Top9: অসম আৰক্ষীৰ সফলতাৰ পৰা ৰাহুল-ছোনিয়াৰ বিৰুদ্ধে এজাহাৰলৈ, দিনটোৰ খবৰ…
Top9 News: অসমত অব্যাহত আছে জনজাতিকৰণ সন্দৰ্ভত মন্ত্ৰী গোটৰ প্ৰতিবেদনক লৈ প্ৰতিক্ৰিয়া। একাংশই ইয়াৰ সমৰ্থন কৰাৰ বিপৰীতে জনজাতী সংগঠনসমূহে ইয়াৰ বিৰোধিতা কৰে।
ৰাহুল-ছোনিয়া
আজিৰ দিনটোৰ বহুকেইটা গুৰুত্বপূৰ্ণ খবৰ তলত উল্লেখ কৰা হ’ল-
১) শনিবাৰে বিধানসভাত দাখিল হয় ৬ জনগোষ্ঠীৰ জনজাতিকৰণ সন্দৰ্ভত মন্ত্ৰীগোটৰ প্ৰতিবেদন। ইয়াৰ পাছতে ৰাজ্যজুৰি ইয়াৰ প্ৰতিক্ৰিয়া অব্যাহত আছে। আক্ৰাছুৱে ২০২৬ চনৰ নিৰ্বাচনৰ পূৰ্বে জনজাতিৰ দাবী কৰে। লগতে কয় যে, ৩ ডিচেম্বৰত গণ সমাৱেশ হ’ব ৷ যেতিয়ালৈকে জনজাতিকৰণ নহয় আমাৰ প্ৰতিবাদ চলি থাকিব ৷ ইয়াৰ বিপৰীতে জনজাতিকৰণৰ প্ৰতিবেদনক লৈ ক্ষোভিত হৈ পৰিছে জনজাতি সংগঠনসমূহ। আজি মন্ত্ৰী গোটৰ প্ৰতিবেদন দাহ কৰে জনজাতি সংগঠনসমূহৰ সমন্বয়ৰক্ষী সমিতিয়ে (CCTOA) য়ে ।
২) বিপদ বাঢ়িছে শ্যামকানু মহন্ত আৰু সিদ্ধাৰ্থ শৰ্মাৰ। বাক্সা কাৰাগাৰৰ ভিতৰত ইডিয়ে দুয়োৰে জেৰা চলায়। প্ৰাণৰ শিল্পী জুবিন গাৰ্গৰ হত্যাৰ গোচৰৰ লগতে অৰ্থনৈতিক অপৰাধৰ গোচৰতো অভিযুক্ত দুয়ো। উল্লেখ্য যে, জুবিন গাৰ্গৰ মৃত্যুৰ পাছতে দুয়ো গ্ৰেপ্তাৰ হৈ কাৰাগাৰত বন্দী হৈ আছে। এতিয়া দুয়োৰে আগত আন এক নতুন বিপদ।
৩) বিটিচি সচিবালয়ত হাজাৰ হাজাৰ শিক্ষাৰ্থীয়ে প্ৰতিবাদ কৰি হিংসাত্মক কাৰ্য সংঘটিত কৰিছিল। এতিয়া ইয়াৰ বিৰুদ্ধে কোকৰাঝাৰ থানাত গোচৰ ৰুজু কৰিছে BTCৰ অধ্যক্ষ ত্ৰিদীপ দৈমাৰীয়ে। তেওঁ কয় যে, আন্দোলনৰ নামত হিংসাত্মক কাৰ্যকলাপ কৰিছে। সকলোৱে গণতান্ত্ৰিকভাৱে প্ৰতিবাদ কৰিব পাৰে। কিন্তু হিংসা মানি ল’ব নোৱাৰি।
৪) আৰক্ষীৰ বৃহৎ সফলতা। চুৰি হোৱা বিলাসী বাহন ২৪ ঘণ্টা নহওতেই উদ্ধাৰ কৰিবলৈ সক্ষম হয় বাইহাটা আৰক্ষী । শুকুৰবাৰে নিশা তিনিজনে চুৰি কৰি নিছিল বিলাসী স্কৰ্পিঅ বাহন। পাছত আৰক্ষীয়ে অভিযান চলাই তিনিওকে গ্ৰেপ্তাৰ কৰিবলৈ সক্ষম হয়। গ্ৰেপ্তাৰ হোৱা অভিযুক্ত কেইজন ভবানীপুৰৰ আলী হুছেইন, বৰপেটা ৰোডৰ খলিল খান আৰু বঙাইগাঁৱৰ নুৰমহম্মদ খান বুলি জানিব পৰা গৈছে।
