ভাৰতৰ পক্ষত পাকিস্তানৰ মন্ত্ৰী! ক’লে, ভাৰত নহয়, বানপানীৰ বাবে আমাৰ চৰকাৰ জগৰীয়া…

পাকিস্তানত বানপানীয়ে ভংয়কৰ ৰূপ ধাৰণ কৰিছে। যাৰ ফলত শ শ লোকৰ মৃত্যু হোৱাৰ লগতে বহু লোক এতিয়াও নিৰুদ্দেশ হৈ আছে। দেশখনত চলি থকা বানপানীৰ তাণ্ডৱৰ মাজতে পাকিস্তানৰ প্ৰতিৰক্ষা মন্ত্ৰীয়ে এক ডাঙৰ মন্তব্য কৰিছে। পাকিস্তান চৰকাৰৰ মন্ত্ৰী খোৱাজা আছিফে এক প্ৰকাৰ ভাৰতৰ পক্ষত কয় যে পাকিস্তানত বানপানীৰ কাৰণ ভাৰত নহয়, ইয়াৰ বাবে নিজ চৰকাৰখনেই দায়ী। এই সময়চোৱাত মন্ত্ৰীগৰাকীয়ে বিতংভাবে বৰ্ণনা কৰি কেনেকৈ পাকিস্তান চৰকাৰৰ ভুলৰ বাবে দেশখনত বানপানীৰ সৃষ্টি হৈছে সেই বিষয়ে জনায় ।

পাকিস্তানৰ এটা স্থানীয় সংবাদ মাধ্যমৰ সৈতে কথা-বতৰা পাতি মন্ত্ৰীগৰাকীয়ে কয় যে, বানপানী কিয় হৈছে ইয়াৰ ওপৰত খবৰ কৰক। বানপানী ৰোধৰ বাবে যিমানখিনি খৰচ কৰিব লাগিছিল তাৰ ৩০ শতাংশও খৰচ হোৱা নাই। কেতিয়ালৈকে আনক জগৰীয়া কৰিব।

ভাৰতৰ পক্ষত পাকিস্তানৰ মন্ত্ৰী!

প্ৰতিৰক্ষা মন্ত্ৰীগৰাকীয়ে আৰু কয় যে, ভাৰতৰ উদ্দেশ্য সন্দেহজনক হ’ব পাৰে। কিন্তু এয়া জনা দৰকাৰ যে পানী কাৰো নিয়ন্ত্ৰণত থাকিব নোৱাৰে। ভাৰতে ইচ্ছা কৰিলেও সেয়া নিয়ন্ত্ৰণ কৰিব নোৱাৰে। ভাৰতে ছালাল বান্ধৰ ৩ খন গেট মুকলি কৰিছে, যাৰ বাবে পাকিস্তানত বানপানী হৈছে।

তেওঁ আৰু কয়, বানপানীৰ বাবে অবৈধ বেদখল জগৰীয়া। মানুহবোৰে পাহাৰ কাটি, নদীৰ বালি আঁতৰাই ঘৰ সাজিছে। তেওঁলোকৰ ঘৰ ডুব নাযায় কাৰ যাব বুলি তেওঁ প্ৰশ্ন কৰে। তেওঁ আৰু কয় যে, নিজৰ ভুলখিনিও চোৱা দৰকাৰ। দুৰ্নীতিৰ বাবে আমি এই পৰ্যায় পাইছো। আমি ৩০ বছৰ ধৰি যি কৰিছো তাৰ পৰিণাম ভোগ কৰি আছো।

পাকিস্তান চৰকাৰ জগৰীয়া

মন্ত্ৰীগৰাকীয়ে লগতে কয় যে, চৰকাৰে এয়া কিয় দেখা পোৱা নাই যে নদীৰ ৰাস্তাত মানুহে ঘৰ বনাইছে। যদি নদীৰ বাবে ৰাস্তা আছে তেন্তে সেই ঠাইত বানপানী হোৱা স্বাভাৱিক। ইয়াৰ বাবে কেৱল পাকিস্তান চৰকাৰ জগৰীয়া। আচৰিত কথা এয়াই যে, এই ৩০ বছৰত বৰ্তমানৰ চৰকাৰৰ সৈতে জড়িত দলসমূহে পাকিস্তানত ১৫ বছৰ ধৰি ক্ষমতাত আছে।

উল্লেখ্য যে, পাকিস্তানৰ বহু অঞ্চল এতিয়া বানপানীৰ কবলত। তথ্য অনুসৰি চেনাব, চতলুজ আৰু ৰাবী নদীৰ দাঁতিকাষৰীয়া অঞ্চলসমূহ বানপানীত ডুব গৈছে। এই ধ্বংসলীলাৰ বাবে ২ লাখৰো অধিক লোক গৃহহীন হৈ পৰিছে। পাকিস্তান চৰকাৰৰ মতে, চেনাব নদীৰ পানী এতিয়াও বিপদ সীমাৰ ওপৰেৰে বৈ আছে। এই বানত এতিয়ালৈকে প্ৰায় ৮২০ জন লোকৰ মৃত্যু হৈছে।

অন্য খবৰ পঢ়কঃ আমেৰিকাই বিচাৰে মিত্ৰতা! ভাৰতৰ স্থিতি দেখি হতবাক ট্ৰাম্প, দিছে আলোচনাৰ ইংগিত…