৬ নং দফা পৰামৰ্শসমূহ কাৰ্যকৰী কৰা সিদ্ধান্তক লৈ প্ৰশ্ন প্ৰদেশ কংগ্ৰেছৰ, পৰামৰ্শৰ ভিত্তিত কাম কৰাৰ কৰ্তৃত্ব কেন্দ্ৰৰ হাততহে আছে : ভূপেন বৰা

অসম চুক্তিৰ ৬ নং দফা সন্দৰ্ভত ন্যায়াধীশ বিপ্লৱ শৰ্মা সমিতিৰ পৰামৰ্শসমূহ কাৰ্যকৰী কৰাৰ ক্ষেত্ৰত ৰাজ্যিক কেবিনেটৰ সিদ্ধান্তক লৈ প্ৰশ্ন উত্থাপন কৰিছে অসম প্ৰদেশ কংগ্ৰেছৰ সভাপতি ভূপেন কুমাৰ বৰাই। শনিবাৰে এক সংবাদমেল সম্বোধন কৰি সভাপতি বৰাই যুক্তি দিয়ে যে, এই পৰামৰ্শসমূহৰ ভিত্তিত কাম কৰাৰ কৰ্তৃত্ব কেন্দীৰ হাততহে আছে । উল্লেখ্য যে,অসম চুক্তিৰ ৬ নং দফাত অসমীয়া মানুহৰ সাংস্কৃতিক, সামাজিক, ভাষিক পৰিচয় ৰক্ষাৰ বাবে সাংবিধানিক সুৰক্ষাৰ ব্যৱস্থা কৰাটো বাধ্যতামূলক কৰা হৈছে ।

ৰাজ্যিক কেবিনেটৰ সিদ্ধান্তক সমালোচনা কৰি প্ৰদেশ কংগ্ৰেছৰ সভাপতি গৰাকীয়ে কয়, ২০১৯ চনত গঠন হোৱা বিপ্লৱ শৰ্মা সমিতিখনে ২০২০ চনৰ ফেব্ৰুৱাৰী মাহত প্ৰতিবেদন দাখিল কৰিছিল । ইমান দিনে এই বিষয়টো গোট মাৰি থকাৰ পাছত চৰকাৰে হঠাতে এই বিষয়টো পুনৰ সজীৱ কৰি তুলিছে বুলি মন্তব্য প্ৰকাশ কৰে ভূপেন বৰাই ।

কমিটীৰ প্ৰতিবেদনৰ ওপৰত সিদ্ধান্ত লোৱাৰ কেবিনেটৰ অধিকাৰৰ ওপৰত সন্দেহ প্ৰকাশ কৰি তেওঁ কয়, “কেন্দ্ৰই কমিটী গঠন কৰিছিল। কেন্দ্ৰীয় মন্ত্ৰীসভাই আলোচনা কৰি সিদ্ধান্ত নোলোৱালৈকে আমি নাভাবো যে ৰাজ্যিক মন্ত্ৰীসভাৰ কোনো সিদ্ধান্তই কোনো উপকাৰ সাধন কৰিব।” বৰাই লগতে কয়, ৬ নং দফা আৰু নাগৰিকত্ব (সংশোধনী) আইন (CAA) কাৰ্যকৰী কৰাটো পৰস্পৰ বিৰোধী হ’ব । তেখেতে যুক্তি দিয়ে যে, চুক্তিখনৰ লক্ষ্য খিলঞ্জীয়াক সুৰক্ষা দিয়া, আনহাতে নাগৰিকত্ব (সংশোধনী) আইনে এই সুৰক্ষাক ক্ষতিগ্ৰস্ত কৰিব বুলি যুক্তি দিয়ে বৰাই।

পূৰ্বৰ কংগ্ৰেছ চৰকাৰে ছয় জনগোষ্ঠীক অনুসূচিত জনজাতি (এছ টি) মৰ্যাদা প্ৰদান কৰাত বাধা প্ৰদান কৰা বুলি মুখ্যমন্ত্ৰী হিমন্ত বিশ্ব শৰ্মাই কৰা দাবীক সম্পূৰ্ণৰূপে নাকচ কৰে অসম প্ৰদেশ কংগ্ৰেছে । উক্ত সংবাদমেলত উপস্থিত থকা লোকসভাৰ সাংসদ প্ৰদ্যুত বৰদলৈয়ে কয়, ‘কংগ্ৰেছ চৰকাৰে যেতিয়া এছ টি মৰ্যাদাৰ প্ৰস্তাৱ দিছিল তেতিয়া আমাৰ বৰ্তমানৰ মুখ্যমন্ত্ৰী সেই মন্ত্ৰীসভাৰ অংশ আছিল। প্ৰস্তাৱটোত স্পষ্ট আছিল যে, বৰ্তমানৰ এছ টি লোকসকলৰ সুবিধাত প্ৰভাৱ নপৰাকৈ ৬ টা জনগোষ্ঠীক এছ টিৰ মৰ্যাদা প্ৰদান কৰাত কোনো অসুবিধা নাই।”