তিনিটাকৈ হত্যাৰ অভিযোগ উঠা কোন এই প্ৰণৱ মহন্ত?
প্ৰণৱ মহন্ত বিৰুদ্ধে উত্থাপন হৈছে হত্যাৰ অভিযোগ। এই সন্দৰ্ভত এক সংবাদমেলত ভয়ংকৰ অভিযোগ কৰিছে ভুক্তভোগীয়ে। ভুক্তভোগীৰ অভিযোগ, আলফা সজাই বকোৰ বালাপাৰাৰ দুই ভাতৃক অপহৰণ কৰি হত্যা কৰিছিল বিতৰ্কিত প্ৰণৱ মহন্তই। আনহাতে ভূমি সংক্ৰান্তীয় বিবাদৰ বাবে আন এজন লোকক বাহনেৰে দুৰ্ঘটনা সংঘটিত কৰি হত্যা কৰাৰ অভিযোগ উত্থাপিত হৈছে।
যোৱা তিনি জুলাইত পুৱতি নিশা প্ৰণৱ মহন্ত নামৰ এগৰাকী লোকৰ বকোস্থিত বাসস্থানত উদ্ধাৰ হৈছিল AK47 ৰ ১৪২ জাঁই সক্ৰিয় গুলী, এটা পিষ্টল, এটা ৰিভলভাৰসহ বহু আপত্তিজনক সামগ্ৰী। গোপন সূত্ৰৰ পম খেদি আৰক্ষীয়ে এই অভিযান চলাইছিল। তাৰ পিছতেই গ্ৰেপ্তাৰ কৰা হৈছিল বহু বিতৰ্কিত প্ৰণৱ মহন্তক। এইবাৰ পুনৰ উন্মোচিত হৈছে প্ৰণৱ মহন্তক লৈ আন কেতবোৰ বিতৰ্ক। প্ৰণৱ মহন্ত বিৰুদ্ধে উত্থাপন হৈছে হত্যাৰ অভিযোগ। এই সন্দৰ্ভত এক সংবাদমেলত ভয়ংকৰ অভিযোগ কৰিছে ভুক্তভোগীয়ে।
ভুক্তভোগীৰ অভিযোগ মতে আলফা সজাই ২০০২ চনৰ ২২ জুলাইত বকোৰ বালাপাৰাৰ দুই ভাতৃক অপহৰণ কৰি হত্যা কৰিছিল বিতৰ্কিত প্ৰণৱ মহন্তই। আজিলৈ কোনো সন্ধান নাই ভাতৃদ্বয় মদন ভড়ালী আৰু বিশ্বজিৎ ভড়ালীৰ। আৰক্ষী-প্ৰশাসন, মুখ্যমন্ত্ৰী, নেতাৰ দুৱাৰে-দুৱাৰে গৈও একো সুফল নাপালে বুলি দুৰ্ভগীয়া পৰিয়ালটোৱে অভিযোগ কৰিছে।
আনহাতে ভূমি সংক্ৰান্তীয় বিবাদৰ বাবে শৈলেন কলিতা নামৰ লোক এজনক বাহনেৰে দুৰ্ঘটনা সংঘটিত কৰি হত্যা কৰাৰ অভিযোগ উত্থাপিত হৈছে প্ৰণৱ মহন্তৰ বিৰুদ্ধে। ২০১৯ চনৰ মে’ মাহত বকো বৰপাৰাৰ শৈলেন কলিতাক দুৰ্ঘটনা সংঘটিত কৰি হত্যা কৰাৰ অভিযোগ তুলিছে লোকজনৰ পৰিয়ালে।
