শ্বৰীফৰ মূৰৰ ওপৰত নতুন বোজা, ঋণ প্ৰদানৰ বাবে IMF-এ বান্ধি দিলে ১১টা চৰ্ত

শেহতীয়াকৈ IMF বা আন্তঃৰাষ্ট্ৰীয় মুদ্ৰা নিধিৰ পৰা ১ বিলিয়ন ডলাৰ ঋণ লাভ কৰিছিল পাকিস্তানে। ভাৰতে বাৰে বাৰে দিয়া ‘সতৰ্কবাণী’ৰ পিছতো IMF কমিটীয়ে ঋণ দিছিল পাকিস্তানক। ইয়াৰ পিছতে এতিয়া আন্তঃৰাষ্ট্ৰীয় মুদ্ৰা নিধিয়ে অৱশিষ্ট ঋণ প্ৰদানৰ বাবে পাকিস্তানৰ ওপৰত ১১টা চৰ্ত আৰোপ কৰিছে। ইয়াৰ ফলত IMF-এ জাৰি কৰা মুঠ চৰ্তৰ সংখ্যা ৫০টা হৈছেগৈ। এতিয়া জানো আহক IMFয়ে কি অতিৰিক্ত চৰ্ত আৰোপ কৰিছে?

• চলিত বিত্তীয় বৰ্ষৰ বাবে ১৭.৬ ট্ৰিলিয়ন ডলাৰৰ বাজেট অনুমোদন কৰিব লাগিব পাকিস্তানে। এই ধন সম্পূৰ্ণৰূপে উন্নয়নমূলক কামত ব্যৱহাৰ কৰা হ’ব।
• কৃষি আয়কৰৰ ক্ষেত্ৰত চাৰিটা সংশোধনী কৰিবলৈ পাকিস্তানক নিৰ্দেশ দিছে IMF-এ।
• দেশৰ সংস্কাৰ আৰু উন্নয়ন কোন দিশত হ’ব? IMF-এ প্ৰদান কৰা কাৰ্য পৰিকল্পনাক মানি চলিব লাগিব পাকিস্তানে।
• দেশৰ জনসাধাৰণৰ ক্ৰয় ক্ষমতা বজাই ৰাখিবলৈ IMFৰ ধন খৰচ কৰিব লাগিব। মূল্যবৃদ্ধি নিয়ন্ত্ৰণত ৰাখিব লাগিব।
• ২০২৭ চনলৈকে দেশ চলাবলৈ শ্বৰীফ চৰকাৰে কি কৌশল ব্যৱহাৰ কৰিব? সেই তথ্য IMFক দিব লাগিব।
• পাকিস্তানে বিদ্যুতৰ বিলৰ বাবে নতুন কৰ গাঁথনি গঢ়ি তোলাৰ প্ৰয়োজন। যিটো ১ জুলাইৰ পৰা কাৰ্যকৰী হ’ব।
• পাকিস্তান চৰকাৰে ইন্ধন কৰ আদায়ৰ বাবে বছৰৰ মাজভাগৰ অধিসূচনা জাৰি কৰিব লাগিব।
• এই সন্দৰ্ভত পাকিস্তান চৰকাৰে এখন অধ্যাদেশৰ খচৰা প্ৰস্তুত কৰা উচিত।
• আনকি পাকিস্তানে নাগৰিকৰ পৰা বিদ্যুতৰ বিলৰ ওপৰত আৰোপ কৰা অতিৰিক্ত কৰ আঁতৰোৱাৰ বাবে আইন প্ৰণয়ন কৰা উচিত।
• ২০৩৫ চনৰ ভিতৰত বিশেষ প্ৰযুক্তি মণ্ডল আৰু উদ্যোগিক উদ্যান সৃষ্টিৰ বাবে পাকিস্তান চৰকাৰে ৰোডমেপ প্ৰস্তুত কৰিব লাগিব।
• পাকিস্তানে পাঁচ বছৰৰ কম পুৰণি ব্যৱহৃত গাড়ী আমদানিৰ ওপৰত আৰোপ কৰা কৰ বোজা হ্ৰাস কৰিব লাগিব।