Morning News: ৰাজ্যৰ পৰা দেশ তথা আন্তঃৰাষ্ট্ৰীয়লৈ, পলকতে পঢ়ক পুৱাৰ কেইটামান গুৰুত্বপূৰ্ণ খবৰ
২০৩০ চনত হ’বলগীয়া কমনৱেলথ গেমছৰ শতবৰ্ষীয় সংস্কৰণৰ আয়োজনৰ স্বত্ব বিচাৰি আনুষ্ঠানিক প্ৰস্তাৱ দাখিল কৰিছে ভাৰতে। শুকুৰবাৰে লণ্ডনত কমনৱেলথ স্প’ৰ্টছক এই বিষয়ত ভাৰতে আনুষ্ঠানিক প্ৰস্তাৱ দাখিল কৰে।

পুৱাৰ মুখ্য খবৰ
প্ৰিয় পাঠক আমাৰ সৈতে সংযুক্ত হোৱাৰ বাবে আপোনাৰ প্ৰতি কৃতজ্ঞতা জনালোঁ। ব্যস্তময় জীৱনত চৌপাশৰ সকলো ঘটনা প্ৰবাহৰ খবৰ ৰখাটো সম্ভৱ নহয়। সেই বুলি আপুনি জানো খবৰৰ পৃথিৱীত এভুমুকি নমৰাকৈ থাকিব পাৰিব। সেই বাবেই দিনটোৰ আৰম্ভণিতে আমি আপোনাৰ বাবে লৈ আহিছোঁ এই শিতানটো। ব্যস্ততাপূৰ্ণ জীৱনৰ পৰা মাত্ৰ দুই মিনিট সময় উলিয়াই জানি লওক আপোনাৰ বাবে প্ৰয়োজনীয় কেইটামান খবৰ।
- দুদিনীয়া ভ্ৰমণসূচী সামৰি শুকুৰবাৰে বিয়লি পুনৰ দিল্লীলৈ উভতে কেন্দ্ৰীয় গৃহমন্ত্ৰী অমিত শ্বাহে। বৃহস্পতিবাৰে সন্ধিয়া অসমত উপস্থিত হোৱা কেন্দ্ৰীয় গৃহমন্ত্ৰীগৰাকীয়ে এই ভ্ৰমণত কেইবাটাও কাৰ্যসূচীত অংশ লয়। কালি বিয়লি দিল্লীলৈ উভতাৰ সময়ত মুখ্যমন্ত্ৰী হিমন্ত বিশ্ব শৰ্মা, কেন্দ্ৰীয় মন্ত্ৰী সৰ্বানন্দ সোণোৱাল, বিজেপিৰ ৰাজ্যিক সভাপতি দিলীপ শইকীয়াসহ দলৰ কেইবাগৰাকীও বিমানবন্দৰত উপস্থিত হৈ অমিত শ্বাহক বিদায় সম্ভাষণ জনায়।
- অসম ভ্ৰমণৰ সময়ত কেন্দ্ৰীয় গৃহমন্ত্ৰী অমিত শ্বাহে গুৱাহাটীত ৰাজভৱনৰ নৱনিৰ্মিত ব্ৰহ্মপুত্ৰ উইং উদ্বোধন কৰে। তেওঁ লগতে এই অনুষ্ঠানৰ পৰাই দেৰগাঁৱৰ লাচিত বৰফুকন পুলিচ একাডেমীত ৪৫ কোটি টকা ব্যয় সাপেক্ষে স্থাপন কৰা ৰাষ্ট্ৰীয় চাইবাৰ ফৰেনছিক লেবৰেটৰী, উত্তৰ-পূৰ্বাঞ্চলৰ ভাৰ্চুৱেলি উদ্বোধন কৰে। তদুপৰি আই টি বি পি, এছ এছ বি আৰু অসম ৰাইফলছৰ বিভিন্ন উন্নয়নমূলক প্ৰকল্পৰ শুভাৰম্ভ তথা আধাৰশিলা স্থাপন কৰে কেন্দ্ৰীয় গৃহমন্ত্ৰীগৰাকীয়ে।
- অসম ভ্ৰমণৰ সময়তে কেন্দ্ৰী গৃহমন্ত্ৰী শ্বাহে আগন্তুক বৰ্ষত অনুষ্ঠিত হ’বলগীয়া ৰাজ্যৰ বিধানসভা নিৰ্বাচনত জয়লাভ কৰি এন ডি এই ক্ৰমাগতভাৱে তৃতীয়বাৰৰ বাবে চৰকাৰ গঠন কৰিব বুলি দৃঢ় দাবী কৰে। পঞ্চায়ত প্ৰতিনিধি সন্মিলনত ভাষণ দি গৃহমন্ত্ৰী শ্বাহে প্ৰধানমন্ত্ৰী মোদীয়ে আৰম্ভ কৰা আৰু মুখ্যমন্ত্ৰী হিমন্ত বিশ্ব শৰ্মাই ৰূপায়ণ কৰা বৃহৎ উন্নয়নমূলক কামৰ বাবে অহা বছৰ বিজেপি নেতৃত্বাধীন এন ডি এয়ে অসমত একেৰাহে তৃতীয়খন চৰকাৰ গঠন কৰিব বুলি দৃঢ়তাৰে কয়।
