শীঘ্ৰেই ৰে’লপথত নামিব নতুন বন্দে ভাৰত, ৰাজধানী এক্সপ্ৰেছক জনাব প্ৰত্যাহ্বান

নতুন ৰূপত বন্দে ভাৰত

ভাৰতীয় ৰে’লসেৱাত অভিনৱ সংযোজন হিচাপে অন্তৰ্ভুক্ত হৈছিল দেশীয় নিৰ্মিত দ্ৰুতবেগী ৰে’ল বন্দে ভাৰত এক্সপ্ৰেছ। এই বন্দে ভাৰত এক্সপ্ৰেছ এতিয়া নতুন ৰূপত ৰে’লপথত নামিবলৈ সাজু হৈছে। নতুন এই ৰে’লখনৰ বাবে দীৰ্ঘদিনৰ অপেক্ষা প্ৰায় অন্ত পৰাৰ দিশে। হয়তো চলিত বৰ্ষৰ শেষৰ ফালে দেশৰ প্ৰথমখন বন্দে ভাৰত শ্লীপাৰ ৰে’ল মুকলি হ’ব। এয়া হ’ব বন্দে ভাৰত এক্সপ্ৰেছৰ সম্পূৰ্ণ নতুন শ্লীপাৰ সংস্কৰণ। চেয়াৰ কাৰৰ পৰিৱৰ্তে এই নতুন শ্লীপাৰ ট্ৰেইনত থাকিব আৰামদায়ক বাৰ্থ।

এই ৰে’লখনে আপোনাৰ দীৰ্ঘ দূৰত্বৰ যাত্ৰাৰ অভিজ্ঞতা নিশাটোৰ ভিতৰতে সলনি কৰি দিব। সূত্ৰ অনুসৰি প্ৰথমখন বন্দে ভাৰত শ্লীপাৰ ৰে’ল দিল্লীৰ পৰা আহমেদাবাদ, ভোপাল বা পাটনালৈ চলাচল হ’ব পাৰে। বন্দে ভাৰতৰ এই নতুন ৰে’লখনে দীৰ্ঘ দূৰত্বৰ যাত্ৰাৰ সময় কেইবাঘণ্টাও হ্ৰাস কৰিব।

ইয়াৰ বাহিৰেও এই ৰে’লৰ গতিবেগেও আপোনাক আচৰিত কৰিব। এই নতুন ৰে’লখন ঘণ্টাত ১৬০ কিলোমিটাৰ বেগত চলিব। অৰ্থাৎ পূৰ্বে প্ৰায় ১৭ ঘণ্টা সময় প্ৰয়োজন হোৱা দূৰত্বৰ যাত্ৰাত নতুন বন্দে ভাৰত শ্লীপাৰে ১৫ ঘণ্টাৰো কম সময়তে এতিয়া এই দূৰত্ব অতিক্ৰম কৰিব।

পিছে এই নতুন ৰে’লখন কেনেকুৱা হ’ব? জানিব পৰা মতে, এই ৰে’লখনত মুঠ ১৬টা ডবা থাকিব। ইয়াৰে ১ টা first AC, ৪টা AC 2-tier আৰু ১১টা AC 3-tier ডবা থাকিব। এই নতুন ৰে’লখনৰ মুঠ যাত্ৰী ক্ষমতা হ’ব ৮২৩ জন। প্ৰতিটো ডবাত আধুনিক ইণ্টেৰিয়ৰ, চেঞ্চৰ লাইটিং আৰু USB চাৰ্জিং প’ৰ্টৰ সুবিধা থাকিব।

এই বন্দে ভাৰত শ্লীপাৰ ৰে’লখনত যাত্ৰীৰ সুৰক্ষাৰ প্ৰতি বিশেষ গুৰুত্ব দিয়া হৈছে। ‘কৱচ’ ব্যৱস্থাৰ দ্বাৰা সম্পূৰ্ণৰূপে সুৰক্ষিত হ’ব এই ৰে’লখন। যদিহে এই ৰে’লখন মুকলি কৰা হয়, তেতিয়া ইয়াৰ দ্বাৰা দেশৰ জনসাধাৰণৰ সময় ৰাহি হোৱাই নহয়, ভাৰতীয় ৰে’লৱেৰ আধুনিকীকৰণ আৰু স্বাৱলম্বীতাৰ দিশতো ই এক ডাঙৰ পদক্ষেপ হিচাপে বিবেচিত হ’ব।

বন্দে ভাৰত শ্লীপাৰ ৰে’লৰ চলাচল হোৱাৰ পিছত যাত্ৰীসকলে এই ৰে’লখনক ৰাজধানী বা ডুৰন্টো এক্সপ্ৰেছতকৈও অধিক পছন্দ কৰিব বুলি আশা কৰা হৈছে। গতিকে এই নতুন ৰে’লখনৰ চলাচল আৰম্ভ হোৱালৈ স্বাভাৱিকতেই অপেক্ষা কৰিছে সকলোৱে।