দেশৰ ভিতৰতে তৃতীয় শীৰ্ষ ৰাজ্য অসম, কিহৰ ভিত্তিত সম্ভৱ হ’ল এয়া?

স্থিৰ মূল্যত ৭.৯৪% জিডিপি বৃদ্ধিৰ হাৰেৰে অসমে ভাৰতৰ তৃতীয়খন দ্ৰুতগতিত বিকশিত ৰাজ্য হিচাপে আত্মপ্ৰকাশ কৰিছে । মুখ্যমন্ত্ৰী হিমন্ত বিশ্ব শৰ্মাই ঘোষণা কৰিছে এই কথা ।

বিনিয়োগকাৰী সমৰ্থিত নীতি আৰু আন্তঃগাঁথনি, প্ৰতিষ্ঠান আৰু ব্যক্তিৰ ক্ষেত্ৰত স্থায়ী বিনিয়োগক ৰাজ্যখনৰ পৰিৱৰ্তনৰ কৃতিত্ব প্ৰদান কৰি মুখ্যমন্ত্ৰী শৰ্মাই মন্তব্য কৰে যে মাত্ৰ কেইবছৰমানৰ আগলৈকে এনে অৰ্থনৈতিক গতিবেগ “অকল্পনীয়” আছিল । ইণ্ডিয়া টুডে’ এন ইত প্ৰকাশিত খবৰৰ মতে মুখ্যমন্ত্ৰী হিমন্ত বিশ্ব শৰ্মাই ঘোষণা কৰিছে এই কথা ।

চলিত মাহৰ আৰম্ভণিতে অসম বিধানসভাত ভাষণ দি মুখ্যমন্ত্রীয়ে কয়, “আমি ধাৰাবাহিকভাৱে ১৪–১৫% বৃদ্ধিৰ হাৰ পঞ্জীয়ন কৰি আহিছো, যিটো ৰাষ্ট্রীয় গড় ৯–১০%তকৈ যথেষ্ট বেছি । দেশৰ শীৰ্ষ পাঁচখন দ্ৰুতগতিত বিকশিত ৰাজ্যৰ ভিতৰত অসমো আছে ।”

চৰকাৰী তথ্য অনুসৰি অসমৰ মুঠ ৰাজ্যিক ঘৰুৱা উৎপাদনে (জি এছ ডি পি) ধাৰাবাহিকভাৱে ৰাষ্ট্ৰীয় বৃদ্ধিৰ গতি অতিক্ৰম কৰি আহিছে:

• ২০২১–২২: ২১%
• ২০২২–২৩: ১৭%
• ২০২৩–২৪: ১৯%
• ২০২৪–২৫ (আনুমানিক): ১৩%

এডভান্টেজ আছাম ২.০ শীৰ্ষ সন্মিলনৰ চৰ্চিত সফলতাকো ৰাজ্যখনৰ শক্তিশালী অৰ্থনৈতিক গতিপথৰ প্ৰমাণ হিচাপে উল্লেখ কৰে ডঃ শৰ্মাই ।

অসমৰ মূলধনী ব্যয় ২০১৫–১৬ চনত ২,৯৫১ কোটি টকাৰ পৰা ২০২৪–২৫ চনত আনুমানিক ২৪,৯৬৪ কোটি টকালৈ বৃদ্ধি পাইছে, যিয়ে উন্নয়নমূলক ব্যয়ৰ ব্যাপক সম্প্ৰসাৰণৰ প্ৰতিফলন ঘটায় । মুখ্যমন্ত্ৰী ডঃ শৰ্মাই লগতে কয় যে ইয়াৰ ফলত অসমক মূলধনী বিনিয়োগৰ অন্যতম শীৰ্ষ ৰাজ্য হিচাপে স্থান দিয়া হৈছে ।

অসমৰ সুস্থ বিত্তীয় স্বাস্থ্যৰ ওপৰত আলোকপাত কৰি মুখ্যমন্ত্ৰীয়ে কয় যে ৰাজ্যখনৰ ঋণ-জিডিপি অনুপাত ২৫%, ১৭টা লাভজনক ৰাজহুৱা খণ্ডৰ উদ্যোগে (পিএছইউ) সামূহিকভাৱে ৪০,০০০ কোটি টকাৰ নিকা সম্পদত অৰিহণা যোগাইছে । ইয়াৰ উপৰিও ৰাজ্যখনৰ হাতত ৫৮,০০০ কোটি টকাৰ সম্পত্তি আছে যিবোৰ প্ৰয়োজনৰ সময়ত লিকুইডেট কৰিব পাৰি বুলি তেওঁ উল্লেখ কৰে ।