শীতৰ আমেজ লবলৈ সহজেই ভ্ৰমণ কৰিব পাৰে আপোনাৰ গাৰ কাষতে থকা এইসমূহ ঠাই

অৰুণাচল

এতিয়া শীতৰ বতৰ । গ্ৰীষ্মত যিদৰে বৰষুণৰ এক সুকীয়া আমেজ থাকে, ঠিক তেনেদৰে শীতকালৰো আছে অনন্য আমেজ । কুঁৱলীৰ আচ্ছাদন, ফিৰফিৰিয়া বতাহ, নিশা টোপ টোপকৈ সৰা নিয়ৰৰ টোপালে শীতক অনন্য কৰি তোলে । জুই একুৰা জ্বলাই তাৰ কাষত বহি ৰসাল আড্ডা দিয়াৰ পৰা সুস্বাদু খাদ্য খোৱালৈকে শীতৰ আমেজ লোৱাৰ ভিন্ন উপায় আছে । বহুতে আকৌ শীতত ফুৰি ভালপায় । শীত মানেই বনভোজৰো বতৰ । ভ্ৰমণ প্ৰিয়সকলৰ বাবে এই প্ৰতিবেদনত আমি লৈ আহিছো উত্তৰ-পূবৰ কেইখনমান পৰ্যটন ক্ষেত্ৰৰ বিষয়ে, যত শীতকালত ভিৰ কৰেহি ভিন্ন ঠাইৰ পৰ্যটকে ।

টাৱাং (অৰুণাচল প্ৰদেশ)

অৰুণাচল প্ৰদেশৰ বমডিলাৰ পৰা প্ৰায় ১৮৩ কিমি দূৰত্বত সাগৰ পৃষ্ঠৰ পৰা ৩৫০০ মিটাৰ উচ্চতাত অৱস্থিত টাৱাং এক আকৰ্ষণীয় পৰ্যটন থলী । টাৱাং বৌদ্ধ মঠটোও ভ্ৰমণৰ বাবে অন্যতম শ্ৰেষ্ঠ ঠাই আৰু শীতকালত যেতিয়া বৰফ পৰে ঠাইখনৰ সৌন্দৰ্যই আপোনাক মন্ত্ৰমুগ্ধ কৰি তুলিব । চহৰখনত মধ্যমীয়াৰ পৰা প্ৰচণ্ড বৰফ পৰে । তথাপিও, এই চহৰখনলৈ যোৱাৰ আগতে সাৱধানতা অৱলম্বন কৰাটো প্ৰয়োজনীয় ।

কুঁৱলীয়ে আৱৰা চেলা পাছলৈও যাব পাৰে, যিটো সৰ্বোচ্চ উচ্চতাৰ পাহাৰীয়া পাছ । শীতকালত চেলা পাছখন এক যাদুকৰী বিস্ময়কৰ স্থানলৈ ৰূপান্তৰিত হয়, য’ত বৰফেৰে আবৃত পথ আৰু জলপ্ৰপাত থাকে। এজন ফটোগ্ৰাফাৰৰ বাবে ই স্বৰ্গ স্বৰূপ ! যদি আপুনি বৰফ ভাল পায় তেন্তে শীতকালত বৰফ পৰা উপভোগ কৰিবলৈ টাৱাং হৈছে এক উত্তম ঠাই ।

ছিকিম

শীতকালত উত্তৰ-পূব ভাৰতৰ অন্যতম আৱশ্যকীয় স্থান হ’ল ছিকিম ৰাজ্য । ৰাজ্যখন ইয়াৰ আচৰিত প্ৰাকৃতিক সৌন্দৰ্যৰ বাবে জনাজাত আৰু শীতকালত বৰফেৰে আবৃত পাহাৰ আৰু হ্ৰদবোৰে মনোৰম পৰিৱেশৰ সৃষ্টি কৰে । শীতকালত বৰফ পৰাৰ অভিজ্ঞতা লাভ কৰিবলৈ ছিকিম আটাইতকৈ উত্তম ঠাই । ছিকিমত যুমথাং, পেলিং আৰু লাচুং আদি চাবলগীয়া বহুতো ঠাই আছে । হিমালয়ৰ পাদদেশৰ এই ৰাজ্যখনত শীতকালত বৰফ পৰে আৰু এইটোৱেই হৈছে ৰাজ্যখনৰ সৰহভাগতে আপুনি পোৱা অন্যতম বস্তু ।

