প্ৰসঙ্গ ছয় জনগোষ্ঠীৰ জনজাতিকৰণঃ মন্ত্ৰীগোটৰ প্ৰতিবেদনৰ পিছতে ৰাজ্যজুৰি ভিন্ন প্ৰতিক্ৰিয়া, কি আছে প্ৰতিবেদনত?

জনজাতিকৰণ প্ৰসঙ্গত মন্ত্ৰীগোটৰ প্ৰতিবেদন

অসমৰ ৰাজনীতিৰ বিগত বহুকেইটা বছৰৰ অন্যতম বহুচৰ্চিত তথা বহুবিবাদিত বিষয় ছয় জনগোষ্ঠীৰ জনজাতিকৰণ। ৰাজ্যত বিগত প্ৰায় তিনিটা দশক ধৰি উত্থাপিত হৈ আহিছে এই প্ৰসঙ্গ। ভিন্ন দাবী-প্ৰতিশ্ৰুতিৰ পিছতো অৱশ্যে ওলমি ৰৈছে ছয় জনজোষ্ঠীৰ জনজাতিকৰণৰ বিষয়টো। শেহতীয়াকৈ অৱশ্যে জনজাতিকৰণৰ দাবীত ৬ জনগোষ্ঠীৰ এই আন্দোলন অধিক তীব্ৰতৰ হৈ পৰে। ৰাজ্যৰ ভিন্ন প্ৰান্তত ক্ৰমাৎ বৃদ্ধি পোৱা আন্দোলনমুখৰ পৰিস্থিতিৰ পিছত এই বিষয়ত একপ্ৰকাৰে ক্ষীপ্ৰ পদক্ষেপ গ্ৰহণৰ বাবে বাধ্য হৈছে অসম চৰকাৰ।

ছয় জনগোষ্ঠীৰ জনজাতিকৰণৰ বিষয়ত বিবেচনাৰ বাবে ৰণোজ পেগুৰ অধ্যক্ষতাত এক মন্ত্ৰীগোট গঠন কৰা হৈছিল। ভিন্ন বিবাদ তথা প্ৰতিক্ৰিয়াৰ মাজতে শনিবাৰে অসম বিধানসভাৰ শীতকালীন অধিৱেশনৰ অন্তিম দিনটোত তিনিগৰাকী মন্ত্ৰীৰ তত্বাৱধানত প্ৰস্তুত কৰা মন্ত্ৰীগোটৰ এই প্ৰতিবেদন সদনৰ মজিয়াত দাখিল কৰা হয়।

মন্ত্ৰীগোটৰ এই প্ৰতিবেদনত জনজাতিকৰণৰ দাবী তোলা ৬ জনগোষ্ঠীক তিনিটা শ্ৰেণীত ভাগ কৰাৰ পৰামৰ্শ দিয়া হৈছে। সেই অনুসৰি এই জনগোষ্ঠী কেইটাক ST (Plain), ST (Hills) আৰু ST (Valley) অৰ্থাৎ জনজাতি (ভৈয়াম), জনজাতি (পাৰ্বত্য) আৰু জনজাতি (উপত্যকা) হিচাপে শ্ৰেণীভুক্ত কৰাৰ পৰামৰ্শ আগবঢ়োৱা হৈছে।

এই প্ৰতিবেদনে টাই আহোম, চুতীয়া, চাহ জনগোষ্ঠী আৰু আদিবাসীসকলক জনজাতি (উপত্যকা) শ্ৰেণীত অন্তৰ্ভুক্ত কৰাৰ প্রস্তাৱ আগবঢ়াইছে। অবিভক্ত গোৱালপাৰৰ বাহিৰৰ কোচ ৰাজবংশীসকলকো এই শ্ৰেণীত অন্তৰ্ভুক্তৰ প্রস্তাৱ দিয়া হৈছে। ইফালে মৰাণ, মটক আৰু অবিভক্ত গোৱালপাৰাৰ কোচ ৰাজবংশীসকলক জনজাতি (ভৈয়াম)ৰ স্বীকৃতি প্রদানৰ প্রস্তাৱ দিয়া হৈছে।

