একেখন মঞ্চত মোদী-পুটিন আৰু জিনপিংঃ ট্ৰাম্পক প্ৰত্যাহ্বানৰ যো-জা চলিছে চীনত!

একেখন মঞ্চত দেখা যাব মোদী, পুটিন আৰু জিনপিঙক

ক্ৰমাৎ দূৰত্ব বৃদ্ধি পাইছে ভাৰত আৰু আমেৰিকাৰ। বাণিজ্য নীতিক কেন্দ্ৰ কৰি এতিয়া দুয়ো দেশৰ মাজৰ সম্পৰ্কত মেলিছে বৃহৎ ফাঁট। আনহাতে ৰাছিয়া আৰু চীনৰ সৈতে আমেৰিকাৰ সম্পৰ্কৰ গতিধাৰা পূৰ্বৰ দৰেই অব্যাহত আছে। তাৰ মাজতে চীনৰ ভূমিত চলিছে আমেৰিকাৰ বিৰুদ্ধে শক্তি প্ৰদৰ্শনৰ যো-জা। চীনা ৰাষ্ট্ৰপতি ছি জিনপিঙৰ নেতৃত্বত মাৰ্কিন ৰাষ্ট্ৰপতি ট্ৰাম্পৰ বিৰুদ্ধে ক্ষমতা প্ৰদৰ্শনৰ বাবে নিৰ্মাণ হৈছে এক শক্তিশালী মঞ্চ। এই মঞ্চৰ পৰাই যেন আমেৰিকালৈ এক প্ৰত্যাহ্বানমূলক বাৰ্তা প্ৰেৰণৰ বাবে সাজু হৈছে নতুন ‘মিত্ৰশক্তি’!

দেওবাৰৰ পৰা চীনত অনুষ্ঠিত হ’ব এছ চি অ’ শীৰ্ষ সন্মিলন। এই সন্মিলনৰ পিছতে চীনৰ বিজয় দিৱসৰ পেৰেড। এই দুটা ইভেণ্টৰ জৰিয়তে চীনে ট্ৰাম্পৰ শুল্ক নীতিক মুকলিকৈ প্ৰত্যাহ্বান জনাবলৈ ওলাইছে। এছ চি অ’ শীৰ্ষ সন্মিলনৰ মঞ্চত একেলগে দেখা যাব ভাৰতৰ প্ৰধানমন্ত্ৰী নৰেন্দ্ৰ মোদী, চীনৰ ৰাষ্ট্ৰপতি ছি জিনপিং আৰু ৰাছিয়াৰ ৰাষ্ট্ৰপতি ভ্লাদিমিৰ পুটিনক।

তেওঁলোকৰ উপৰিও উত্তৰ কোৰিয়াৰ ৰাষ্ট্ৰপতি কিম জং উনেও এই সন্মিলনত অংশগ্ৰহণ কৰিব। তাৰ পিছতে এতিয়া চীনা ভূমিত হ’বলগা এই সন্মিলনক আমেৰিকাৰ বিৰুদ্ধে শক্তি প্ৰদৰ্শনৰ এক নতুন মঞ্চ হিচাপে বিবেচনা কৰা হৈছে। ৩১ আগষ্টৰ পৰা ১ ছেপ্টেম্বৰলৈ চীনৰ টিয়ানজিনত অনুষ্ঠিত হ’ব চাংহাই সহযোগিতা সংস্থাৰ (SCO) ২৫ সংখ্যক সন্মিলন।

এই সন্মিলনত অংশগ্ৰহণ কৰিব এছচিঅ’ৰ দহখন দেশৰ ৰাষ্ট্ৰপতিসকলে। সন্মিলনত প্ৰধানমন্ত্ৰী নৰেন্দ্ৰ মোদী আৰু ৰাছিয়াৰ ৰাষ্ট্ৰপতি ভ্লাদিমিৰ পুটিনকো দেখা যাব। শীৰ্ষ সন্মিলনৰ উপৰিও প্ৰধানমন্ত্ৰী নৰেন্দ্ৰ মোদীয়ে চীনৰ ৰাষ্ট্ৰপতি ছি জিনপিং আৰু ৰাছিয়াৰ ৰাষ্ট্ৰপতি পুটিনক পৃথকে পৃথকে সাক্ষাৎ কৰি ট্ৰাম্প নীতি শুল্ক নীতি সন্দৰ্ভত আলোচনাত মিলিত হ’ব।

এছ চি অ’ শীৰ্ষ সন্মিলনৰ পিছত ভাৰতলৈ উভতি আহিব প্ৰধানমন্ত্ৰী মোদী। আনহাতে সন্মিলনৰ পিছতে চীনে বিজয় দিৱস উদযাপন কৰিব। এই উপলক্ষে চীনৰ সেনাই বেইজিঙত নিজৰ সৰ্ববৃহৎ সামৰিক পেৰেড অনুষ্ঠিত কৰিব বুলি জানিব পৰা গৈছে। এই পেৰেডত পুটিনৰ উপৰিও কিম জং, ইৰাণৰ ৰাষ্ট্ৰপতি মাছুদ পাজেছকিয়ানে ২৬খন দেশৰ ৰাষ্ট্ৰপতিসকলে অংশগ্ৰহণ কৰিব।

প্ৰথমে এছ চি অ’ শীৰ্ষ সন্মিলনৰ জৰিয়তে আৰু তাৰ পিছত এই বিজয় দিৱস পেৰেডৰ জৰিয়তে জিনপিঙৰ নেতৃত্বত মাৰ্কিন ৰাষ্ট্ৰপতি ট্ৰাম্পক এক স্পষ্ট বাৰ্তা প্ৰেৰণ কৰাৰ প্ৰস্তুতি চলোৱা হৈছে বুলি আন্তঃৰাষ্ট্ৰীয় ৰাজনীতিৰ বিশেষজ্ঞসকলে মত প্ৰকাশ কৰিছে। ট্ৰাম্পৰ শুল্ক নীতিৰ বিপক্ষে এই মঞ্চৰ শক্তিয়ে কিমানদূৰ প্ৰভাৱ পেলাব পাৰে, সেয়া লক্ষণীয় হ’ব।