মায়’ডিয়া পাছঃ বৰফ প্ৰেমীৰ বাবে এক স্বৰ্গ

অৰুণাচল প্ৰদেশৰ আপাৰ দিবাং উপত্যকাৰ এখন সৰু চহৰ হৈছে মায়’ডিয়া, য’ত শীতকালত দেশৰ বিভিন্ন প্ৰান্তৰ পৰা পৰ্যটকে ভিৰ কৰেহি । শীতকালত মায়’ডিয়া বৰফৰ আচ্ছাদনেৰে আবৃত হৈ থাকে, যাৰ ফলত শীতকালীন মনোৰম পৰিৱেশৰ সৃষ্টি হয় । চহৰখনত বৰফ পৰে আৰু পৰ্যটকসকলে বছৰৰ শেষত বা জানুৱাৰী মাহত ভাৰত-চীন সীমান্তৰ এই গাঁওখনলৈ গৈ পাছৰ মাজেৰে ট্ৰেকিং বা বাইকিং অভিযানৰ আমেজ লয় ।

কাজিৰঙা ৰাষ্ট্ৰীয় উদ্যান

প্ৰাকৃতিক সম্পদৰ কেন্দ্ৰস্থল হিচাপে অসমে বিশ্বৰ মানচিত্ৰত স্থান লাভ কৰিছে । বনাঞ্চল, ৰাষ্ট্ৰীয় উদ্যান, বন্যপ্ৰাণী অভয়াৰণ্যই ৰাজ্যখনক ভ্ৰমণৰ যোগ্য কৰি তুলিছে । বিশ্ব ঐতিহ্য ক্ষেত্ৰ হিচাপে কাজিৰঙা ৰাষ্ট্ৰীয় উদ্যান পৰ্যটকৰ বাবে অন্যতম উল্লেখযোগ্য স্থান । কাজিৰঙা আৰু অসমৰ অন্যান্য ৰাষ্ট্ৰীয় উদ্যানসমূহত পৰিভ্ৰমী চৰাই আৰু বৃহৎ সংখ্যক বন্যপ্ৰাণী চোৱাৰ বাবে শীতকাল সৰ্বোত্তম সময় । প্ৰতি বৰ্ষত অক্টোবৰ মাহত কাজিৰঙা পৰ্যটকৰ বাবে মুকলি কৰি দিয়া হয় আৰু এপ্ৰিল মাহৰ শেষত পুনৰ পৰ্যটকৰ প্ৰৱেশ বন্ধ হৈ যায় ।

কাজিৰঙাত হাতী আৰু জীপ চাফাৰীৰ দ্বাৰা উদ্যানৰ ভিতৰলৈকে গৈ জীৱ-জন্তু চোৱাৰ সুবিধা আছে । বহুতে কাজিৰঙাত বনভোজ খাবলৈও আহে । বন্যপ্ৰাণী ফটোগ্ৰাফাৰৰ বাবে আকৰ্ষণৰ অন্যতম কেন্দ্ৰস্থল কাজিৰঙা ।

শ্বিলং

শ্বিলং হৈছে মেঘালয়ৰ ৰাজধানী চহৰ । বছৰৰ যিকোনো সময়তে ভ্ৰমণৰ বাবে উপযোগী এখন ঠাই শ্বিলং । ইয়াৰ উপৰিও এলিফেণ্ট জলপ্ৰপাত, বা মৌছমাই গুহা, বৰাপানী, মাউলিননঙৰ দৰে ঠাইয়ে পৰ্যটকক হাত বাউল দি মাতে । শীতকালত শ্বিলং নিজে নিজে অধিক মোহনীয়া হৈ পৰে । নদী, হ্ৰদ, জলপ্ৰপাতৰ আকৰ্ষণীয় ৰূপৰ লগতে চেৰী ফুলৰ সৌন্দৰ্যই আপোনাক ভাৰতত আছে নে আন ঠাইত আছে সেইটো এবাৰ ভাবিবলৈ বাধ্য কৰিব । প্ৰতি বছৰে মেঘালয়ৰ শ্বিলঙত দৰ্শকে চেৰী ফুলা উৎসৱত এই ফুলৰ আচৰিত সৌন্দৰ্যৰ সাক্ষী হ’ব পাৰে । সাধাৰণতে নৱেম্বৰ মাহত অনুষ্ঠিত হোৱা এই উৎসৱ শ্বিলঙৰ ৱাৰ্ড’ছ লেক অঞ্চলত চেৰী ফুল ফুলাৰ আনন্দত উদযাপন কৰা হয় । এই উৎসৱত সাংস্কৃতিক অনুষ্ঠান, সংগীত, খাদ্য আদিৰ অনন্য পৰিবেশৰ সৃষ্টি হয় ।

