Indian Post Office: গ’লেই শুনিব লিংক নাই ! ডাকঘৰৰ এই ছবিখন কেতিয়া সলনি হ’ব?

ডাকঘৰ

কাউণ্টাৰৰ সন্মুখত গ্ৰাহকৰ দীঘলীয়া শাৰী। কাউণ্টাৰৰ ভিতৰত অসহায় হৈ বহি আছে এজন কৰ্মচাৰী। তেওঁ কেনেকৈ সেৱা আগবঢ়াব! কাৰণ লিংক নাই। প্ৰায় সংখ্যক লোকে ডাকঘৰত এনে সমস্যাৰ সন্মুখীন হয়। বেংকৰ দৰে মাজে মাজে ডাকঘৰত লিংক নোহোৱা হয়। ফলত সমস্যাৰ সন্মুখীন হয় গ্ৰাহকসকল। শেহতীয়াকৈ ডাক বিভাগে মহানগৰীৰ অকাৰ্যকৰী ডাকঘৰ বন্ধ কৰি গ্ৰাম্য ডাকঘৰৰ সেৱা উন্নত কৰাৰ কথা চিন্তা কৰিবলৈ আৰম্ভ কৰিছে। কিন্তু এইবাৰ সলনি হ’বনে গ্ৰাহকৰ এই ধৰণৰ হাৰাশাস্তিৰ ছবিখন?

পশ্চিম বংগৰ এটা ডাকঘৰৰ এনে এক ঘটনাই ডাক সেৱাৰ প্ৰকৃত ছবিখন পোহৰলৈ আনিছে। বাংকুৰা চহৰৰ মূল ডাকঘৰটো খোলাৰ আগতেই গ্ৰাহকসকলে দীঘলীয়া শাৰী পাতি থিয় হোৱা দেখা গৈছিল। লগে লগে ডাকঘৰৰ কাউণ্টাৰৰ সন্মুখৰ লাইনটো ডাঙৰ হৈ পৰিল। গ্ৰাহকসকলে অভিযোগ কৰিছিল যে, ডাকঘৰত নাছিল ইণ্টাৰনেট সংযোগ। ফলত সেৱা লাভ কৰিবলৈ ঘণ্টাৰ পিছত ঘণ্টা শাৰী পাতি থাকিবলগীয়া হৈছিল। ইফালে, তেওঁলোকৰ হাতত নাছিল আন কোনো বিকল্প।

গ্ৰাহকসকলে অভিযোগ কৰে যে, সংযোগৰ অভাৱৰ সমস্যাটোৱে তেওঁলোকক প্ৰায়ে অশান্তি দিয়ে। এজনে কয়, “প্ৰায়ে এনে সমস্যা হয়।” আন এজনে কয়, “আমি ঘণ্টাৰ পিছত ঘণ্টা ধৰি দীঘলীয়া শাৰীত থিয় দি আছো। শ শ মানুহ এনেকৈ থিয় হৈ আছে। আমি বিচাৰো এই সমস্যাটো সোনকালে সমাধান হওক।”

কিন্তু এই ছবিখন কোনো নিৰ্দিষ্ট দিন বা নিৰ্দিষ্ট ডাকঘৰৰ নহয়। বাংকুৰা চহৰৰ মূল ডাকঘৰেই হওক বা যিকোনো শাখা ডাকঘৰেই হওক, ছবিখন সকলোতে প্ৰায় একেই। গ্ৰাম্য ডাকঘৰত সেৱাৰ অৱস্থা আৰু বেয়া। এনে পৰিস্থিতিত শেহতীয়াকৈ ডাক বিভাগে ঘোষণা কৰিছে যে, মহানগৰীৰ অকাৰ্যকৰী ডাকঘৰ বন্ধ কৰি তেওঁলোকৰ কৰ্মচাৰী আৰু সঁজুলি গ্ৰাম্য ডাকঘৰলৈ স্থানান্তৰিত কৰি সেৱা উন্নত কৰাৰ চেষ্টা কৰিব। ডাক বিভাগৰ এই নতুন পদক্ষেপে সেৱাৰ অৱস্থা কেনেদৰে সলনি কৰিব? সেয়া হ’ব লক্ষণীয়।

বাংকুৰা ডাক বিভাগৰ অধীক্ষক অনিৰুদ্ধ বিশ্বাসে আশা প্ৰকাশ কৰে যে, “গাওঁবোৰত বহু ডাকঘৰ আছে যিবোৰ এজন ব্যক্তিৰ দ্বাৰা পৰিচালিত হয়। সেইবোৰ উন্নীত কৰিলে ৰাইজ বহুত উপকৃত হ’ব। ইয়াৰ উপৰিও জনসংখ্যা বৃদ্ধি হোৱা অঞ্চলত নতুন ডাকঘৰ স্থাপনৰ কথাও আমি ভাবিব পাৰোঁ। অকাৰ্যকৰী ডাকঘৰ সেই অঞ্চললৈ স্থানান্তৰ কৰিব পাৰি, কৰ্মচাৰী স্থানান্তৰ কৰিব পাৰি।”