৭ বছৰৰ অন্তত চীনৰ ভূমিত খোজ প্ৰধানমন্ত্ৰী মোদীৰ, আহিব নেকি শুভ সংবাদ?

China Pm Modi

৭ বছৰৰ অন্তত পুনৰ চীনৰ মাটিত খোজ পেলালে প্ৰধানমন্ত্ৰী নৰেন্দ্ৰ মোদী। দুদিনীয়া জাপান ভ্ৰমণৰ অন্তত আজি চীনৰ টিয়ানজিনত উপস্থিত হৈছে প্ৰধানমন্ত্ৰী মোদী। দেওবাৰে টিয়ানজিন চহৰত অনুষ্ঠিত হ’বলগীয়া সাংহাই সহযোগিতা সংস্থাৰ সন্মিলনত অংশগ্ৰহণ কৰিব মোদীয়ে। সাংহাই সহযোগিতা সংস্থাৰ আজিলৈকে সৰ্ববৃহৎ শীৰ্ষ সন্মিলনখন ৩১ আগষ্টৰ পৰা ১ ছেপ্টেম্বৰলৈ টিয়ানজিনত অনুষ্ঠিত হ’ব।

ইয়াৰ মাজতে প্ৰধানমন্ত্ৰী মোদীয়ে চীনৰ ৰাষ্ট্ৰপতি জিনপিং, ৰাছিয়াৰ ৰাষ্ট্ৰপতি পুটিনকে ধৰি অন্যান্য নেতাসকলকো সাক্ষাৎ কৰিব। এইবাৰ কূটনৈতিক দৃষ্টিকোণৰ পৰা এই সন্মিলন গুৰুত্বপূৰ্ণ। প্ৰায় ৭ বছৰৰ মূৰত চীনত উপস্থিত হৈছে প্ৰধানমন্ত্ৰী মোদী।

এক্সৰ তথ্য দিলে প্ৰধানমন্ত্ৰী মোদীয়ে

চীনত উপস্থিত হোৱাৰ পিছত প্ৰধানমন্ত্ৰী মোদীয়ে ছ’চিয়েল মিডিয়া পোষ্ট এক্সত এই তথ্য প্ৰদান কৰিছে।তেওঁ কৈছে, “মই টিয়ানজিনত উপস্থিত হৈছো। সাংহাই সহযোগিতা সংস্থাৰ সন্মিলনত বিভিন্ন দেশৰ নেতাসকলক সাক্ষাৎ কৰাৰ অৰ্থপূৰ্ণ আলোচনা আৰু সাক্ষাতক লৈ মই অতিশয় উৎসাহিত।”

শীৰ্ষ সন্মিলন কিয় গুৰুত্বপূৰ্ণ?

ৰাছিয়া-ইউক্ৰেইন আৰু ইজৰাইল-হামাছৰ যুদ্ধ অব্যাহত থকাৰ সময়তে এই সন্মিলন অনুষ্ঠিত কৰা হৈছে। এফালে যদি দক্ষিণ এছিয়া আৰু এছিয়া প্ৰশান্ত মহাসাগৰীয় অঞ্চলত নিৰাপত্তাজনিত উত্তেজনা অব্যাহত আছে আনফালে বিশ্ব বাণিজ্য যুদ্ধ আৰম্ভ কৰিছে ট্ৰাম্পে। বিশেষজ্ঞসকলৰ মতে প্ৰায় প্ৰতিখন দেশৰ সৈতে সম্পৰ্ক বিনষ্ট কৰিছে আমেৰিকাই। এনে পৰিস্থিতিত চীনৰ ৰাষ্ট্ৰপতিগৰাকীয়ে নিজকে বিশ্ব শক্তি হিচাপে প্ৰতিষ্ঠা কৰাৰ বাবে এইটো এটা ভাল সময়।

SCO – এছিয়াৰ ডাঙৰ মঞ্চ

২০০১ চনত গঠন হোৱা এই এছ চি অ’ৰ বৰ্তমান ৯ খন সদস্য দেশ আছে – চীন, ৰাছিয়া, ভাৰত, পাকিস্তান, কাজাখস্তান, কিৰ্গিস্তান, তাজিকিস্তান, উজবেকিস্তান আৰু ইৰাণ। বেলাৰুছ, আফগানিস্তান আৰু মংগোলিয়া ইয়াৰ পৰ্যবেক্ষক। এই মঞ্চ এছিয়াৰ ৰাজনীতি, নিৰাপত্তা আৰু বাণিজ্যৰ বাবে অতি গুৰুত্বপূৰ্ণ বুলি বিবেচিত হৈছে।

জিনপিং ২০১৯ চনত ভাৰতলৈ আহিছিল

২০২৪ চনৰ অক্টোবৰ মাহত ৰাছিয়াৰ কাজানত অনুষ্ঠিত ব্ৰিকছ সন্মিলনৰ সময়ত মোদী আৰু জিনপিঙৰ অন্তিমবাৰৰ বাবে সাক্ষাৎ হৈছিল। এই সময়ছোৱাত দুয়োৰে মাজত দ্বিপাক্ষিক আলোচনাও অনুষ্ঠিত হয়। একে সময়তে জিং জিনপিঙে শেষবাৰৰ বাবে ২০১৯ চনত ভাৰত ভ্ৰমণ কৰিছিল।তাৰ পিছত দুয়োগৰাকী নেতাই তামিলনাডুৰ মহাবলীপুৰমত সাক্ষাৎ কৰিছিল।