আপোনাৰো আছে নেকি এই কোম্পানীৰ স্বাস্থ্য বীমা? চিকিৎসাৰ ক্ষেত্ৰত নাপাব এনে সুবিধা

সাম্প্ৰতিক সময়ত স্বাস্থ্য বীমাৰ প্ৰয়োজনীয়তা তথা গুৰুত্বৰ বিষয়ে নিশ্চয় বহলাই বাখ্যা নকৰিলেও হ’ব। সাধাৰণৰ পৰা আৰম্ভ কৰি ব্যয়বহুল চিকিৎসাৰ ক্ষেত্ৰত স্বাস্থ্য বীমাই যথেষ্ট সকাহ প্ৰদান কৰে। পিছে স্বাস্থ্য বীমাৰ গ্ৰাহকসকলৰ বাবে এক অত্যন্ত চিন্তনীয় খবৰ। এতিয়া স্বাস্থ্য বীমাৰ নগদবিহীন চিকিৎসাৰ সুবিধা লাভ কৰিব নোৱাৰিব গ্ৰাহকসকলে। মেক্স হাস্পতালত চিকিৎসাৰ বাবে যোৱা গ্ৰাহকে নাপাব নগদবিহীন চিকিৎসাৰ সুবিধা। নিভা বুপা, ষ্টাৰ হেল্থ, কেয়াৰ হেল্থ ইনশ্বুৰেঞ্চ কোম্পানীয়ে নগদবিহীন চিকিৎসা সেৱা বন্ধ কৰা বুলি জানিবলৈ দিছে।

সেই অনুসাৰে সমগ্ৰ দেশজুৰি থকা মেক্স হাস্পতালৰ শাখাসমূহত এতিয়া নগদবিহীন চিকিৎসাৰ ব্যৱস্থা উপলব্ধ নহ’ব। আনহাতে বাজাজ এলায়েঞ্জেও অহা ১ ছেপ্টেম্বৰৰ পৰা উত্তৰ ভাৰতত নগদবিহীন চিকিৎসা সেৱা বন্ধ কৰি দিছে। নিভা বুপা, ষ্টাৰ হেল্থ, কেয়াৰ হেল্থ ইনশ্বুৰেঞ্চে এতিয়াৰ পৰা মেক্স হাস্পতালত নগদবিহীন চিকিৎসা সেৱা প্ৰদান নকৰে বুলি জানিবলৈ দিছে।

এনে পৰিস্থিতিত বীমা গ্ৰাহকে এতিয়া নিজৰ চিকিৎসাৰ খৰচ নিজেই বহন কৰিব লাগিব। চিকিৎসালয়ৰ পৰা ডিচচাৰ্জ হোৱাৰ পিছত ডিচচাৰ্জ চাৰ্টিফিকেট, প্ৰেছক্ৰিপচন, বিল, আধাৰ কাৰ্ড, পেন কাৰ্ড আৰু বিল জমা দিলে সেই ধন ঘূৰাই দিয়া হ’ব। অৰ্থাৎ গ্ৰাহকে খৰচ কৰা ধন বীমাৰ অধীনত ঘূৰাই দিয়া হ’ব।

ইফালে বাজাজ এলায়েঞ্জ জেনেৰেল ইনশ্বুৰেঞ্চে অংশীদাৰ চিকিৎসালয়ৰ পৰা অভিযোগৰ ভিত্তিত লৈছে এই সেৱা বন্ধ কৰাৰ সিদ্ধান্ত। অহা ১ ছেপ্টেম্বৰৰ পৰা উত্তৰ ভাৰতৰ চিকিৎসালয়সমূহত এই বীমাৰ পলিচিধাৰীসকলে নগদবিহীন চিকিৎসাৰ সুবিধা লাভ কৰিব নোৱাৰিব৷

এছ’চিয়েচন অৱ হেল্থকেয়াৰ প্ৰভাইডাৰ্ছ (AHPI)- এ মেক্স হেল্থকেয়াৰ আৰু মেডান্টাৰ দৰে চিকিৎসালয়কে ধৰি দেশৰ ১৫ হাজাৰৰো অধিক চিকিৎসালয়ক প্ৰতিনিধিত্ব কৰে। তেওঁলোকে কয় যে চিকিৎসাৰ খৰচ বৃদ্ধি হোৱাৰ পিছতো বাজাজ এলায়েঞ্জ ৰেইম্বৰ্ছমেণ্টৰ হাৰ সলনি কৰা নাই। আনহাতে পূৰ্বৰ হাৰত চিকিৎসা অব্যাহত ৰখাটো আৰ্থিকভাৱে সম্ভৱপৰ নহয় বুলি চিকিৎসালয়সমূহে যুক্তি দিছে।

AHPIৰ সঞ্চালক প্ৰধান ডাঃ গিৰধৰ জ্ঞানে কয় যে ভাৰতত প্ৰতি বছৰে ৭-৮ শতাংশ হাৰত চিকিৎসা ব্যয় বৃদ্ধি পাইছে। ইয়াৰ ভিতৰত কৰ্মচাৰীৰ দৰমহা, ঔষধ, চিকিৎসা সঁজুলি, বিদ্যুৎ, পানী আৰু অন্যান্য খৰচো অন্তৰ্ভুক্ত। চিকিৎসালয়সমূহে খৰচ কমোৱাৰ বাবে যৎপৰোনাস্তি চেষ্টা কৰিছে যদিও পুৰণি হাৰত চিকিৎসা প্ৰদান কৰাটো সম্ভৱ নহয় বুলি তেওঁ লগতে কয়।

বাজাজ এলায়েঞ্জে চিকিৎসাৰ বৰ্ধিত খৰচৰ প্ৰতি লক্ষ্য ৰাখি প্ৰতি ২ বছৰৰ মূৰে মূৰে শুল্ক সলনি কৰাৰ প্ৰস্তাৱ নাকচ কৰি আহিছে। ইয়াৰ পৰিৱৰ্তে হাৰ হ্ৰাস কৰাৰ কথা কৈ আহিছে বাজাজ এলায়েঞ্জে। কোম্পানীটোৱে দাবী নিষ্পত্তি কৰাত পলম কৰে বুলিও চিকিৎসালয়সমূহে অভিযোগ কৰিছে।