চীনে ‘জল বোমা’ৰে উত্তৰ-পূবক ধ্বংস কৰিব বিচাৰিছে, ব্ৰহ্মপুত্ৰ ওপৰত সৰ্ববৃহৎ নদী বান্ধ ৰাষ্ট্ৰীয় নিৰাপত্তাৰ প্ৰতি ভাবুকি : অখিল গগৈ

চীনৰ বিশ্বৰ সৰ্ববৃহৎ বান্ধক লৈ অখিল গগৈৰ প্ৰতিক্ৰিয়া

চীনে সৰ্ববৃহৎ নদী বান্ধ নিৰ্মাণৰ পৰিকল্পনা কৰাৰ খবৰ প্ৰকাশ পোৱাৰ পাছতে এইলৈ উদ্বেগ প্ৰকাশ কৰিছে কৃষক নেতা তথা বিধায়ক অখিল গগৈয়ে । এই সন্দৰ্ভত বিধায়ক অখিল গগৈয়ে কয় যে, চীনে উত্তৰ-পূব অঞ্চলৰ সাৰ্বভৌমত্ব আৰু নিৰাপত্তাৰ প্ৰতি ভাবুকি সৃষ্টি কৰিব বিচাৰিছে । ইয়াৰ সমান্তৰালভাৱে অখিল গগৈয়ে কয় যে, চীনে পৃথিৱীৰ সৰ্ববৃহৎ নদী বান্ধ নিৰ্মাণ কৰি ভাৰতৰ বিৰুদ্ধে ‘যুদ্ধৰ জৈৱিক অস্ত্ৰ’ ব্যৱহাৰৰ ষড়যন্ত্ৰ ৰচনা কৰিছে ।

প্ৰায়ে নদী বান্ধৰ বিৰুদ্ধে অৱস্থান লোৱা অখিল গগৈয়ে প্ৰতিক্ৰিয়া প্ৰকাশ কৰে যে, চীনে সৰ্ববৃহৎ নদী বান্ধ নিৰ্মাণ কৰি উত্তৰ-পূৰ্বাঞ্চলৰ পৰিস্থিতি ভয়াবহ কৰি তুলিব বিচাৰিছে । তেওঁ চীনৰ সৰ্ববৃহৎ নদী বান্ধক “জল বোমা” বুলি অভিহিত কৰে । ইয়াৰ লগতে তেওঁ কয় যে, চীনে যিধৰণে ব্ৰহ্মপুত্ৰখনক নিজৰ হাতত ৰাখিব বিচাৰিছে ই কেতিয়াও গ্ৰহণযোগ্য নহয় ।

চীনে যাতে ভাৰতৰ সৰ্ববৃহৎ জলৰাশিৰ ওপৰত অধিকাৰ সাব্যস্ত কৰিব কৰি নোৱাৰে, ইয়াৰ লগতে চীনে যাতে সৰ্ববৃহৎ নদী বান্ধ নিৰ্মাণ কৰি উত্তৰ-পূৰ্ব ভাৰতক ধ্বংস কৰি নোৱাৰে তাৰ বাবে চীনৰ ওপৰত ভাৰতে হেঁচা প্ৰয়োগ কৰিব লাগে বুলি কয় অখিল গগৈয়ে । অখিল গগৈয়ে কয় য়ে, ব্ৰহ্মপুত্ৰৰ ওপৰত চীনে যাতে নদী বান্ধ নিৰ্মাণ নকৰে তাৰ বাবে ভাৰত চৰকাৰে চীনৰ সৈতে কূটনৈতিক আলোচনা কৰিব লাগে ।

তেওঁ ভাৰত চৰকাৰৰ ওচৰত দাবী জনাই যে, ভাৰত চৰকাৰে চীনৰ সৈতে কথা পাতি ব্ৰহ্মপুত্ৰৰ ওপৰত চীনে নিৰ্মাণ কৰিবলৈ লোৱা পৃথিৱীৰ ভিতৰত সৰ্ববৃহৎ নদী বান্ধ কৰাৰ ব্যৱস্থা কৰিব লাগে । ইয়াৰ লগতে চীনৰ এই ষড়যন্ত্ৰৰ বিৰুদ্ধে সমগ্ৰ উত্তৰ-পূৰ্বাঞ্চলক থিয় হ’বৰ বাবে আহ্বান জনাই অখিল গগৈয়ে । চীনৰ এই নদী বান্ধে উত্তৰ পূবত বানৰ ভয়াবহ পৰিস্থিতি সৃষ্টি কৰি ধ্বংসৰ এক ধাৰা সৃষ্টি কৰিব পাৰে নতুবা ভয়াবহ খৰাং পৰিস্থিতিৰ সৃষ্টি কৰিব পাৰে বুলি উদ্বেগ প্ৰকাশ কৰিছে অখিল গগৈয়ে ।

উল্লেখ্য যে, অসমৰ ব্ৰহ্মপুত্ৰক চীনত ইয়াৰলুং ছাংপো নামেৰে জনাজাত । এই ইয়াৰলুং ছাংপোৰ ওপৰতে চীনে পৃথিৱীৰ সৰ্ববৃহৎ নদী বান্ধ নিৰ্মাণৰ পৰিকল্পনা কৰিছে বুলি খবৰ প্ৰকাশ পাইছে ।