সুব্ৰত কাপত শ্ৰেষ্ঠত্ব অৰ্জন অসমৰঃ পশ্চিম বংগক পৰাস্ত কৰি জয় কৰিলে খিতাপ

সুব্ৰত কাপৰ খিতাপ জয় অসমৰ

ভাৰতীয় ফুটবলৰ এক অন্যতম মৰ্যাদাসম্পন্ন প্ৰতিযোগিতা সুব্ৰত কাপ আন্তঃৰাষ্ট্ৰীয় ফুটবল প্ৰতিযোগিতা। জুনিয়ৰ পৰ্যায়ৰ এই প্ৰতিযোগিতাই দেশত ফুটবলৰ বিকাশ তথা জনপ্ৰিয়তাৰ ক্ষেত্ৰত গ্ৰহণ কৰি আহিছে গুৰুত্বপূৰ্ণ ভূমিকা। সুব্ৰত কাপৰ ৬৪ সংখ্যক সংস্কৰণৰ খিতাপ জয় কৰিছে অসমে। প্ৰতিযোগিতাত দৰ্শনীয় প্ৰদৰ্শন দাঙি ধৰি অসম দলে ফাইনেলত পশ্চিম বংগক ৩-১ ব্যৱধানত পৰাস্ত কৰি ১৭ বছৰ অনুৰ্ধৰ ছোৱালী শাখাত খিতাপ জয় কৰে। যোৱা ১৯ আগষ্টৰ পৰা আৰম্ভ হৈছিল সুব্ৰত কাপৰ ছোৱালী শাখাৰ খেল।

প্ৰতিযোগিতাৰ চূড়ান্ত মেচত অসমৰ বেটকুছি হাইস্কুলৰ দলটোৱে শক্তিশালী প্ৰদৰ্শন দাঙি ধৰি বংগৰ নন্দঝাৰ আদিবাসী পাচিলি হাইস্কুলক পৰাস্ত কৰি খিতাপ দখল কৰে। মেচখনত প্ৰথমৰ পৰা অসমে আধিপত্য বিস্তাৰ কৰে। আক্ৰমণৰ লগতে ৰক্ষণতো সপ্ৰতিভ প্ৰদৰ্শনেৰে বংগৰ সকলো প্ৰচেষ্টা ব্যৰ্থ কৰি তোলে অসমে।

অৱশ্যে মেচখনত পশ্চিম বংগয়ো গ’লৰ বাবে বহুকেইটা সুযোগ সৃষ্টি কৰিছিল, কিন্তু ফিনিশ্বিঙৰ দুৰ্বলতাৰ বাবে এই সুযোগ গ্ৰহণত ব্যৰ্থ হয় বংগৰ দলটো। মেচৰ ১২ মিনিটত অসমৰ হৈ প্ৰথমটো গ’ল দিয়ে ছায়াশ্ৰী চাংমায়ে। ইয়াৰ পিছতে অৱশ্যে ২১ মিনিটত বংগৰ হৈ সমতা স্থাপন কৰে নেহা বাৰ’ইৱে।

অৱশ্যে ২৪ মিনিটত মিলিনা ব্ৰহ্মৰ গ’লেৰে পুনৰ অগ্ৰগতি লাভ কৰে অসমে। আনহাতে ২৯ মিনিটত মেচত মেৰি মেচৰ গ’লেৰে অসমৰ অগ্ৰগতিৰ ব্যৱধান ৩-১লৈ বৃদ্ধি কৰে। ইয়াৰ পিছত অৱশ্যে কোনো এটা দলেই গ’ল স্ক’ৰ কৰিবলৈ সক্ষম নহ’ল আৰু অসমে ৩-১ ব্যৱধানত জয়লাভ কৰি খিতাপ অৰ্জন কৰে।

চূড়ান্ত মেচখনত মুখ্য অতিথি হিচাপে উপস্থিত থাকে এয়াৰ ষ্টাফৰ ভাইচ চিফ এয়াৰ মাৰ্শ্বেল নৰ্মদেশ্বৰ তিৱাৰী। অৰ্জুন বঁটা বিজয়ী তথা ২০২৪ চনৰ পেৰিছ পেৰালিম্পিকৰ স্বৰ্ণ পদক বিজয়ী জেভেলিন থ্ৰ’ৱাৰ নৱদীপ সিং অনুষ্ঠানত সন্মানীয় অতিথি হিচাপে উপস্থিত থাকে। অহা ২৫ ছেপ্টেম্বৰৰ ভিতৰত সুব্ৰ’ত কাপৰ তিনিওটা শাখাতে (১৭ বছৰ অনুৰ্ধ ছোৱালী, ১৫ অনুৰ্ধ ল’ৰা আৰু ১৭ বছৰ অনুৰ্ধ ল’ৰা) মুঠ ২০০ খন মেচ সম্পূৰ্ণ হ’ব।

