সংসদৰ শীতকালীন অধিৱেশনক লৈ সৰ্বদলীয় বৈঠক, উত্থাপন হ’ব ১০খনকৈ নতুন বিধেয়ক

সংসদৰ শীতকালীন অধিৱেশন

১ ডিচেম্বৰৰ পৰা আৰম্ভ হ’বলগীয়া সংসদৰ শীতকালীন অধিৱেশনৰ বাবে ১২খন বিধেয়ক তালিকাভুক্ত কৰিছে চৰকাৰে। য’ত চৰকাৰে অধিৱেশনত উত্থাপন কৰাৰ পৰিকল্পনা কৰিছে ১০খন নতুন বিধেয়ক। এই ১০খন নতুন বিধেয়কৰ ভিতৰত ব্যক্তিগত খণ্ডৰ বাবে পাৰমাণৱিক খণ্ড মুকলি কৰা, উচ্চ শিক্ষাৰ সংস্কাৰ, চণ্ডীগড়ৰ প্ৰশাসনক বিধানমণ্ডল নথকা কেন্দ্ৰীয় শাসিত অঞ্চলৰ সৈতে মিলাৱাৰ বিধেয়ক অন্তৰ্ভুক্ত কৰা হৈছে।

এই বিধেয়কসমূহৰ ভিতৰত বীমা খণ্ডৰ সংস্কাৰ, ছিকিউৰিটিজ বজাৰ, ঘাইপথৰ বাবে ভূমি অধিগ্ৰহণ সৰলীকৰণৰ সৈতে জড়িত বিধেয়কসমূহো অন্তৰ্ভুক্ত কৰা হৈছে। অৱশ্যে এটা বিধেয়কক লৈ ইতিমধ্যে বিতৰ্কৰ সৃষ্টি হৈছে। ১৩১ নং সংবিধান সংশোধনীৰ বিধেয়কখনো তালিকাভুক্ত কৰা হৈছে।

এই বিধেয়কখনে চণ্ডীগড়ক সংবিধানৰ ২৪০ নং অনুচ্ছেদৰ অধীনত অন্তৰ্ভুক্ত কৰাৰ প্ৰস্তাৱ আগবঢ়াইছে যাতে ইয়াৰ প্ৰশাসনক আন কেন্দ্ৰীয় শাসিত অঞ্চলসমূহৰ দৰে কৰিব পৰা যায়, য’ত বিধানমণ্ডল নাই। যেনে আন্দামান আৰু নিকোবৰ দ্বীপপুঞ্জ, লক্ষদ্বীপ, দাদৰা আৰু নগৰ হাভেলী আৰু দমন আৰু ডিউ, আৰু পুডুচেৰী (যেতিয়া ইয়াৰ বিধানসভা ভংগ বা স্থগিত হয়)।

২৪০ নং অনুচ্ছেদত ৰাষ্ট্ৰপতিক কিছুমান বিশেষ কেন্দ্ৰীয় শাসিত অঞ্চল, যেনে আন্দামান আৰু নিকোবৰ দ্বীপপুঞ্জ, লক্ষদ্বীপ, দাদৰা আৰু নগৰ হাভেলী আৰু দমন আৰু ডিউ, আৰু পুডুচেৰী (যেতিয়া ইয়াৰ বিধানসভা ভংগ বা স্থগিত হয়)ৰ বাবে আইন প্ৰণয়নৰ ক্ষমতা প্ৰদান কৰা হৈছে। এই কেন্দ্ৰীয় শাসিত অঞ্চলসমূহৰ শান্তি, উন্নয়ন, আৰু সুশাসনৰ বাবে ৰাষ্ট্ৰপতিয়ে আইন প্ৰণয়ন কৰিব পাৰে।

কংগ্ৰেছ আৰু আকালি দলৰ লগতে পঞ্জাৱৰ দলসমূহেও এই বিধেয়কখনৰ বিৰোধিতা কৰিছে। ইয়াৰ ফলত চণ্ডীগড়ৰ ওপৰত পঞ্জাৱৰ দখল দুৰ্বল হ’ব পাৰে আৰু চণ্ডীগড়ক পঞ্জাৱৰ পৰা পৃথক কৰাৰ ষড়যন্ত্ৰৰ অভিযোগ। শীতকালীন অধিৱেশনৰ প্ৰথম দেওবাৰে সৰ্বদলীয় বৈঠক আহ্বান কৰিছে চৰকাৰে। এই বিধেয়কখনক লৈ সৰ্বদলীয় বৈঠক আৰু সংসদৰ অধিৱেশনত প্ৰতিবাদ আৰু হুলস্থুলৰ সম্ভাৱনা আছে।

চৰকাৰে তালিকাভুক্ত কৰা বিধেয়কসমূহ হ’ল-

জন বিশ্বাস (বিধান সংশোধনী) বিধেয়ক, ২০২৫
Insolvency and Bankruptcy (Amendment) Bill , ২০২৫
বীমা আইন (সংশোধনী) বিধেয়ক, ২০২৫
মণিপুৰ সামগ্ৰী আৰু সেৱা কৰ (সংশোধনী) বিধেয়ক, ২০২৫
বাতিল আৰু সংশোধনী বিধেয়ক, ২০২২
ৰাষ্ট্ৰীয় ঘাইপথ (সংশোধনী) বিধেয়ক, ২০২৫
পাৰমাণৱিক শক্তি বিল, ২০২৫
কৰ্পৰেট আইন (সংশোধনী) বিধেয়ক, ২০২৫
ছিকিউৰিটিজ মাৰ্কেট ক’ড বিল (এছএমচি), ২০২৫
The Arbitration and Conciliation (Amendment) Bill, ২০২৫
ভাৰতীয় উচ্চ শিক্ষা আয়োগৰ বিধেয়ক, ২০২৫
সংবিধান (১৩১ সংখ্যক সংশোধনী) বিধেয়ক, ২০২৫