাইছিল। শইকীয়াই ১৮ জুনত ক্ষতিগ্ৰস্ত বাসিন্দাসকলৰ সৈতে মুখ্যমন্ত্ৰীৰ নিৰ্ধাৰিত বৈঠকলৈকে হ’লেও উচ্ছেদ অভিযান স্থগিত ৰাখিবলৈ আহ্বান জনায়, আৰু সেই অনুসৰি গোৱালপাৰা উপায়ুক্তক নিৰ্দেশ দিবলৈ অনুৰোধ জনায়।

অসম চৰকাৰে সোমবাৰে গোৱালপাৰা আৰু বঙাইগাঁও জিলা দুখনৰ বিশাল মাটি বেদখল কৰা বুলি অভিযোগ উত্থাপন কৰি ৬৯৩টা পৰিয়ালক উচ্ছেদ কৰাৰ বাবে অভিযান আৰম্ভ কৰে। ইয়াৰ অধিকাংশই প্ৰব্ৰজিত বাংলাভাষী মুছলমান সম্প্ৰদায়ৰ লোক।

বিষয়াসকলে জনোৱা মতে, গোৱালপাৰা জিলাৰ হাচিলা বিল গাঁৱৰ পৰা ৬৬৭টা পৰিয়ালক উচ্ছেদ কৰাৰ বিপৰীতে বঙাইগাঁও জিলাৰ ভাণ্ডাৰাৰ পৰা আন ২৯টা পৰিয়ালক উচ্ছেদ কৰা হয়। কটকটীয়া নিৰাপত্তাৰ অধীনত গোৱালপাৰাত পুৱা ৭ বজাৰ পৰা আৰম্ভ হয় এই অভিযান।