বিজেপিলৈ দৃষ্টি ৰাজখোৱা, যোগদানৰ উদ্দেশ্য নিৰ্বাচনী টিকট হ’ব নালাগে, স্পষ্ট বাৰ্তা দিলীপ শইকীয়াৰ

অসম বিজেপিত যোগদান

দৃষ্টি ৰাজখোৱাকে ধৰি ৰাজ্যৰ বহু কেইগৰাকী পৰিচিত ব্যক্তিয়ে আজি বিজেপিত যোগদান কৰে। ৰাজনৈতিক বিশ্লেষকৰ মতে ২০২৬ নিৰ্বাচনৰ পূৰ্বে এই যোগদান বিজেপিৰ বাবে ইতিবাচক বুলি গণ্য কৰা হৈছে। এই উপলক্ষে বৃহস্পতিবাৰে গুৱাহাটীস্থিত ৰাজ্যিক বিজেপিৰ মুখ্য কাৰ্যালয়ত এক অনুষ্ঠান অনুষ্ঠিত হয়। দলটোৰ সূত্ৰৰ মতে, বৃহস্পতিবাৰে দিনটোত ৰাজনৈতিক দল আৰু সামাজিক সংগঠনৰ ৫০ জনৰো অধিক নেতাই আনুষ্ঠানিকভাৱে ভাৰতীয় জনতা পাৰ্টিত যোগদান কৰে।

অনুষ্ঠানত উপস্থিত থাকে ৰাজ্যিক বিজেপিৰ সভাপতি দিলীপ শইকীয়া, সাংগঠনিক সম্পাদক ৰবীন্দ্ৰ ৰাজু, কেবিনেট মন্ত্ৰী জয়ন্ত মল্লবৰুৱাকে ধৰি বিজেপিৰ কেইবাগৰাকী জ্যেষ্ঠ নেতা। বিজেপিত যোগদান কৰা উল্লেখযোগ্য নেতাসকলৰ ভিতৰত আছিল-দৃষ্টি ৰাজখোৱা, আলফা (আই)ৰ প্ৰাক্তন নেতা, আম আদমী পাৰ্টিৰ অসমৰ প্ৰাক্তন সভাপতি মনোজ ধানোৱাৰ, সদৌ অসম গোৰ্খা ছাত্ৰ সন্থাৰ প্ৰাক্তন সভাপতি অৰ্জুন ছেত্ৰী, অমল পাটোৱাৰী, মানস শৰণীয়া,ত্ৰিদীপ তালুকদাৰ(ৰাজকুমাৰ)অভিনেতা, নিৰ্মল পায়েং (ৰাইজৰ দলৰ যুৱ বাহিনীৰ ৰাজ্যিক সভাপতি), প্ৰশান্ত শইকীয়া (কংগ্ৰেছৰ নগাঁও জিলাৰ সভাপতি), অসীম চমুৱা (অধিবক্তা) আদি।

এই সভাত ৰাজ্যিক বিজেপিৰ সভাপতি দিলীপ শইকীয়াই কয় যে,এনেধৰণৰ আৰু অধিক নেতাক আদৰণি জনোৱাৰ বাবে বিজেপি সাজু হৈ আছে। শইকীয়াই লগতে কয়, “যোগদান কৰিবলৈ বহুতে অপেক্ষা কৰি আছে যদিও পৰিকল্পনাৰ ভিত্তিত আজি এই যোগদানৰ সিদ্ধান্ত লোৱা হয়।” তেওঁ জোৰ দি কয় যে, বিজেপিত যোগদান কৰাটো কেৱল টিকটৰ লাভ কৰাৰ দিশৰ পৰা চাব নালাগে। “কিছুমানে দলৰ টিকট বিচাৰিব পাৰে, যিটো স্বাভাৱিক। কিন্তু উপযুক্ত সময়ত চূড়ান্ত সিদ্ধান্ত লোৱা হ’ব। সকলোৱে টিকট নাপাব—কিন্তু সকলোৱে দীৰ্ঘম্যাদীভাৱে বিজেপিৰ সৈতে থিয় দিয়াৰ প্ৰতিশ্ৰুতি ল’ব লাগিব।” এইদৰে কয় দিলীপ শইকীয়াই।

তেওঁ অখিল গগৈক উদ্দেশ্যিক কেইবাটাও গুৰুত্বপূৰ্ণ মন্তব্য প্ৰকাশ কৰে। দিলীপ শইকীয়াই কয় যে, “মানুহে অখিল গগৈৰ কাষত বেছি দিন নাথাকে। কমল মেধিৰ পৰা নিৰ্মল পায়েংলৈকে—সকলোৱে অখিল গগৈৰ শিবিৰ এৰি গৈছে।”