- শুকুৰবাৰে গুৱাহাটী মহানগৰীত এটা মৃতদেহ উদ্ধাৰক লৈ সৃষ্টি হয় চাঞ্চল্যৰ। মহানগৰীৰ চানমাৰী কলনীৰ ৰোহিনী এপাৰ্টমেণ্টৰ কোঠাৰ ভিতৰত শুকুৰবাৰে বীৰেন তামুলী নামৰ এজন লোকৰ মৃতদেহ ৰক্তাক্ত অৱস্থাত উদ্ধাৰ হয়। মহানগৰ আৰক্ষীয়ে ইতিমধ্যে এই ঘটনাৰ তদন্ত আৰম্ভ কৰিছে। আৰক্ষীয়ে প্ৰাথমিক অনুসন্ধানৰ ভিত্তিত বীৰেন তামুলী হত্যাকাণ্ডৰ বলি হোৱা বুলি সন্দেহ প্ৰকাশ কৰিছে।
- নগাঁও কেন্দ্ৰীয় কাৰাগাৰত চলি থকা ড্ৰাগছৰ অবাধ বেহাৰ তথ্য ফাদিল কৰিছে স্বয়ং জিলাখনৰ আয়ুক্তই। শুকুৰবাৰে আকস্মিক পৰিদৰ্শনৰ সময়ত নগাঁৱৰ আয়ুক্ত দেৱাশীষ শৰ্মাই কাৰাগাৰখনত ড্ৰাগছৰ দৰে নিচাযুক্ত সামগ্ৰী সৰবৰাহৰ তথ্য ধৰা পেলায়। কাৰাগাৰৰ দুগৰাকী দুই নিৰাপত্তাৰক্ষীয়েই কাৰাগাৰৰ ভিতৰত নিষিদ্ধ ড্ৰাগছ যোগান ধৰিছিল বুলি অভিযোগ উঠিছে। ইতিমধ্যে জিলা আৰক্ষী অধীক্ষকে এই সমগ্ৰ বিষয়টোত গোচৰ ৰুজু কৰি তদন্ত আৰম্ভ কৰিছে।
- শুকুৰবাৰৰ পৰা আৰম্ভ হৈছে এছিয়া কাপ ২০২৫ হকী প্ৰতিযোগিতাৰ। প্ৰতিযোগিতাত কালি নিজৰ প্ৰথমখন মেচত জয়েৰে অভিযান আৰম্ভ কৰিছে আয়োজক ভাৰতে। কালি নিজৰ প্ৰথমখন মেচতে চীনক ৩-৪ ব্যৱধানত পৰাস্ত কৰে ভাৰতে। অধিনায়ক হৰমনপ্ৰীত সিঙে দৰ্শনীয় হেট্ৰিকেৰে ভাৰতৰ এই জয়ত প্ৰধান ভূমিকা লয়।
- পেৰিছত চলি থকা বিশ্ব বেডমিণ্টন চেম্পিয়নশ্বিপ ২০২৫ৰ ছেমি ফাইনেলত প্ৰৱেশ কৰিছে ভাৰতীয় ডাবলছ যুটি সাত্ৱিক ছাইৰাজ ৰেংকিৰেডী আৰু চিৰাগ শ্বেট্টীয়ে। মালয়েছিয়ান যুটি এৰন চিয়া আৰু ছ’হ ৱুই য়িকক ২১-১২, ২১-১৯ ব্যৱধানত পৰাস্ত কৰি সাত্বিক-চিৰাগে ছেমিত প্ৰৱেশ কৰাৰ লগে লগে এটা পদকো নিশ্চিত কৰিছে। অৱশ্যে কোৱাৰ্টাৰ ফাইনেলত পৰাস্ত হৈ প্ৰতিযোগিতাৰ পৰা বাহিৰ হৈছে পি ভি সিন্ধু।
- চলিত বৰ্ষৰ শেষৰফালে ভাৰত ভ্ৰমণলৈ আহিব ৰুছ ৰাষ্ট্ৰপতি ভ্লাদিমিৰ পুটিন। ডিচেম্বৰ মাহত ৰাষ্ট্ৰপতি পুটিনৰ ভাৰত ভ্ৰমণৰ সময় চূড়ান্ত কৰা হৈছে। ক্ৰেমলিনৰ বৈদেশিক নীতি উপদেষ্টা ইউৰি উছাকোভে শুকুৰবাৰে পুটিনৰ ভাৰত ভ্ৰমণ সন্দৰ্ভত তথ্য প্ৰদান কৰে। উল্লেখ্য যে প্ৰায় ৪ বছৰৰ পিছত ভাৰতলৈ আহিব পুটিন। ইয়াৰ পূৰ্বে ২০২১ চনৰ ৬ ডিচেম্বৰত অন্তিমবাৰৰ বাবে ভাৰত ভ্ৰমণ কৰিছিল ৰুছ ৰাষ্ট্ৰপতিগৰাকীয়ে।
- ২০৩০ চনত হ’বলগীয়া কমনৱেলথ গেমছৰ শতবৰ্ষীয় সংস্কৰণৰ আয়োজনৰ স্বত্ব বিচাৰি আনুষ্ঠানিক প্ৰস্তাৱ দাখিল কৰিছে ভাৰতে। শুকুৰবাৰে লণ্ডনত কমনৱেলথ স্প’ৰ্টছক এই বিষয়ত ভাৰতে আনুষ্ঠানিক প্ৰস্তাৱ দাখিল কৰে। ভাৰতীয় কমনৱেলথ গেমছ এছ’চিয়েশ্যন আৰু গুজৰাট চৰকাৰৰ প্ৰতিনিধিত্বৰে গঠিত এই প্ৰতিনিধি দলক নেতৃত্ব দিয়ে গুজৰাটৰ ক্ৰীড়া মন্ত্ৰী হৰ্ষ সংঘৱীয়ে। ২০৩০ চনৰ অক্টোবৰ মাহত ১২ দিনৰ কাৰ্যসূচীৰে গুজৰাটৰ আহমেদাবাদ চহৰত কমনৱেলথ গেমছ আয়োজনৰ পৰিকল্পনা কৰা হৈছে।