মহানগৰীত চাঞ্চল্যকৰ ঘটনাঃ চানমাৰী কলনীত কোঠাৰ ভিতৰত ৰক্তাক্ত অৱস্থাত মৃতদেহ উদ্ধাৰ

নিহত বীৰেন তামুলী

এক চাঞ্চল্যকৰ ঘটনাই জোকাৰিছে গুৱাহাটী মহানগৰ। মহানগৰীৰ চানমাৰী কলনীৰ ৰোহিনী এপাৰ্টমেণ্টৰ কোঠাৰ ভিতৰত ৰক্তাক্ত অৱস্থাত উদ্ধাৰ হৈছে এটা মৃতদেহ। মৃত ব্যক্তিজনক বীৰেন তামুলী বুলি চিনাক্ত কৰা হৈছে। এই ঘটনাৰ খবৰ লাভ কৰাৰ লগে লগে চান্দমাৰী আৰক্ষী ঘটনাস্থলীত উপস্থিত হয় আৰু মৃতদেহটো উদ্ধাৰ কৰে। সম্প্ৰতি এই ঘটনাৰ তদন্ত আৰম্ভ কৰিছে আৰক্ষীয়ে। প্ৰাথমিক অনুসন্ধানৰ ভিত্তিত আৰক্ষীয়ে এয়া এক হত্যাকাণ্ড হিচাপে সন্দেহ প্ৰকাশ কৰিছে।

জানিব পৰা মতে, বীৰেন তামুলীয়ে জলজীৱন আৰু ৰে’লৱেত ঠিকা কৰি আছিল। বৃহস্পতিবাৰে নিশা ৰোহিনী এপাৰ্টমেণ্টৰ চতুৰ্থ মহলাত থকা বীৰেন তামুলীয়ে নিজ কোঠাত আন তিনিজন ব্যক্তিৰ সৈতে পাৰ্টি কৰিছিল। এই লোককেইজনৰ নাম আৰমান আলী, ৰূপক দে আৰু বিনোদ বুলি জানিব পৰা গৈছে।

ইয়াৰে ৰূপক দে নামৰ লোকজনে জানিবলৈ দিয়া মতে তেওঁলোক নিশা এক বজালৈ বীৰেন তামুলীৰ ঘৰত আছিল। ইফালে পুৱা বীৰেন তামুলীৰ পত্নীয়ে বাৰে বাৰে ফোন কৰাৰ পিছতো তেওঁৰ স্বামীয়ে ফোন নধৰাত শংকিত হৈ পৰে। ইয়াৰ পিছতে তেওঁ ৰোহিনী এপাৰ্টমেণ্টৰে ষষ্ঠ মহলাত থকা বীৰেন তামুলীৰ কাৰ্যালয়লৈ ফোন কৰে।

বীৰেন তামুলীৰ কাৰ্যালয়ত কাম কৰা যুৱকজনলৈ ফোন কৰি তামুলীৰ পত্নীয়ে এই বিষয়ে জানিবলৈ দিয়ে। কাৰ্যালয়তে থকা বীৰেন তামুলীৰ ফ্লেটৰ আন এটা চাবিৰ সহায়ত কাৰ্যালয় সহায়কজনে ফ্লেটৰ দুৱাৰ খুলি ৰক্তাক্ত অৱস্থাত প্ৰত্যক্ষ কৰে বীৰেন তামুলীক। ইয়াৰ পিছতে তেওঁ বীৰেন তামুলীৰ পৰিয়াল আৰু আৰক্ষীক খবৰ দিয়ে।

প্ৰকাশিত খবৰ অনুসৰি, নিহত বীৰেন তামুলীৰ ঘৰ লখিমপুৰৰ ধলপুৰত। নিজ পত্নীৰ সৈতে বীৰেন তামুলী গুৱাহাটীত বাস কৰি আহিছে। আনহাতে তেওঁলোকৰ সন্তান বেংগালুৰুত অধ্যয়নৰত বুলি জানিব পৰা গৈছে। আৰক্ষীয়ে তদন্তৰ বাবে CCTV কেমেৰাৰ ফুটেজ পৰীক্ষা কৰাৰ চেষ্টা কৰিছিল যদিও চতুৰ্থ মহলাৰ CCTV কেমেৰা বিকল হৈ থকাৰ বাবে এইক্ষেত্ৰত বিফল হয়।