৫) কাইলৈৰ পৰা আৰম্ভ হ’ব সংসদৰ শীতকালীন অধিৱেশন। ইয়াৰ পূৰ্বে আজি সম্পন্ন হয় সৰ্বদলীয় বৈঠক। প্রতিৰক্ষা মন্ত্রী ৰাজনাথ সিঙৰ সভাপতিত্বত অনুষ্ঠিত হোৱা এই বৈঠকত শাসক আৰু বিৰোধী দলৰ সকলো ডাঙৰ নেতাই অংশগ্ৰহণ কৰে। ১৯ ডিচেম্বৰলৈ চলিব এই অধিৱেশন। য’ত চৰকাৰে পাৰমাণৱিক শক্তি খণ্ড, উচ্চ শিক্ষাৰ আন্তঃগাঁথনি সংস্কাৰ, আৰু কৰ্পৰেট/ষ্টক বজাৰৰ নিয়মৰ সৈতে জড়িত ১০খন গুৰুত্বপূৰ্ণ বিধেয়ক উত্থাপন কৰাৰ সম্ভাৱনা আছে।
৬) কংগ্ৰেছ সাংসদ ৰাহুল গান্ধী আৰু ছোনিয়া গান্ধীৰ বিৰুদ্ধে পুনৰ এজাহাৰ দাখিল দিল্লী আৰক্ষীৰ অৰ্থনৈতিক অপৰাধ শাখাৰ। নেশ্যনেল হেৰাল্ড গোচৰত ছোনিয়া গান্ধী, ৰাহুল গান্ধীৰ লগতে ৯ জন ব্যক্তি আৰু তিনিটা কোম্পানীৰ বিৰুদ্ধে নতুনকৈ এজাহাৰ দাখিল হৈছে। অভিযোগ অনুসৰি, মাত্ৰ ৫০ লাখ টকাৰ বিনিময়ত এছ’চিয়েটেড জাৰ্নেলছ লিমিটেডৰ (AJL) ২০০০ কোটি টকাৰ সম্পত্তি ক্ৰয় কৰা ষড়যন্ত্ৰ কৰিছিল।
৭) দিল্লী আৰক্ষীৰ স্পেচিয়েল চেলে আটক কৰিছে তিনি সন্ত্ৰাসবাদীক। অভিযোগ অনুসৰি তিনিওৰে পাকিস্তানী চোৰাংচোৱা সংস্থা আই এছ আইৰ সৈতে সম্পৰ্ক আছে। তিনিও পাকিস্তানী গেংষ্টাৰ শ্বাহজাদ ভট্টীৰ সৈতেও জড়িত থকাৰ সন্দেহ। এই সমগ্ৰ ঘটনা সন্দৰ্ভত বৰ্তমান তদন্ত অব্যাহত আছে।
৮) আজি প্ৰধানমন্ত্ৰী নৰেন্দ্ৰ মোদীৰ মন কী বাতৰ ১২৮ সংখ্যক খণ্ড প্ৰচাৰ হয়। এই সময়চোৱাত মোদীয়ে মহিলা এদিনীয়া বিশ্বকাপ আৰু ব্লাইণ্ড ৱমেন টি২০ ৱাৰ্ল্ডকাপৰ খিতাপ দখল কৰা মহিলা খেলুৱৈসকলৰ বিষয়ে কয়। ইয়াৰোপৰি তেওঁ অভিলেখ সৃষ্টিকাৰী খাদ্য শস্য উৎপাদন, ইছৰ’ৰ ড্ৰ’ন প্ৰতিযোগিতা আৰু ভাৰতৰ বিভিন্ন অঞ্চলৰ মৌৰ বিষয়ে উল্লেখ কৰে।
৯) শ্ৰীলংকাত দিটৱাহ ঘূৰ্ণীবতাহৰ কালৰূপ। এই পৰ্যন্ত ১৫০ জন লোকৰ মৃত্যু আৰু কেইবাজনো সন্ধানহীন হৈ আছে। ইয়াৰ পাছতে এই বতাহে এতিয়া ভাৰতত প্ৰৱেশ কৰিব পাৰে। আজি তামিলনাডু, পডুচেৰীৰ উপকূলত আঘাত হানিব পাৰে। ইতিমধ্যে বিভিন্ন ঠাইত সতৰ্কবাণী জাৰি কৰিছে বতৰ বিজ্ঞান কেন্দ্ৰই। ইফালে শ্ৰীলংকাক সহায় কৰাৰ বাবে ভাৰতে আৰম্ভ কৰিছে ‘অপাৰেশ্যন সাগৰ বন্ধু’।
অন্য খবৰ পঢ়কঃ আনিব UCC, বৃদ্ধি হ’ব যুৱতীৰ বিয়াৰ ন্যূনতম বয়স! সদনত মুখ্যমন্ত্ৰীয়ে কি কি ক’লে…