Assam Cabinet: কৰ্মচাৰীৰ দৰমহা বৃদ্ধিৰ পৰা মিছন বসুন্ধৰালৈ, কেবিনেটৰ সিদ্ধান্তসমূহ…
Assam Cabinet Decision: দেওবাৰে অনুষ্ঠিত হয় ৰাজ্য চৰকাৰৰ কেবিনেট বৈঠকত। য'ত চৰকাৰে বহু গুৰুত্বপূৰ্ণ সিদ্ধান্ত গ্ৰহণ কৰে। ইয়াৰ পাছতে মুখ্যমন্ত্ৰী হিমন্ত বিশ্ব শৰ্মাই সংবাদমেল সম্বোধন কৰি ইয়াৰ সবিশেষ জনায়।
অসম কেবিনেটৰ সিদ্ধান্ত
দেওবাৰ (৩০নৱেম্বৰ)য়ে অনুষ্ঠিত হয় ৰাজ্য চৰকাৰৰ কেবিনেট বৈঠক। ইয়াৰ পাছতে মুখ্যমন্ত্ৰী হিমন্ত বিশ্ব শৰ্মাই সংবাদমেল সম্বোধন কৰি বৈঠকৰ সিদ্ধান্তসমূহৰ বিষয়ে উল্লেখ কৰে। আজি অসম কেবিনেটৰ বৈঠকত এন এইচ এমৰ কৰ্মচাৰীসকলৰ লগতে বিভিন্ন দিশৰ ওপৰত সিদ্ধান্ত গ্ৰহণ কৰে। তলত আজিৰ কেবিনেট বৈঠকৰ সিদ্ধান্তসমূহ উল্লেখ কৰা হ’ল-
এন এইচ এমৰ স্বাস্থ্য কৰ্মীৰ সামাজিক সুৰক্ষা: কেবিনেটে ৰাষ্ট্ৰীয় স্বাস্থ্য অভিযান (NHMৰ মৃত কৰ্মচাৰীৰ নিকট আত্মীয়ৰ বাবে অনুকম্পামূলক ধনৰাশিৰ পৰিমাণ ৫ লাখ টকাৰ পৰা ৭.৫ লাখ টকালৈ বৃদ্ধি কৰাৰ বাবে অনুমোদন জনাইছে। বর্ধিত ধনৰাশি এন এইচ এমৰ অধীনত ৰাজ্যিক সমর্থন বাজেটৰ পৰা সংগ্ৰহ কৰা হ’ব, যি ফ্ৰণ্টলাইন স্বাস্থ্যকর্মীসকলৰ পৰিয়ালৰ বাবে সামাজিক সুৰক্ষা সমর্থন শক্তিশালী কৰিব।
উত্তৰ লখিমপুৰ বিশ্ববিদ্যালয়ৰ প্ৰশাসনিক ধাৰাবাহিকতা নিশ্চিতকৰণ: কেবিনেটে উত্তৰ লখিমপুৰ বিশ্ববিদ্যালয় আইন, ২০২৩-ৰ ৫৮ নম্বৰ ধাৰা সংশোধন কৰিবলৈ এক অধ্যাদেশ জাৰি কৰাত অনুমোদন দিছে। এই সংশোধনীয়ে প্রথমে পঞ্জীয়কক তিনি বছৰলৈ বা নিয়মীয়া পঞ্জীয়ক নিযুক্তি নিদিয়ালৈকে কার্যভাৰ গ্ৰহণ কৰি থাকিবলৈ অনুমতি প্রদান কৰিব। ইয়াৰ উদ্দেশ্য হৈছে বিশ্ববিদ্যালয়ৰ কাৰ্যক্ৰমণিকাসমূহ নিৰৱচ্ছিন্নভাৱে চলি থকাতো সুনিশ্চিত কৰা।
মিনি আইটিআইৰ ঠিকাভিত্তিক কৰ্মচাৰীৰ বাবে সংশোধিত দৰমহাঃকেবিনেটে দুধনৈ, পাঠশালা, ৰঙিয়া, বিশ্বনাথ চাৰিআলি আৰু তিতাবৰৰ পাঁচখন মিনি আইটিআইৰ ১৭০জন ঠিকাভিত্তিক কর্মচাৰীৰ বাবে ১ জানুৱাৰী ২০২৬ৰ পৰা কার্যকৰী হোৱাকৈ ৩% বার্ষিক বৃদ্ধি (২০১৫-২০২৫) ৰে তেওঁলোকৰ মূল পাৰিশ্রমিক সংশোধন কৰি স্থিৰ দৰমহাৰ গাঁথনি উন্নীতকৰণৰ বাবে অনুমোদন জনাইছে।
মিছন বসুন্ধৰঃ ধুবুৰী, গোৱালপাৰা, বঙাইগাঁও, শোণিতপুৰ, লখিমপুৰ, গোলাঘাট, নলবাৰী আৰু বৰপেটাত মিছন বসুন্ধৰা ১.০ৰ অধীনত ৬৬০টা খিলঞ্জীয়া, ভূমিহীন পৰিয়ালক চৰকাৰী ভূমি নিষ্পত্তিৰ বাবে কেবিনেটে অনুমোদন জনাইছে।
শোণিতপুৰ, বৰপেটা আৰু গোলাঘাটত মিছন বসুন্ধৰা নিবিৰচ্ছিন্ন সেৱাৰ অধীনত ৭১২টা খিলঞ্জীয়া পৰিয়ালক চৰকাৰী খাঁচ আৰু চিলিং উদ্বৃত্ত ভূমিৰ নিষ্পত্তিৰ বাবে কেবিনেটে অনুমোদন জনাইছে।
অন্য খবৰ পঢ়কঃ অসম আৰক্ষীৰ সফলতাৰ পৰা ৰাহুল-ছোনিয়াৰ বিৰুদ্ধে এজাহাৰলৈ, দিনটোৰ খবৰ…