ইয়াৰ পিছত টিভি৯ নেটৱৰ্কৰ ‘নিউজ৯ টাইগাৰছ এণ্ড টাইগ্ৰেছ ফুটবল টেলেণ্ট হাণ্ট’ পদক্ষেপৰ অধীনত নিৰ্বাচিত খেলুৱৈসকলে জাৰ্মানীত প্ৰশিক্ষণ গ্ৰহণৰ সুযোগ লাভ কৰিব। ছোৱালীৰ শাখাৰ সমাপ্তিৰ পিছত এতিয়া অহা ২ ছেপ্টেম্বৰৰ পৰা ১১ ছেপ্টেম্বৰলৈ বেংগালুৰুত ১৫ বছৰ অনুৰ্ধ শাখাৰ মেচ অনুষ্ঠিত হ’ব। তাৰ পিছত দিল্লীত অনুষ্ঠিত হ’ব ল’ৰাৰ ১৭ বছৰ অনুৰ্ধ শাখাৰ মেচ।

দেশৰ তাৰকা পেৰা এথলীট নৱদীপ সিঙে টিভি ৯ নেটৱৰ্কৰ এই ‘নিউজ৯ টাইগাৰছ এণ্ড টাইগ্ৰেছ ফুটবল টেলেণ্ট হাণ্ট’ৰ পদক্ষেপক প্ৰশংসা কৰে। নিউজ৯ স্প’ৰ্টছৰ সৈতে হোৱা এক আছুতীয়া সাক্ষাৎকাৰত নৱদীপ সিঙে টিভি৯ নেটৱৰ্কৰ এই বৃহৎ পদক্ষেপৰ জৰিয়তে আন্তঃৰাষ্ট্ৰীয় প্ৰশিক্ষকৰ পৰা ফুটবলৰ সূক্ষ্ম কলা আয়ত্ব কৰাত ভাৰতৰ যুৱ খেলুৱৈসকলক সহায় কৰিব বুলি মন্তব্য কৰে।

এনে পদক্ষেপৰ দ্বাৰা ভাৰতৰ যুৱ খেলুৱৈসকলে নিজৰ খেলৰ উন্নতি সাধন কৰিব পাৰে বুলিও তেওঁ কয়। আন্তঃৰাষ্ট্ৰীয় ফুটবলাৰ আৰু ভাৰতীয় খেলুৱৈৰ খেলৰ ধৰণত পাৰ্থক্য আছে বুলিও নৱদীপে স্বীকাৰ কৰে আৰু নিউজ৯ৰ এনে পদক্ষেপে আন্তঃৰাষ্ট্ৰীয় ফুটবলাৰ আৰু ভাৰতীয় ফুটবলৰ এই ব্যৱধান হ্ৰাস কৰাত সহায় কৰিব বুলি উল্লেখ কৰে।

ইফালে পেছাদাৰীভাৱে ফুটবল খেলিব বিচৰা যুৱ খেলুৱৈসকলৰ বাবে সুব্ৰত কাপ সৰ্বোত্তম মঞ্চ বুলিও তেওঁ কয়। এনে প্ৰতিযোগিতাই দেশৰ প্ৰতিভাৱান শিশু বাছনি কৰাত সহায় কৰে বুলি তেওঁ লগতে কয়। ২০৩৬ চনৰ অলিম্পিকৰ বাবে তাৰকা খেলুৱৈক প্ৰস্তুত কৰিবলৈ অধিক ঘৰুৱা প্ৰতিযোগিতা আয়োজন কৰিব লাগে বুলিও নৱদীপ সিঙে লগতে কয়।

আনহাতে সুব্ৰত কাপৰ আয়োজক সমিতিৰ সম্পাদক গ্ৰুপ কেপ্তেইন গজানন্দ যাদৱেও টিভি ৯ নেটৱৰ্কৰ ‘নিউজ৯ ইণ্ডিয়ান টাইগাৰছ এণ্ড টাইগ্ৰেছ ফুটবল টেলেণ্ট হাণ্ট’ৰ পদক্ষেপক প্ৰশংসা কৰে । তেওঁ লগতে অনাগত সময়তো টিভি৯ নেটৱৰ্কৰ এই সমৰ্থন অব্যাহত থাকিব বুলি আশা প্ৰকাশ কৰে।