বৰ্তমানৰ জনজাতীয় লোকসকলৰ অধিকাৰৰ কোনো ক্ষতি নোহোৱাকৈ এই ছয় জনগোষ্ঠীক জনজাতিকৰণৰ প্ৰস্তাৱ দিয়া হৈছে। সেই অনুসৰি বিধানসভাত অনুসূচীত জনজাতিৰ বাবে সংৰক্ষিত আসনত নতুনকৈ স্বীকৃতিপ্ৰাপ্ত এই জনজাতিয়ে স্থান লাভ নকৰিব। ইয়াৰ সমান্তৰালকৈ কেন্দ্রীয় চৰকাৰৰ সংৰক্ষিত আসনত নতুনকৈ স্বীকৃতিপ্ৰাপ্ত এই জনজাতীয় লোকসকলে সুবিধা নাপাব।

বিধানসভাত মন্ত্ৰীগোটৰ এই প্ৰতিবেদন দাখিলৰ পিছত এতিয়া কেন্দ্ৰীয় চৰকাৰৰ ওচৰলৈ এই প্ৰতিবেদন প্ৰেৰণ কৰা হ’ব। আনহাতে ৰাজ্যজুৰি দেখা গৈছে ভিন্ন প্ৰতিক্ৰিয়া। ৰাজ্যৰ ভিন্ন প্ৰান্তত এই ছয় জনগোষ্ঠীৰ লোক তথা দল-সংগঠনে এই পদক্ষেপক আদৰণি জনাই আনন্দ-উছাহ কৰা পৰিলক্ষিত হৈছে।

মন্ত্ৰীগোটৰ এই প্ৰতিবেদনে তেওঁলোকৰ দীৰ্ঘদিনীয়া দাবী পূৰণৰ দিশে আগবঢ়াই নিয়া বুলি উল্লেখ কৰে বহু দল-সংগঠনে। ইফালে মন্ত্ৰীগোটৰ অধ্যক্ষ ৰণোজ পেগুৱে সদনত এই প্ৰতিবেদন দাখিল কৰাৰ পিছত বিৰোধীয়ে প্ৰতিবেদনখনক লৈ সদনত আলোচনাৰ আহ্বান জনাইছিল। অৱশ্যে বিৰোধী এই আহ্বান অগ্ৰাহ্য কৰি অধ্যক্ষই আলোচনাৰ বাবে অনুমোদন জনোৱাৰ পৰা বিৰত থাকে।

ইয়াৰ পিছতে বিৰোধী নেতাসকলে এই বিষয়ত প্ৰতিক্ৰিয়া প্ৰকাশ কৰিছে। ৰাইজৰ দলৰ সভাপতি তথা শিৱসাগৰৰ বিধায়ক অখিল গগৈয়ে এই প্ৰতিবেদনক সম্পূৰ্ণ ভুৱা আৰু নিৰ্বাচনী ললীপপ আখ্যা দিয়ে। বিধানসভাৰ বিৰোধী নেতা দেৱব্ৰত শইকীয়াই মন্ত্ৰীগোটৰ এই প্ৰতিবেদনক লৈ অসন্তুষ্টি প্ৰকাশ কৰে।

লক্ষণীয়ভাৱে মন্ত্ৰীগোটৰ এই প্ৰতিবেদন দাখিলৰ সময়তে কোকৰাঝাৰত সৃষ্টি হৈছিল ভয়াৱহ পৰিস্থিতিৰ। ছয় জনগোষ্ঠীৰ জনজাতিকৰণৰ বিৰোধিতাৰে বড়োলেণ্ড বিশ্ববিদ্যালয়ৰ শিক্ষাৰ্থীয়ে গ্ৰহণ কৰা প্ৰতিবাদী কাৰ্যসূচীয়ে ধাৰণ কৰিছিল উগ্ৰ ৰূপ। একাংশ প্ৰতিবাদকাৰীয়ে আনকি বিটিচি সচিবালয়তো প্ৰৱেশ কৰি সচিবালয়ৰ বিস্তৰ ক্ষতি কৰে। পৰৱৰ্তী সময়ত গুৱাহাটীৰ ৰাজপথত আন্দোলনৰ হুংকাৰ দিছে প্ৰতিবাদী ছাত্ৰ-ছাত্ৰীসকলে।