বিচিচিআইৰ অধ্যক্ষ পদৰ পৰা আঁতৰিব ৰ’জাৰ বিন্নী! ভাৰপ্ৰাপ্ত অধ্যক্ষৰ দায়িত্বত ৰাজীৱ শুক্লা

বিচিচিআইৰ সভাপতি পদৰ পৰা আঁতৰিব বিন্নী!

ভাৰতীয় ক্ৰিকেট অনুৰাগীৰ মাজত এতিয়া এছিয়া কাপৰ চৰ্চা। অহা ৯ ছেপ্টেম্বৰৰ পৰা আৰম্ভ হ’বলগীয়া এই প্ৰতিযোগতাখনৰ বাবে ইতিমধ্যে বিচিচিআইৰ নিৰ্বাচক সমিতিয়ে ভাৰতীয় দল ঘোষণা কৰিছে। এছিয়া কাপৰ প্ৰস্তুতিৰ মাজতে পিছে ভাৰতীয় ক্ৰিকেট নিয়ন্ত্ৰণ ব’ৰ্ড, চমুকৈ বিচিচিআইত ঘটিছে বৃহৎ পৰিৱৰ্তন। প্ৰকাশিত খবৰ অনুসৰি, বিচিচিআইৰ সভাপতি ৰ’জাৰ বিন্নীয়ে শীঘ্ৰেই পদত্যাগ কৰিব পাৰে। এতিয়া বিচিচিআইৰ উপ–সভাপতি ৰাজীৱ শুক্লাক ভাৰপ্ৰাপ্ত সভাপতি হিচাপে নিযুক্তি দিয়া হৈছে।

সূত্ৰ অনুসৰি, যোৱা ২৭ আগষ্টত ৰাজীৱ শুক্লাৰ অধ্যক্ষতাত বিচিচিআইৰ বিষয়াসকলৰ এখন বৈঠক অনুষ্ঠিত হয়। এই বৈঠকত Dream 11ৰ অব্যাহতিৰ পিছত ভাৰতীয় দলৰ জাৰ্চিৰ নতুন স্প’নচৰ সন্দৰ্ভত আলোচনা কৰা হয়। উল্লেখ্য যে ২০২২ চনত সৌৰভ গাংগুলীৰ ঠাইত ৰ’জাৰ বিন্নীক ব’ৰ্ডৰ সভাপতি নিযুক্তি দিয়া হৈছিল।

এতিয়া ৰ’জাৰ বিন্নীৰ বয়স ৭০ বছৰ। এনে পৰিস্থিতিত তেওঁ অতি সোনকালে সভাপতি পদৰ পৰা পদত্যাগ কৰিব পাৰে। বিচিচিআইৰ সংবিধান অনুসৰি, যিকোনো বিষয়াই ৭০ বছৰ বয়সৰ পিছত নিজৰ পদ এৰিব লগা হয়। এনে পৰিস্থিতিত ৰ’জাৰ বিন্নী বিচিচিআইৰ সভাপতি পদৰ বাবে অযোগ্য হৈ পৰিব। খবৰ অনুসৰি কেইমাহমানৰ বাবে এই দায়িত্ব ল’ব ৰাজীৱ শুক্লাই।

নতুন সভাপতি নিৰ্বাচিত নোহোৱালৈকে ৰাজীৱ শুক্লাই ভাৰপ্ৰাপ্ত সভাপতি হিচাপে কাৰ্যনিৰ্বাহ কৰিব। বিগত ২০২০ চনৰ পৰা বিচিচিআইৰ উপ-সভাপতি হিচাপে কাৰ্যনিৰ্বাহ কৰি আহিছে ৰাজীৱ শুক্লাই। উল্লেখ্য যে ১৯৮৩ চনত এদিনীয়া বিশ্বকাপ জয়ী ভাৰতীয় দলৰ বিন্নী বিচিচিআইৰ সভাপতি হিচাপে দায়িত্ব লোৱা তৃতীয়জন প্ৰাক্তন ক্ৰিকেটাৰ হিচাপে পৰিগণিত হৈছিল।

লক্ষণীয়ভাৱে কেন্দ্ৰীয় চৰকাৰে ইতিমধ্যে সংসদত উত্থাপন কৰিছে ৰাষ্ট্ৰীয় ক্ৰীড়া শাসন বিধেয়ক। এই বিধেয়ক আইন হিচাপে কাৰ্যকৰী হোৱাৰ পিছত বিচিচিআইয়ো আইনখনৰ আওতালৈ আহিব। অৱশ্যে এই আইন কাৰ্যকৰীকৰণৰ বাবে এতিয়াও প্ৰায় তিনি–চাৰি মাহ সময়ৰ প্ৰয়োজন হ’ব। তাৰ পূৰ্বে অহা মাহত বিচিচিআইৰ বাৰ্ষিক সাধাৰণ সভা আৰু নিৰ্বাচন অনুষ্ঠিত হ’ব।