মহানগৰীত অঘটনঃ অসম খাদী আৰু গ্ৰামোদ্যোগ ব’ৰ্ড চৌহদত বিল্ডিঙৰ পৰা পৰি মৃত্যু যুৱকৰ

অসম খাদী আৰু গ্ৰামোদ্যোগ ব’ৰ্ডৰ কাৰ্যালয় চৌহদত অঘটন

গুৱাহাটী মহানগৰীত সংঘটিত হৈছে এক চাঞ্চল্যকৰ ঘটনা। মহানগৰীৰ চানমাৰীস্থিত অসম খাদী আৰু গ্ৰামোদ্যোগ ব’ৰ্ডৰ কাৰ্যালয় চৌহদত ঘটিছে অঘটন। ব’ৰ্ডৰ চৌহদৰ ভিতৰত থকা ল’জৰ পৰা পৰি মৃত্যু ঘটিছে এজন যুৱকৰ। এই ঘটনাই অঞ্চলটোত ব্যাপক চাঞ্চল্যৰ সৃষ্টি কৰিছে। প্ৰকাশিত খবৰ অনুসৰি যোৱা নিশা প্ৰায় ১.৩০ বজাত এই ঘটনা সংঘটিত হৈছে। ঘটনাৰ বিষয়ে খবৰ লাভ কৰাৰ পিছতে মহানগৰ আৰক্ষীৰ এটা দল ঘটনাস্থলীত উপস্থিত হয় আৰু যুৱকজনৰ মৃতদেহ উদ্ধাৰ কৰে।

এই ঘটনাত প্ৰাণ হেৰুওৱা যুৱকজনক বিকাশ অধিকাৰী বুলি চিনাক্ত কৰা হৈছে। নিহত বিকাশ অধিকাৰীৰ ঘৰ গোৰেশ্বৰত বুলি জানিব পৰা গৈছে। কৰ্মসূত্ৰে গুৱাহাটীত আছিল নিহত বিকাশ অধিকাৰীৰ। সূত্ৰ অনুসৰি যুৱকজনে মহানগৰীৰ পল্টন বজাৰত থকা এখন হোটেলত চিকিউৰিটি হিচাপে কৰ্মৰত আছিল।

জানিব পৰা মতে এগৰাকী বন্ধুৰ জন্মদিন উদযাপনৰ বাবে যোৱা নিশা অসম খাদী আৰু গ্ৰামোদ্যোগ ব’ৰ্ডৰ কাৰ্যালয় চৌহদত থকা ক্ৰিষ্টেন ইন নামৰ ল’জটোলৈ গৈছিল বিকাশ। ল’জটোৰ দ্বিতীয় মহলাৰ এটা কোঠাত বিকাশে দুই বন্ধুৰ সৈতে পাৰ্টি কৰিছিল। পাৰ্টিৰ পিছতে বিল্ডিঙৰ পৰা তললৈ বাগৰি পৰাৰ ফলত এইদৰে বিকাশ অধিকাৰীৰ মৃত্যু ঘটা বুলি সূত্ৰই প্ৰকাশ কৰিছে।

অৱশ্যে এয়া আত্মহত্য নে দুৰ্ঘটনা সেই বিষয়ে এতিয়াও কোনো তথ্য পোহৰলৈ অহা নাই। ঘটনা সন্দৰ্ভত আৰক্ষীয়ে সম্প্ৰতি তদন্ত অব্যাহত ৰাখিছে। আৰক্ষীৰ তদন্ততহে এই ঘটনাৰ প্ৰকৃত তথ্য পোহৰলৈ আহিব। আৰক্ষীয়ে ইতিমধ্যে বিকাশৰ সৈতে কোঠাটোত থকা দুগৰাকী বন্ধুক এই বিষয়ত সোধা-পোছা কৰা বুলি জানিবলৈ দিছে।

মৃত বিকাশৰ দুয়োগৰাকী বন্ধু ল’জটোত কেয়াৰ টেকাৰ হিচাপে কাম কৰিছিল। আৰক্ষীৰ এগৰাকী বিষয়াই জানিবলৈ দিয়া মতে, ল’জৰ চিচিটিভি ফুটেজ ইতিমধ্যে পৰীক্ষা কৰা হৈছে। চিচিটিটি ফুটেজত বিল্ডিঙৰ দ্বিতীয় মহলাৰ পৰা যুৱকজন তললৈ পৰা দেখিবলৈ পোৱা বুলি বিষয়াগৰাকীয়ে সদৰী কৰিছে। নিহত বিকাশ অধিকাৰী অত্যধিক নিচাসক্ত অৱস্থাত আছিল বুলি জানিবলৈ দিছে বিষয়াগৰাকীয়ে।

নিশা পাৰ্টিৰ পিছত শুবলৈ যোৱাৰ সময়তে প্ৰায় ১.৩০ বজাত এই ঘটনা সংঘটিত হয় বুলি জানিবলৈ দি আৰক্ষী বিষয়াগৰাকীয়ে লগতে অসম খাদী আৰু গ্ৰামোদ্যোগ ব’ৰ্ডৰ কাৰ্যালয় চৌহদত থকা এই ল’জটোৰ গৰাকী কোন সেই বিষয়ত তদন্ত আৰম্ভ কৰা হ’ব বুলিও জানিবলৈ দিছে। এই সন্দৰ্ভত অধিক তথ্য তদন্তৰ পিছত পৰৱৰ্তী সময়ত প্ৰকাশ কৰা হ’ব বুলি লগতে কয় আৰক্ষী বিষয়াজনে।