কহিমা

নাগালেণ্ড মূলতঃ হিমালয়ৰ পাদদেশত থকা ৰাজ্যসমূহৰ ভিতৰত অন্যতম আৰু সেয়েহে শীতকালত ই একেবাৰে মোহনীয়া হৈ পৰে । ডিচেম্বৰ মাহৰ প্ৰথমাৰ্ধত প্ৰতি বছৰে উদযাপন কৰা হৰ্ণবিল উৎসৱ উপভোগৰ অন্যতম অনুষ্ঠান । হৰ্ণবিল উৎসৱে বিশ্বৰ বিভিন্ন প্ৰান্তৰ পৰা হাজাৰ হাজাৰ লোকক আকৰ্ষণ কৰে ।

হাফলং

অসমৰ পাহাৰীয়া অঞ্চলসমূহৰ ভিতৰত হাফলং অন্যতম ৷ ডিমা হাছাও জিলাৰ হাফলঙৰ প্ৰাকৃতিক বৈশিষ্ট্যৰ বাবে সকলোৱে ইয়াক ‘মিনি ছুইজাৰলেণ্ড’ বুলি কয় । সাগৰ পৃষ্ঠৰ পৰা প্ৰায় ৬৮০ মিটাৰ উচ্চতাত অৱস্থিত এই হাফলং চহৰ । ডিমা হাছাও জিলাৰ মুখ্য কাৰ্যালয় হিচাপে পৰিগণিত হাফলং চহৰ ৰাজ্যখনৰ মুখ্য চহৰ গুৱাহাটীৰ পৰা প্ৰায় ৩৪৫ কিলোমিটাৰ দূৰত অৱস্থিত । সমুদ্ৰপৃষ্ঠৰ পৰা ২,৩০০ ফুট উচ্চতাত অৱস্থিত হাফলং হৈছে প্ৰকৃতিৰ এক ভূ-স্বৰ্গ । পৰ্যটনৰ এক উল্লেখযোগ্য স্থান হিচাবে হাফলং জনপ্ৰিয় । হাফলং হ্ৰদটো পাহাৰীয়া অঞ্চলটোৰ কেন্দ্ৰত অৱস্থিত আৰু ই অসমৰ অন্যতম বৃহৎ প্ৰাকৃতিক জলাশয় । হাফলঙত পৰ্যটকৰ বাবে আকৰ্ষণীয় স্থলীসমূহৰ ভিতৰত অন্যতম হৈছে জাতিংগা | মাইবঙৰ পৰা ৪৭ কিল’মিটাৰ দূৰত্বত জাতিংগালৈ আৰু জাতিংগাৰ পৰা মাত্ৰ 10 কিল’মিটাৰ আঁতৰত হাফলং | জাতিংগা গাঁওখনলৈ নানা ৰঙী বিদেশী পৰিভ্ৰমী চৰাইবোৰ আহে শীতকালত । ইয়াত ছেপ্তেম্বৰ -অক্টোবৰ মাহত দক্ষিণ দিশৰ পৰা এজাক প্ৰবল বতাহ বয় আৰু আকাশখন ডাৱৰে আৱৰি ধৰে । তেতিয়াই বিদেশী পৰিভ্ৰমী চৰাইবোৰ আহে আৰু ৰহস্যজনকভাৱে মৃত্যুবৰণ কৰে । এই সময়ছোৱাতে যথেষ্ট সংখ্যক পৰ্যটক ইয়ালৈ আহে ।