সীমান্তত বাংলাদেশী চোৰৰ আক্ৰমণঃ BSFৰ জোৱানসহ দুই ভাৰতীয় নাগৰিক আহত
জোৱানজনৰ ওপৰত আক্ৰমণৰ দৃশ্য প্ৰত্যক্ষ কৰি স্থানীয় দুই ভাৰতীয় নাগৰিক আগুৱায় যায় যদিও তেওঁলোককো আক্ৰমণ চলায় বাংলাদেশী চোৰৰ দলটোৱে। ইয়াৰ পিছতে দুৰ্বৃত্তৰ দলটোৱে ঘটনাস্থলীৰ পৰা পলায়ন কৰে।

বাংলাদেশী চোৰৰ আক্ৰমণত আহত দুই ভাৰতীয় নাগৰিক
ভাৰত–বাংলাদেশ সীমান্তত সংঘটিত হৈছে এক চাঞ্চল্যকৰ ঘটনা। বাংলাদেশী চোৰৰ চোকা অস্ত্ৰৰ আক্ৰমণত গুৰুতৰভাৱে আহত হৈছে সীমান্তত কৰ্তব্যৰত সীমান্ত সুৰক্ষা বাহিনী, চমুকৈ BSFৰ এজন জোৱানৰ লগতে স্থানীয় দুই ভাৰতীয় নাগৰিক। সীমান্তত চলি থকা ফেঞ্চিংৰ কামৰ সামগ্ৰী চুৰিত বাধা দিয়াৰ বাবেই BSF জোৱানসহ ভাৰতীয় নাগৰিকৰ ওপৰত এই আক্ৰমণ চলায় বাংলাদেশী চোৰৰ দলটোৱে। কাছাৰৰ ভাৰত বাংলাদেশ সীমান্তৰ কাটিগড়া কিন্নৰখালত সংঘটিত হৈছে এই ঘটনা৷
যোৱা দুমাহ ধৰি ভাৰত চৰকাৰে সীমান্ত সুৰক্ষিত কৰাৰ উদ্দেশ্যে ভাৰত–বাংলাদেশ সীমান্তত কাঁটা তাৰৰ ফেঞ্চিঙৰ কাম চলাই আছে। প্ৰাপ্ত খবৰ মতে, বৃহস্পতিবাৰে আবেলি ফেঞ্চিঙৰ কাম চলি থকা সীমান্তৰ এটা স্থানত বাংলাদেশৰ পৰা দুই বাংলাদেশী যুৱকে অবৈধভাৱে প্ৰবেশ কৰে আৰু ফেঞ্চিঙৰ কামৰ বিভিন্ন লোহাৰ সামগ্ৰী চুৰি কৰি লৈ যোৱাৰ চেষ্টা কৰে।
ঘটনা প্ৰত্যক্ষ কৰি দুই বাংলাদেশীক বাধা দিবলৈ আগুৱাই যায় সীমান্তত কৰ্তব্যৰত BSFৰ এগৰাকী জোৱান। কিন্তু কৰ্তব্যৰত জোৱানজনৰ বাধালৈ কোনো কেৰেপ নকৰি সামগ্ৰী লৈ পলাই যাবলৈ ধৰে দুই বাংলাদেশী চোৰে। এনে পৰিস্থিতিত BSF জোৱানজনে বাংলাদেশী দুই চোৰক কিছু দূৰ যায় যদিও হঠাৎ ৮/১০ জনীয়া এটা বাংলাদেশী যুৱকৰ দলে হাতত চোকা অস্ত্ৰ লৈ BSFৰ জোৱানজনক আক্ৰমণ কৰে।
জোৱানজনৰ ওপৰত আক্ৰমণৰ দৃশ্য প্ৰত্যক্ষ কৰি স্থানীয় দুই ভাৰতীয় নাগৰিক আগুৱায় যায় যদিও তেওঁলোককো আক্ৰমণ চলায় বাংলাদেশী চোৰৰ দলটোৱে। ইয়াৰ পিছতে দুৰ্বৃত্তৰ দলটোৱে ঘটনাস্থলীৰ পৰা পলায়ন কৰে। এই ঘটনাত গুৰুতৰভাৱে আহত হয় BSFৰ জোৱানজনৰ লগতে স্থানীয় ভাৰতীয় নাগৰিক দুগৰাকী। ঘটনাক কেন্দ্ৰ কৰি সীমান্ত অঞ্চলত তীব্ৰ চাঞ্চল্যৰ সৃষ্টি হৈছে।
ইফালে প্ৰায় প্ৰতিদিনেই এইদৰে ভাৰতৰ ভূমিত প্ৰৱেশ কৰি বাংলাদেশী চোৰে উপদ্ৰৱ চলায় বুলিও একাংশ লোকে অভিযোগ কৰিছে। আনহাতে এই ঘটনা সন্দৰ্ভত BSF- এ এতিয়া লৈকে কোনো প্ৰতিক্ৰিয়া প্ৰকাশ কৰা নাই। অৱশ্যে সীমান্তত এনে এক ঘটনা সংঘটিত হোৱাৰ কথা স্বীকাৰ কৰিছে কাটিগড়া আৰক্ষীয়ে।